Ear wõr jilu m̦õttan Jesus me ear lukkuun epaake er, im rar jokwe ilo Betani. Rein m̦õttan kar Lazerõs im lim̦aro ruo jein etaer Meri im Marta. Juon raan, ilo iien eo Jesus ear pãd ilo juon bukwõn ilo Perea, Meri im Marta rar kõjjel̦ãiki bwe Lazerõs elukkuun nañinmej im rar kajjitõk ippãn ñe emaroñ m̦õkajtok ñan ippãer. Ak Jesus ear jab kajju m̦õkaj im etal. Ear kõttar ium̦win ruo raan innem ej kab ba ñan rũkal̦oor ro an: ‘Jen etal ñan Betani. Lazerõs ekiki im ij etal bwe in karuji.’ Im rijjilõk ro rar ba: ‘El̦aññe Lazerõs ej kiki, innem enaaj em̦m̦anl̦o̦k an mour.’ Kõn men in, Jesus ear kaalikkar ñan er im ba: ‘Lazerõs emej.’

Ke Jesus ear tõparl̦o̦k Betani, emootl̦o̦k de emãn raan jãn iien eo em̦õj kalibwini Lazerõs. Im elukkuun lõñ armej rar itok bwe ren kaenõm̦m̦an Marta im Meri. Ke Marta ej roñ bwe Jesus emoottok, ear m̦õkajl̦o̦k ñan ippãn im ba: “Irooj, el̦aññe kwaar pãd ijin, jatũ eban kar mej.” Ak Jesus eba ñane: ‘Jatũm̦ enaaj bar mour. Kwõj ke tõmak men in Marta?’ Im Marta ear ba: ‘Ij tõmak bwe enaaj bar mour ilo naaj jerkakpeje eo.’ Innem Jesus ear ba: “Ña jerkakpeje eo im mour eo.”

Marta ear ilo̦k ñan ippãn Meri im ba: ‘Jesus emoottok.’ Kõn men in, Meri ear ettõrl̦o̦k ñan ippãn Jesus, im armej ro rar l̦oorel̦o̦k. Ke ej loe Jesus, ear jubukwe lal̦l̦o̦k iturin neen im lukkuun jañ. Ear ba: “Irooj, el̦aññe kwaar pãd, jatũ enaaj kar mour wõt!” Jesus ear lo bwe elukkuun l̦ap an Meri bũrom̦õj, im ear bareinwõt jino an jañ. Ke aolep armej ro rej lo an jañ, rar ba: ‘Elukkuun l̦ap an yokwe Lazerõs.’ Ak jet rar l̦õmn̦ak im ba: ‘Etke ear jab jipañe l̦ein m̦õttan bwe en jab mej?’ Ta eo Jesus enaaj kõm̦m̦ane kiiõ?

Jesus ear etal ñan lõb eo, ak em̦õj pinej mejãn kõn juon dekã kileplep. Kõn men in, ear ba: ‘Kom̦win iuunil̦o̦k dekã n̦e.’ Ak Marta ear ba: ‘Emootl̦o̦k de emãn raan! Joñan in ewõr bwiin.’ Jekdo̦o̦n ak rar iuunil̦o̦k dekã eo, im Jesus ear jar im ba: ‘Jema, kom̦m̦ool kõn am̦ roñjake ña. Ijel̦ã bwe kwõj roñjake ña aolep iien, ak ij kõl̦l̦aaj ainikiõ bwe armej rein ren maroñ jel̦ã bwe kwaar jilkintok eõ.’ Ãlikin an jar, ear  lam̦õj im ba: “Lazerõs, kwõn diwõjtok!” Im juon men elukkuun kabwilõñlõñ ear wal̦o̦k: Lazerõs ear diwõjtok jãn lõb eo, ak em̦õj kũtimi kõn m̦õttan nuknuk. Im Jesus ear ba: ‘Kom̦win jel̦at nuknuk ko jãne im kõtl̦o̦ke.’

Enañin aolep armej ro rar lo men in, rar likũt aer tõmak ilo Jesus. Ak armej ro jet rar etal im ba ñan Parisi ro. Jino jãn iien in, Parisi ro rar kõn̦aan m̦an Lazerõs im Jesus. Juon iaan rijjilõk ro 12 etan Judas Iskariõt, ear n̦ooje an etal ñan ippãn Parisi ro im ear kajjitõk ippãer im ba: ‘Enaaj jete on̦ããn ami kõl̦l̦ãiki ña ñe inaaj jipañ kom̦ jibwe Jesus?’ Parisi ro rar pepe in kõl̦l̦ãiki kõn 30 jããn in jelba. Kõn men in, Judas ear jino pukot juon iien epel̦l̦o̦k ñan an ketake Jesus ñan ippãn Parisi ro.