Jesu naanani balikani babatuna babalaalu bane bapila mwa Betania. Neli Lazaro ni likaizeli zahae bababeli, ili bo Maria ni Mareta. Zazi leliñwi, Jesu hanaali mwa buse bobuñwi bwa Jordani, Maria ni Mareta baluma mutu kuyo mubulelela taba ya ka putako, kuli: ‘Lazaro ukula hahulu. Lwakupa utahe kapili-pili!’ Kono Jesu naasikaya honafo feela. Naalibelezi ka mazazi amabeli, hasamulaho abulelela balutiwa bahae kuli: ‘Haluyeñi kwa Betania. Lazaro ulobezi, naya niyo muzusa.’ Baapositola kihaa bali: ‘Haiba Lazaro ulobezi, ukaiketa.’ Kacwalo, Jesu ababulelela ka kunonga ali: ‘Lazaro ushwile.’

Jesu hanaafitile kwa Betania, Lazaro naasali mwa libita ka mazazi amane. Batu babañata nebatile kuto omba-omba Mareta ni Maria. Mareta hanaautwile kuli Jesu utile, amumbatoka. Abulela ali: “Mulena, kambe neuli teñi kwanu, kambe kaizelaaka hasika shwa.” Jesu kihaa li ku yena: ‘Kaizelaa hao ukapila hape. Kana walumela taba yeo Mareta?’ Aalaba ali: ‘Nalumela kuli ukazuha ka nako ya zuho ya bafu.’ Jesu ali ku yena: “Ki na zuho ni bupilo.”

Cwale Mareta aya ku Maria ni kuyo mubulelela kuli: ‘Jesu utile.’ Maria amatela ku Jesu mi batu babañata bamulatelela. Awela kwa mahutu a Jesu, mi azwelapili kulila. Abulela ali: ‘Mulena, kambe neuli teñi kwanu, kambe kaizelaa luna hasika shwa!’ Jesu habona mwaikutwela Maria, ni yena akala kulila. Batu babañata hane bamuboni inze alotisa miyoko, babulela bali: ‘Hamubone Jesu mwanaalatela Lazaro.’ Kono babañwi bali: ‘Ki kabakalañi hasika pilisa mulikanaa hae?’ Ki lika mañi zanaaka eza Jesu hamulaho wa fo?

Jesu aya kwa libita, kone kulimbilwe licwe lelituna. Alaela kuli: ‘Hamuzwise licwe.’ Mareta ali ku yena: ‘Kono sekufitile mazazi amane! Mubili wahae ukanunka.’ Nihakulicwalo, bazwisa licwe, mi Jesu alapela kuli: ‘Ndate, naitumela ku wena kakuli uniutwile. Naziba kuli waniutwanga kamita, kono nibulela ka kuhuwa ilikuli batu ba, bazibe kuli ki wena yanilumile.’ Cwale ahuwa ka linzwi lelituna ali: “Lazaro,  zwa mo!” Kwaezahala nto yemakaza: Lazaro azwa mwa libita, inze atatilwe masila a line. Jesu kihaa li: “Hamu mutatulule mi mumulisele azamaye.”

Batu babañata bane baboni taba yeo balumela ku Jesu. Kono babañwi baya kuyo taluseza Bafalisi ka za taba yeo. Kuzwa feela ka nako yeo, Bafalisi babata kubulaya Lazaro ni Jesu. Yomuñwi wa Baapositola ba 12, ili Judasi Isikariota, akunduluka mi aya kwa Bafalisi ni kuyo babuza kuli: ‘Muka nilifa bukai haiba nimitusa kufumana Jesu?’ Balumelelana kumulifa lishekele za silivera ze 30, mi Judasi akalisa kubata kolo ya kuisa Jesu kwa Bafalisi.