Jizus tinha três grandis amigu ki ta moraba na Betánia. Éra Lázaru ku se dôs irman, Maria ku Marta. Un dia, timenti Jizus staba na otu ladu di Jurdon, Maria ku Marta manda-l un rekadu urjenti: ‘Lázaru sta txeu duenti. Favor, ben djobe-l faxi!’ Má Jizus ka bai kel óra. Lázaru móre. Dipôs di dôs dia, el fla se disiplus: ‘Nu bai Betánia. Lázaru sta ta durmi i N sta bai korda-l.’ Apóstlus fla: ‘Si Lázaru sta ta durmi, nton el ta midjora.’ Nton Jizus fla-s klaru: ‘Lázaru móre.’

Kantu Jizus txiga Betánia, dja tinha kuatu dia ki Lázaru staba mortu. Monti algen bai konsola Marta ku Maria. Lógu ki Marta obi ma Jizus dja ben, el bai nkontra ku el. Marta fla: ‘Sinhor, si bu staba li, nha irmon ka ta moreba’. Jizus fla-l: ‘Bu irmon ta ben vive otu bês. Bu ta kridita na kel-li Marta?’ Marta fla: ‘N ta kridita ma un dia el ta ben resusita.’ Jizus fla-l: ‘Ami é resureison i vida.’

Dipôs Marta bai atxa Maria i el fla-l: ‘Jizus sta li.’ Maria kóre pa Jizus i monti di algen bai se tras. El poi duedju na txon na pé di Jizus sô ta txora. Maria fla: ‘Sinhor, si bu staba li, nos irmon inda staba bibu!’ Jizus odja modi ki el staba ta sufri txeu, nton el kumesa ta txora tanbê. Kantu gentis odja-l ta txora, es fla: ‘Nhos odja modi ki Jizus gostaba di Lázaru.’ Má alguns kumesa ta pergunta: ‘Pamodi ki el ka salva se amigu?’ Kuzê ki Jizus faze dipôs?

Kantu Jizus txiga na lugar ki es poba korpu di Lázaru, tinha un pédra grandi ta tapa-l. Jizus fla: ‘Nhos tra kel pédra.’ Marta fla: ‘Má dja ten kuatu dia ki el móre! Se korpu debe sta ta txera.’ Simé, es tra kel pédra i Jizus ora: ‘Nha pai, obrigadu pamodi bu obi-m. N sabe ma sénpri bu ta obi-m, má N fla kel-li pamodi kes monti di algen ki sta li, pa es kridita ma é bo ki manda-m.’ Dipôs el txoma riju: ‘Lázaru, sai pa fóra!’ Kontise un  kuza ki spanta tudu algen: Lázaru sai pa fóra, inda tudu roladu na panu di linhu. Jizus fla-s: ‘Nhos tra-l panu i nhos dexa-l bai.’

Monti di kes algen ki odja kel milagri li poi fé na Jizus. Má alguns bai konta farizeus kuzê ki kontise. Désdi kel dia, farizeus disidi mata Jizus ku Lázaru. Judas Iskariótis ki éra un di kes 12 apóstlu, bai atxa farizeus sukundidu i el pergunta-s: ‘Kantu ki nhos ta paga-m pa N djuda nhos pega Jizus?’ Es konbina paga-l 30 muéda di prata. Nton Judas kumesa ta djobe manera di ntrega Jizus pa farizeus.