Yesu wakweti ya cuza yatatu apalamisye aikalanga umu Betaniya. Yaali a Lazalo na yakaci yakwe yaili, Maliya na Malita. Uwanda umwi, ala Yesu ali uku mbalama yuze yakwe Yodani, Maliya na Malita yatumile umwi uwakuyaneena Yesu ati: ‘Lazalo u mulwale sana. Twapaapata uwize zuwa.’ Nomba Yesu ataileko lilyo kwene. Walolezileko amanda yaili nga aneena asambi yakwe ati: ‘Twapiteni uku Betaniya. Lazalo watalaala nupya nimaya nkamuzyule.’ Atumwa nayo yatiile: ‘Ndi cakuti atalaala, cimamwazwa ukuvwako ningo.’ Fwandi lilyo kwene Yesu wayaneenyile ati: ‘Lazalo watafwa.’

Lino Yesu wafisile uku Betaniya, wazanyile yazika Lazalo ala Papita na manda 4. Antu aingi yaile uku kuteekezya Malita na Maliya. Lino Malita uvwile ukuti Yesu wataiza, waile umu kumukomenkanya. Watiile: ‘Mwene, ndi cakuti uya kuno, umwinane nga atafwile.’ Yesu nawe wamuneenyile ati: ‘Umwina wako amaya nu umi. Uzye wataila vivyo, Malita?’ Nawe watiile: ‘Nataila ukuti alaya nu umi nupya, lino kulaya ukutuutuluka.’ Yesu nawe wamuneenyile ati: “Nene kutuutuluka nu umi.”

Malita waile kuli Maliya nu kumuneena ati: ‘Yesu wataiza.’ Maliya wasimwile aya kuli Yesu nupya antu aingi yamulondiile. Nupya waile afukama pa ngazo zyakwe Yesu ala akulila. Watiile: ‘Mwene, ndi cakuti uya kuno, umwina witu nga atafwile.’ Yesu waweni vino waculanga, nupya nawe kwene watandike ukulila. Lino antu yaweni Yesu watandika ukulila yatiile: ‘Lolini vino watemilwe Lazalo.’ Nomba yamwi yelenganyanga yakuti: ‘U mulandu ci uno atapususizye cuza wakwe?’ I vyani vino Yesu wacisile?

Yesu waile ukwi lindi lino yacilikepo iciliwe icikulu pa mulyango. Watiile: ‘Fumyinipo iciliwe.’ Lelo Malita walanzile ati: ‘Ipapita manda 4 pano wafwilile, fwandi umwili wakwe ufwile ukununka.’ Nanti ciye vivyo, yafumizyepo iciliwe, nupya Yesu wapefile ati: ‘Tata, nakutaizya pa kunguvwa. Namanya ukuti lyonsi ukanguvwa,  lelo nkulanda ivintu vii pakuti antu yonsi yaa yamanye ukuti wewe wantuma.’ Lyene wapunzile ni izwi ilikulu ati: “Lazalo, fuma!” Cintu cimwi icakuzungusya cacitike: Lazalo wafumile, ala apomvilwe mu nsalu. Lyene Yesu wayaneenyile ati: “Musapulini pakuti apita.”

Antu aingi aaweni ivyacitike yataile Yesu. Lelo yamwi yaile iyaneena Afaliseo. Kufuma lilya kwene, Afaliseo yalondanga ukukoma Lazalo na Yesu kwene. Wenga pa atumwa yakwe 12 uwi zina ilyakuti Yuda Iskalyoti, waile uku Yafaliseo ukwaula ukuti aliwensi amanye, nu kuyuzya ati: ‘Mumandipila zinga ndi cakuti namwazwa ukulema Yesu?’ Yamuneenyile ukuti yamamupeela impiya 30 zyakwe siuva, fwandi Yuda watandike ukulonda inzila iyakuti angavwilamo Afaliseo ukulema Yesu.