Ta̱ Jesús ni̱xi̱yo u̱ni̱ na̱ migora ñuu Betania. Iinra xi̱naní Lázaro, ta ná ku̱ʼvara xi̱naní María xíʼin Marta. Iin ki̱vi̱, ta̱ Jesús íyora chí inka táʼvi tá yu̱ta Jordán, ñá María xíʼin ñá Marta chi̱ndaʼáná iin tu̱ʼun ku̱a̱ʼa̱n nu̱úra: “Ndeéní ndóʼo ta̱ Lázaro. Kama kixiún”. Soo ta̱ Jesús kǒo níxa̱ʼa̱nra mií ki̱vi̱ saá. U̱vi̱ ki̱vi̱ ni̱ya̱ʼa saá ni̱ka̱ʼa̱nra xíʼin na̱ discípulora: “Ná ku̱ʼu̱nyó chí Betania. Chi kísi̱nva ta̱ Lázaro ta ku̱ʼi̱n ka̱ʼi̱n xíʼinra ndako̱ora”. Na̱ apóstol ni̱ka̱ʼa̱nna: “Tá ta̱ kísi̱n kúúra, ndako̱ovara”. Ta ni̱ka̱ʼa̱n ta̱ Jesús: “Ni̱xi̱ʼi̱va ta̱ Lázaro”.

Tá ni̱xa̱a̱ ta̱ Jesús ñuu Betania, xa̱a̱ ku̱mí ki̱vi̱ ni̱ndu̱xu̱n ta̱ Lázaro. Ku̱a̱ʼání na̱ yiví ni̱xa̱a̱na nu̱ú ñá Marta xíʼin ñá María. Ñá Marta na̱kunda̱a̱-iniñá ña̱ ki̱xa̱a̱ ta̱ Jesús ta xínuñá ku̱a̱ʼa̱nñá ka̱ʼa̱nñá xíʼinra. Ta káchiñá: “Táta, tá níxi̱yoún yóʼo, va̱ása kuvi ku̱ʼvandi̱”. Ta̱ Jesús ni̱ka̱ʼa̱nra: “Ndatakuva ku̱ʼvaún. ¿Á kándíxaún yi̱ʼi̱ Marta?”. Ñáyóʼo ni̱ka̱ʼa̱nñá: “Kándíxavai̱ ña̱ ndatakura tá ná ndataku na̱ yiví”. Ta̱ Jesús ni̱ka̱ʼa̱nra: “Yi̱ʼi̱ kúú ta̱ sándátaku ta táxii̱ ña̱ táku na̱ yiví”.

Tasaá ñá Marta ni̱ka̱ʼa̱nñá xíʼin ñá María: “Xa̱a̱ ki̱xa̱a̱ ta̱ Jesús”. Ñá María xínuñá ku̱a̱ʼa̱nñá nda̱a̱ nu̱ú ki̱xa̱a̱ ta̱ Jesús, ta ku̱a̱ʼání na̱ yiví ku̱a̱ʼa̱n xíʼinñá. Tá ni̱xa̱a̱ñá nu̱úra, xi̱kuxítíñá nu̱úra ta xákuñá. Ta ni̱ka̱ʼa̱nñá xíʼinra: “Táta, tá níxi̱yoún yóʼo, va̱ása kuvi ku̱ʼvandi̱”. Ta̱ Jesús xi̱nira xóʼvi̱ní-ini ñá Marta ta nda̱a̱ miíra xa̱ku. Na̱ yiví xi̱nina xa̱ku ta̱ Jesús ta ni̱ka̱ʼa̱nna: “Mií ña̱ ndixa kúú ña̱ xi̱kuʼvi̱ní-inira xi̱xinira ta̱ Lázaro”. Soo savana nda̱kanixi̱nína: “¿Nda̱chun kǒo nísaka̱kura migora?”. ¿Ndáaña keʼé ta̱ Jesús vitin?

Ta̱ Jesús ku̱a̱ʼa̱nra nu̱ú ndíka̱a̱ ta̱ Lázaro ini kavá ta xíʼin iin yu̱u̱ ndási yuʼúña. Ta ni̱ka̱ʼa̱nra: “Sakútaʼandó yu̱u̱”. Ñá Marta ni̱ka̱ʼa̱nñá: “Sana xa̱a̱ xáʼa̱nvara chi xa̱a̱ ku̱mí ki̱vi̱ ni̱xi̱ʼi̱ra”. Ni saá, sa̱kútaʼavana yu̱u̱, ta ni̱ka̱ʼa̱n ta̱ Jesús: “Yivá táxii̱ tixaʼvi ndaʼún chi xíniso̱ʼún ña̱ káʼi̱n. Xíni̱vai̱ ña̱ xíniso̱ʼún ña̱ káʼi̱n, soo  káʼi̱n nu̱ú íyo ku̱a̱ʼá na̱ yiví yóʼo ña̱ ná kunda̱a̱-inina yóʼó kúú ta̱ chi̱ndaʼá yi̱ʼi̱”. Tasaá ni̱ka̱ʼa̱nra: “Lázaro kita”. Iin nda̱kanda̱-inina: Ta̱ Lázaro ki̱tara, ta núʼnira xíʼin ti̱ko̱to̱. Ta̱ Jesús ni̱ka̱ʼa̱nra: “Ndaxíndóra ta taxindó ná ku̱ʼu̱nra”.

Ku̱a̱ʼánína xi̱ni ña̱yóʼo ta ka̱ndíxana ta̱ Jesús, soo savana ni̱xa̱ʼa̱nna na̱túʼunna ña̱yóʼo xíʼin na̱ fariseo. Na̱ fariseo kúni̱na kaʼnína ta̱ Lázaro xíʼin ta̱ Jesús. Ta̱ apóstol Judas Iscariote, ni̱xa̱ʼa̱nra ni̱nda̱ka̱tu̱ʼunra na̱ fariseo: “¿Nda̱saa chaʼvindó yi̱ʼi̱ tá ná chindeé táʼi̱n xíʼinndó ña̱ tiindó ta̱ Jesús?”. Ni̱ka̱ʼa̱nna xíʼinra taxina 30 xu̱ʼún ña̱ plata ndaʼa̱ra, ta̱ Judas ka̱ndíxara ta ndu̱kúra ndáaña keʼéra ña̱ taxira ta̱ Jesús ndaʼa̱na.