တၢ်မၤလိ ၈၆
ယ့ၣ်ၡူးမၤသမူထီၣ်စီၤလါစရူး
လၢဝ့ၢ်ဘ့ၤသနံအပူၤန့ၣ် ယ့ၣ်ၡူးအတံၤသကိးလၢအရ့ဝဲ ဘူးဘူးတံၢ်တံၢ်န့ၣ်အိၣ်ဝဲသၢဂၤလီၤ. အဝဲသ့ၣ်အမံၤမ့ၢ်ဝဲ စီၤလါစရူး, နီၢ်မၤရံဒီးနီၢ်မၢ်သၤလီၤ. ဘၣ်တနံၤ ဖဲယ့ၣ်ၡူးအိၣ်လၢထံကျိယၢ်ဒ့ၣ်ဝၢ်ဘးခီန့ၣ် နီၢ်မၤရံဒီးနီၢ်မၢ်သၤ ဆှၢတၢ်ကစီၣ်လၢယ့ၣ်ၡူးအအိၣ်လၢ– ‘စီၤလါစရူးဆိးက့နးမး, ဝံသးစူၤဟဲမ့ၢ်ချ့.’ ဘၣ်ဆၣ် ယ့ၣ်ၡူးတဟဲဝဲတဘျီဃီဘၣ်. ယ့ၣ်ၡူးအိၣ်ခိးဒံးဝဲခံသီလီၤ. ဝံၤဒီး ယ့ၣ်ၡူးတဲဘၣ်အပျဲၢ်အဘီၣ်တဖၣ်လၢ– ‘စီၤလါစရူးမံဘၣ်အသးလံ, ပကလဲၤလၢဝ့ၢ်ဘ့ၤသနံ ဒီးယကကိးပၢၢ်ထီၣ်အီၤ.’ တၢ်မၢဖိတဖၣ်တဲဘၣ်အီၤလၢ– ‘စီၤလါစရူးမ့ၢ်မံဘၣ်အသးန့ၣ် ကကိညၢ်လီၤဝဲလီၤ.’ လၢတၢ်န့ၣ်အဃိ ယ့ၣ်ၡူးတဲဘၣ်အဝဲသ့ၣ်လိၤလိၤလၢ– ‘စီၤလါစရူးသံလံ.’
ဖဲယ့ၣ်ၡူးလဲၤတုၤလၢ ဝ့ၢ်ဘ့ၤသနံအခါ စီၤလါစရူးဘၣ်တၢ် ပာ်လီၤအီၤလၢ တၢ်သွၣ်ခိၣ်အပူၤအိၣ်ဝဲလွံၢ်သီလံ. ပှၤဂီၢ်မုၢ်တဖၣ်ဟဲလၢ နီၢ်မၤရံဒီးနီၢ်မၢ်သၤအအိၣ်ဒ်သိး ကမၤမုာ်ထီၣ်အဝဲသ့ၣ်အသးအဂီၢ်လီၤ. ခီဖျိလၢ နီၢ်မၢ်သၤနၢ်ဟူလၢ ယ့ၣ်ၡူးဟဲလံအဃိ အဝဲကရီလဲၤထံၣ်လိာ်အသးဒီးအီၤလီၤ. နီၢ်မၢ်သၤတဲဘၣ်အီၤလၢ– “ကစၢ်ဧၢ, နမ့ၢ်အိၣ်တ့ၢ်ဖဲအံၤဒီး, ယဒီပုၢ်ဝဲၢ်ခွါတသံဘၣ်.” ယ့ၣ်ၡူးတဲဘၣ်အီၤလၢ– ‘နဒီပုၢ်ဝဲၢ်ခွါကဂဲၤဆၢထၢၣ်က့ၤလီၤ. မ့ၢ်နနာ်စ့ၢ်ကီးဧါ.’ နီၢ်မၢ်သၤတဲဘၣ်အီၤ– ‘ယနာ်လၢ လၢခံန့ၣ်အဝဲကဂဲၤဆၢထၢၣ်သမူထီၣ်က့ၤဝဲလီၤ.’ ယ့ၣ်ၡူးတဲဘၣ်အီၤလၢ– “ယဲဒၣ်အံၤယမ့ၢ် တၢ်ဂဲၤဆၢထၢၣ်က့ၤဒီးတၢ်မူလီၤ.”
