Yezu uvua ne balunda bende ba pa muoyo basatu bavua basombele mu Betania. Kuvua Lazalo ne bana babu ba bakaji babidi, Mariya ne Mâta. Dituku dikuabu pavua Yezu dia muamua dia Yadene, Mariya ne Mâta bakamutumina mukenji wa lukasa lukasa bamba ne: ‘Lazalo udi usama bikole. Luaku koku lukasa!’ Kadi Yezu kakaya diakamue to. Wakindila matuku makuabu abidi, pashishe kuambilaye bayidi bende ne: ‘Tuyayi ku Betania. Lazalo mmulale; ndi nya bua kumubisha.’ Bapostolo bakamba ne: ‘Bu mudi Lazalo mulale, nebimuambuluishe bua kumvuaye bimpe.’ Ke Yezu kubambila patoke ne: ‘Lazalo mmufue.’

Pakafika Yezu ku Betania, bakavua bajiike Lazalo kukavua matuku anayi. Misumba ya bantu ivua milue bua kusamba Mâta ne Mariya. Pakumvua Mâta ne: Yezu mmulue, wakaya lubilu bua kusambakena nende. Yeye kumuambila ne: “Mukalenge, bu wewe muikalapu, muanetu kavua mua kufua to.” Yezu wakamuambila ne: ‘Muanenu neabike. Mâta, udi witabuja bualu ebu anyi?’ Yeye kuamba ne: ‘Ndi ngitabuja ne: neajuke ku dibishibua dia bantu ku lufu.’ Yezu wakamuambila ne: “Meme ndi dibishibua ku lufu ne muoyo.”

Pashishe Mâta wakaya kudi Mariya, kumuambilaye ne: ‘Yezu mmulue.’ Mariya wakaya kudi Yezu lubilu, ne musumba wa bantu wakalonda. Mariya wakadiela ku makasa ende, udila anu kudila. Yeye kuamba ne: ‘Mukalenge, bu wewe muikalapu, muanetu uvua mua kuikala utshidi ne muoyo!’ Yezu wakamona muvua Mariya ukenga ne muoyo wa munda, yeye kutuadija pende kudila. Pavua bantu bamone binsonji biende, bakamba ne: ‘Bushuwa, Yezu uvua munange Lazalo bikole.’ Kadi bamue bantu bavua badiebeja ne: ‘Bua tshinyi kavua muenze bua mulunda wende eu kafu?’ Yezu wakenza tshinyi pashishe?

Yezu wakaya ku lukita kuvuabu bajike dibue dinene ku mushiku. Wakatuma dîyi wamba ne: ‘Umbushayi dibue edi.’ Mâta wakamba ne: ‘Kadi si ukadi muenze matuku anayi! Mubidi wende newununke.’ Nansha nanku bakumbusha dibue adi, Yezu kuenzaye disambila wamba ne: ‘Tatu, ndi nkuela tuasakidila muudi unteleja. Ndi mumanye ne: utu anu unteleja, kadi ndi ngakula ne dîyi dikole bua bantu badi muaba eu bamanye ne: wewe ke udi muntume.’ Pashishe wakela dîyi dikole wamba  ne: “Lazalo, patuka!” Bualu bua dikema buakenzeka: Lazalo wakapatuka mu lukita muikale anu ne bilamba bia line bimujingile. Yezu wakamba ne: “Mukutululayi, numulekele aye.”

Bantu ba bungi bavua bamone bualu ebu bakitabuja Yezu. Kadi bakuabu bakaya kuambila Bafalese. Kubangila anu dîba adi, Bafalese bakavua bakeba kushipa Lazalo ne Yezu. Yudasa Isakaliote, umue wa ku bapostolo 12, wakaya kudi Bafalese mu musokoko, kubebejaye ne: ‘Meme munuambuluishe bua kupeta Yezu nenumpeshe makuta bungi kayi?’ Bakumvuangana bua kumupesha bitupa bia arjan 30, pashishe Yudasa wakatuadija kukeba mpunga wa kufila Yezu kudi Bafalese.