Jesus wa ri nomapanga woposengo 3 mba turire moBetanie. Owo va ri Lasarus novaṱena 2, Maria na Marta. Eyuva rimwe, ngunda Jesus ari munda mbwina na Jordan, Maria na Marta ve mu hindira ombuze ndjaai tja: ‘Lasarus wa vere tjinene arikana indjo tjimanga!’ Posiya Jesus kena pa hakahana okuyenda. Eye wa undja omayuva 2 tjazumba ookuraera ovahongewa ve na tja: ‘Ngatu yende koBetanie. Lasarus wa rara, nami me i ku ye okukemupendura.’ Ovaapostele va tja: ‘Lasarus tja rara okutja ma kara nawa rukwao.’ Okuzambo Jesus we ve raera ouatjiri na tja: ‘Lasarus wa ṱu.’

Indu Jesus tja kavaza koBetanie, tjandje Lasarus wa pakwa oure womayuva 4 rukuru. Ovandu ovengi ve yekuhuhumiṋa ooMarta na Maria. Indu Marta tja zuva kutja Jesus we ya, eye wa pita okukemutjakanena. Eye wa tja: “Muhona, Ove andakuzu wa ri mba omuṱena kwandje katja ṱa!” Jesus wa tja ku ye: ‘Omuṱena kwoye ma kara nomuinyo rukwao. Ove u nongamburiro ndjo Marta?’ Eye wa tja: ‘Ami me tjiwa kutja ma kapenduka movakoke meyuva esenina.’ Jesus wa tja: “OwAmi ombendukiro nomuinyo.”

Okuzambo Marta wa ya ku Maria na tja ku ye: ‘Jesus we ya.’ Maria wa tupuka ku Jesus nu otjimbumba tjovandu tje mu kongorera. Maria we ripetera kozombaze zaJesus nu wa rira tjinene. Eye wa tja: ‘Muhona andakuzu wa ri mba, omuṱena kwetu a tja kara nomuinyo!’ Jesus wa muna omuhihamo waMaria nu eye wina wa uta okurira. Ovandu tji va muna omahoze we va tja: ‘Jesus tjiri wa suverere Lasarus.’ Posiya tjiva va himinwe kutja, ‘Ongwaye tje hina wa yama epanga re?’ Okuzambo Jesus wa tjita vi?

Jesus wa ya keyendo, nu pari ewe enene pomahitiro. Eye wa rakiza na tja: ‘Isapweye ewe.’ Marta wa tja: ‘Orutu rwa tjiti omayuva yane meyendo! Orwo nai maru ṋuka.’ Posiya owo va isapo ewe nu Jesus wa kumba na tja: ‘Tate, me tja okuhepa okundjizuvira. Me tjiwa kutja Ove aruhe u ndji zuvira, posiya me  vanga kutja ovandu ve tjiwe kutja oOve ngwe ndji hinda.’ Tjazumbo otja ravaera neraka enene na tja: “Lasarus, penduka u pite!” Pa tjitwa otjiṋa otjihimise: Lasarus wa pita meyendo, a mangwa omarapi. Jesus wa tja: ‘Mu mangurureye omarapi nu mu mwese ma yende.’

Ovandu mbu va muna oviṋa mbi, va twa ongamburiro mu Jesus. Posiya tjiva va karaera Ovafarisei. Okuzambo, Ovafarisei aave vanga okuzepa Lasarus na Jesus. Umwe wovaapostele 12 wena Judas Iskariot movineya wa ya kOvafarisei neve pura a tja: ‘Mamu ndji sutu vingapi tji mbe mu vatere okukambura Jesus?’ Owo va zuvasana kutja mave mu sutu ovisilveri 30, nu Judas wa uta okupaha omuano wokuyandja Jesus kOvafarisei.