ဝံၤဒီးနီၢ်မၢ်သၤလဲၤလၢ နီၢ်မၤရံအအိၣ်ဒီး တဲဝဲလၢ– ‘ယ့ၣ်ၡူးဟဲတုၤလံ.’ ဒီးနီၢ်မၤရံလဲၤဃ့ၢ်ဆူယ့ၣ်ၡူးအအိၣ် ဒီးပှၤဂီၢ်မုၢ်တဖၣ်ပိာ်ထီၣ်အခံလီၤ. နီၢ်မၤရံချံးလီၤအခီၣ်လၢ ယ့ၣ်ၡူးအမဲာ်ညါ ဒီးဟီၣ်ဝဲသပှၢ်ကတၢၢ်လီၤ. နီၢ်မၤရံတဲဘၣ်ယ့ၣ်ၡူးလၢ– ‘ကစၢ်ဧၢ, နမ့ၢ်အိၣ်ဖဲအံၤန့ၣ် ပဒီပုၢ်ဝဲၢ်ခွါ တဘၣ်နီမံၤဘၣ်.’ ယ့ၣ်ၡူးထံၣ်ဝဲလၢ နီၢ်မၤရံသးဘၣ်ဒိဒိၣ်မးအဃိ ယ့ၣ်ၡူးဟီၣ်ဝဲစ့ၢ်ကီးလီၤ. ဖဲပှၤဂီၢ်မုၢ်တဖၣ်ထံၣ်ဝဲလၢ ယ့ၣ်ၡူးအမဲာ်ထံလီၤအခါ အဝဲသ့ၣ်တဲဝဲလၢ– ‘ယ့ၣ်ၡူးအဲၣ်စီၤလါစရူးဒိၣ်မးလီၤ.’ ဘၣ်ဆၣ် ပှၤတနီၤနီၤန့ၣ်ဆိကမိၣ်ဝဲလၢ– ‘ဘၣ်မနုၤအဃိ ယ့ၣ်ၡူးတမၤစၢၤဝဲအသကိးလဲၣ်.’ တဘျီအံၤ ယ့ၣ်ၡူးကမၤဝဲဒ်လဲၣ်.
ယ့ၣ်ၡူးလဲၤဝဲဆူတၢ်သွၣ်ခိၣ်လီၤ. တၢ်သွၣ်ခိၣ်အခိၣ်ထိးန့ၣ် ပှၤကးတံာ်ဃာ်အီၤလၢ လၢၢ်ဖးဒိၣ်တဖျၢၣ်လီၤ. ယ့ၣ်ၡူးတဲဝဲလၢ– ‘သုးကွံာ်လၢၢ်တက့ၢ်.’ ဘၣ်ဆၣ် နီၢ်မၢ်သၤတဲဝဲလၢ– ‘အဝဲသံအိၣ်ဝဲလွံၢ်သီလံ. အစိၣ်ကနၢအုၣ်လံဧါသၢၣ်.’ ဒီးပှၤသ့ၣ်တဖၣ်န့ၣ် သုးကွံာ်ဝဲလၢၢ်ဒီး ယ့ၣ်ၡူးဃ့ဘါထုကဖၣ်တၢ်လၢ– ‘ပၢ်ဧၢ, နဒိကနၣ်ယၤအဃိ တၢ်ဘျုးဒိၣ်မးလီၤ. ယသ့ၣ်ညါလၢနဒိကနၣ် ယကလုၢ်ထီဘိလီၤ. ဘၣ်ဆၣ် ယကိးထီၣ်နၤလၢ ယကလုၢ်ဖးဒိၣ်ဒ်သိး ပှၤဂီၢ်မုၢ်တဖၣ်အံၤကသ့ၣ်ညါလၢ နဆှၢလီၤယၤန့ၣ်လီၤ.’ ဝံၤဒီး ယ့ၣ်ၡူးကိးထီၣ်လၢအကလုၢ်ဖးဒိၣ်လၢ– “စီၤလါစရူးဧၢ, ဟဲက့ၤထီၣ်တက့ၢ်.” ဖဲစီၤလါစရူးဟဲက့ၤထီၣ်လၢ တၢ်သွၣ်ခိၣ်အအိပူၤအခါန့ၣ် ပှၤအိၣ်ဖဲန့ၣ်တဖၣ် ကမၢကမၣ်ဝဲဒိၣ်မးလီၤ. စီၤလါစရူးအမိၢ်ပှၢ်ဘိၣ်ဃာ်အသးဒီး တၢ်ကံးညာ်အဃိ ယ့ၣ်ၡူးတဲဝဲလၢ– “ဃ့ၣ်လီၤကွံာ်အီၤ, ဒီးပျၢ်ကွံာ်အီၤတက့ၢ်.”
