Jizɔs bin gɛt tri tayt padi dɛn we bin de liv na Bɛtani. Dɛn na bin Lazarɔs ɛn in tu sista dɛn, we na Meri ɛn Mata. Wan de we Jizɔs de na di ɔda pat na di Jɔdan, Meri ɛn Mata sɛn ɔjɛnt mɛsej to Jizɔs se: ‘Lazarɔs sik bad bad wan. Duya kam wantɛm wantɛm!’ Bɔt Jizɔs nɔ bin go wantɛm wantɛm. I wet fɔ tu dez, dɔn i tɛl in disaypul dɛn se: ‘Lɛ wi go na Bɛtani. Lazarɔs de slip, ɛn a de go de fɔ go wek am.’ Di apɔsul dɛn tɔk se: ‘If Lazarɔs de slip, dat go ɛp am fɔ mek i wɛl.’ So Jizɔs tɛl dɛn klia wan se: ‘Lazarɔs dɔn day.’

We Jizɔs rich na Bɛtani, i bin dɔn pas 4 dez we dɛn bɛr Lazarɔs. Bɔku bɔku pipul dɛn bin dɔn kam fɔ ɛnkɔrej Meri ɛn Mata. We Mata yɛri se Jizɔs dɔn kam, i rɔn fɔ go mit am. Mata tɔk se: “Masta, if yu bin de na ya, mi brɔda nɔ bin fɔ day.” Jizɔs tɛl am se: ‘Yu brɔda go gɛt layf bak. Yu biliv dis, Mata?’ Mata tɔk se: ‘A biliv se i go gɛt layf di tɛm we di wan dɛn we dɔn day go gɛt layf bak.’ Jizɔs tɛl am se: “Na mi de gi layf bak ɛn na mi na di layf.”

Dɔn Mata go to Meri ɛn tɛl am se: ‘Jizɔs dɔn kam.’ Meri rɔn go mit Jizɔs ɛn di pipul dɛn fala am. I fɔdɔm na Jizɔs in fut, ɛn i nɔ ebul fɔ stɔp fɔ kray. Meri tɔk se: ‘Masta, if yu bin de na ya, wi brɔda nɔ bin fɔ day!’ Jizɔs bin si di kayn we aw Meri de sɔfa ɛn insɛf bigin fɔ kray. We di pipul dɛn si Jizɔs de kray, dɛn tɔk se: ‘Jizɔs rili lɛk Lazarɔs.’ Bɔt sɔm pan dɛn wɔnda se: ‘Wetin mek i nɔ sev in padi?’ Wetin Jizɔs go du afta dat?

Jizɔs go na di grev ɛn wan big ston bin de na di domɔt usay dɛn bɛr Lazarɔs. I tɛl dɛn se: ‘Una pul di ston kɔmɔt.’ Mata tɔk se: ‘Bɔt i dɔn tek 4 dez! In bɔdi go de smɛl naw.’ Bɔt stil, dɛn pul di ston kɔmɔt ɛn Jizɔs pre se: ‘Papa, tɛnki we yu de yɛri mi we a pre to yu. A no se yu kin yɛri mi ɔltɛm, bɔt a de tɔk lawd  wan bikɔs a want mek dɛn pipul dɛn ya no se na yu sɛn mi.’ Dɔn i ala lawd wan se: “Lazarɔs, kam na do!” Wan wɔndaful tin apin: Lazarɔs kɔmɔt insay di grev, ɛn i bin stil gɛt di klos we dɛn rap am wit. Jizɔs tɔk se: ‘Una lus am mek i go.’

Bɔku pipul dɛn we bin si dis tin we apin bin put fet pan Jizɔs. Bɔt sɔm pan dɛn bin go tɛl di Faresi dɛn. Frɔm da tɛm de, di Faresi dɛn bin want fɔ kil Jizɔs ɛn Lazarɔs. Wan pan in 12 apɔsul dɛn we nem Judas Iskariɔt bin go mit di Faresi dɛn sikrit wan ɛn aks dɛn se: ‘Ɔmɔs una go pe mi if a ɛp una fɛn Jizɔs?’ Dɛn gri fɔ pe Judas 30 silva mɔni, ɛn frɔm da tɛm de Judas bigin fɔ luk fɔ we fɔ gi Jizɔs to di Faresi dɛn.