Jesu aarĩ na arata atatũ a hakuhĩ mũno arĩa maaikaraga Bethania. Arata acio maarĩ Lazaro, na aarĩ a nyina erĩ meetagwo Mariamu na Maritha. Mũthenya ũmwe rĩrĩa Jesu aarĩ mũrĩmo ũcio ũngĩ wa Jorodani, Mariamu na Maritha nĩ maamũtũmĩire ndũmĩrĩri ya na ihenya yoigaga ũũ: ‘Lazaro nĩ mũrũaru mũno. Twagũthaitha ũke na ihenya!’ No Jesu ndaathire o hĩndĩ ĩyo. Nĩ eetereire thikũ ingĩ igĩrĩ agĩcoka akĩra arutwo ake ũũ: ‘Nĩ tũthiĩi Bethania. Lazaro nĩ akomete na nĩ ngũthiĩ kũmũũkĩria.’ Nao arutwo ake makĩmwĩra: ‘Angĩkorũo Lazaro arĩ toro-rĩ, nĩ ekũigua wega.’ Nĩ ũndũ ũcio Jesu akĩmoimbũrĩra akĩmeera ũũ: ‘Lazaro nĩ akuĩte.’

Rĩrĩa Jesu aakinyire Bethania, aakorire Lazaro aninĩte thikũ inya mbĩrĩra-inĩ. Andũ aingĩ nĩ maathiĩte kũũmĩrĩria Maritha na Mariamu. Rĩrĩa Maritha aaiguire atĩ Jesu nĩ akinya, nĩ aathire kũmũtũnga. Eerire Jesu ũũ: “Mwathani, korũo ũrarĩ gũkũ, mũrũ wa maitũ ndangĩrakuire.” Nake Jesu akĩmwĩra: ‘Mũrũ wa nyũkwa nĩ ekũriũka. Maritha, nĩ wĩtĩkĩtie ũguo?’ Nake akĩmũcokeria: ‘Nĩ njĩtĩkĩtie atĩ nĩ akaariũka hĩndĩ ya iriũkĩro.’ Jesu amwĩrire ũũ: “Nĩ niĩ ũriũkio na nĩ niĩ muoyo.”

Thutha ũcio Maritha nĩ aathiire kũrĩ Mariamu akĩmwĩra: ‘Jesu nĩ oka.’ Mariamu nĩ aateng’erire kũrĩ Jesu, nakĩo kĩrĩndĩ gĩkĩmũrũmĩrĩra. Aathiire akĩgũa magũrũ-inĩ ma Jesu akĩrĩraga na akĩmwĩra: ‘Mwathani korũo ũraarĩ gũkũ, mũrũ wa maitũ angĩrĩ o muoyo.’ Jesu ona ũrĩa Mariamu aanyarirĩkaga, o nake aambĩrĩirie kũrĩra. Rĩrĩa kĩrĩndĩ kĩonire akĩrĩra kĩoigire ũũ: ‘Ta rora ũrĩa Jesu arendete Lazaro.’ No andũ amwe makĩambĩrĩria kũũria: ‘Araagire kũhonokia mũratawe nĩkĩ?’ Nĩ ũndũ ũrĩkũ Jesu angĩacokire gwĩka?

Jesu nĩ aathiire mbĩrĩra-inĩ, na yahingĩtwo na ihiga inene. Oigire ũũ: ‘Eheriai ihiga.’ Nake Maritha akĩmwĩra: ‘Nĩ aninĩte thikũ inya! Rĩu nĩ aranunga.’ O na kũrĩ ũguo nĩ meeheririe ihiga, na Jesu akĩhoya ũũ: ‘Awa, nĩ ndagũcokeria ngatho nĩ ũndũ wa kũnjigua. Nĩ njũĩ atĩ hĩndĩ ciothe nĩ ũnjiguaga, no ndĩranĩrĩra nĩguo  andũ aya mamenye atĩ wee nĩwe wandũmire.’ Thutha ũcio, Jesu nĩ aanĩrĩire na mũgambo mũnene akiuga: “Lazaro, uma!” Nĩ gwekĩkire ũndũ wa kũgegania: Lazaro oimire mbĩrĩra-inĩ, arĩ o muohe na mataama. Nake Jesu akiuga: “Muohorei na mũreke athiĩ.”

Andũ aingĩ arĩa monire maũndũ macio nĩ meetĩkirie Jesu. No andũ amwe nĩ maathiire makĩra Afarisai ũhoro ũcio. Kuuma hĩndĩ ĩyo, Afarisai nĩ meendaga kũũraga Jesu na Lazaro. Ũmwe wa atũmwo arĩa 12 a Jesu wetagwo Judasi Mũisikariota, nĩ aathiire kũrĩ Afarisai na hitho akĩmoria ũũ: ‘Mũkũhe mbeca cigana ndamũteithia kũmenya kũrĩa Jesu arĩ?’ Maamwĩrire mekũmũrĩha thendi 30 cia betha, nake Judasi akĩambĩrĩria gwetha mweke wa kũneana Jesu harĩ Afarisai.