ပှၤအါဂၤထံၣ်ဘၣ်ဝဲယ့ၣ်ၡူး မၤတၢ်လီၤလးအံၤအဃိ အဝဲသ့ၣ်စူၢ်က့ၤနာ်က့ၤအီၤလီၤ. ဘၣ်ဆၣ် ပှၤတနီၤန့ၣ်လဲၤတဲဘၣ်ဝဲ ပှၤဖၤရံၤၡဲတဖၣ်လၢတၢ်ဂ့ၢ်အံၤလီၤ. အဃိ စးထီၣ်လၢ မုၢ်နံၤအဝဲန့ၣ်န့ၣ် ပှၤဖၤရံၤၡဲတဖၣ်အဲၣ်ဒိးမၤသံ ယ့ၣ်ၡူးဒီးစီၤလါစရူးလီၤ. တၢ်မၢဖိတဂၤ လၢအမ့ၢ်စီၤယူဒၤအံၣ်စကၤရံၤအိာ် လဲၤထံၣ်ခူသူၣ်လိာ်အသးဒီး ပှၤဖၤရံၤၡဲတဖၣ်လီၤ. စီၤယူဒၤသံကွၢ် ပှၤဖၤရံၤၡဲတဖၣ်လၢ– ‘ယမ့ၢ်မၤစၢၤနၤဒ်သိး နဖီၣ်ယ့ၣ်ၡူးကန့ၢ်အဂီၢ်န့ၣ် နကဟ့ၣ်ယၤစ့ထဲလဲၣ်.’ ပှၤဖၤရံၤၡဲတဖၣ်အၢၣ်လီၤဝဲလၢ ကဟ့ၣ်လီၤအီၤစ့အဘ့ၣ် ၃၀ လီၤ. ဒီးစီၤယူဒၤအံၣ်စကၤရံၤအိာ် ဃုဝဲတၢ်ခွဲးတၢ်ယာ်လၢ ကဟ့ၣ်လီၤယ့ၣ်ၡူးလၢ ပှၤဖၤရံၤၡဲ အစုပူၤလီၤ.
“ပကစၢ်ယွၤန့ၣ် မ့ၢ်ကစၢ်ယွၤလၢ အအုၣ်က့ၤခီၣ်က့ၤတၢ်လီၤ. အဝဲမ့ၢ်ယွၤ, ပယွၤ ပှၤလၢအအုၣ်က့ၤခီၣ်က့ၤပှၤလၢ တၢ်သံန့ၣ်လီၤ.”—စံးထီၣ်ပတြၢၤ ၆၈:၂၀, ခ့ခါစှီၤကျိာ်
တၢ်ဂ့ၤအဂၤလၢ နကဘၣ်သး
ကွၢ်လိမၤဒိးအဝဲသ့ၣ်အတၢ်နာ်
နီၢ်မၢ်သၤ—“ယနာ်လီၤ”
ဖဲနီၢ်မၢ်သၤပှဲၤဒီး တၢ်သူၣ်အုးသးအုးအခါဒၣ်လဲာ် အဝဲပာ်ဖျါထီၣ်ဝဲတၢ်နာ်ဒ်လဲၣ်.
