ဗေသနိရွာ​မှာ ယေရှုနဲ့ သိပ်​ရင်းနှီးတဲ့ မိတ်ဆွေ​သုံးယောက်​ရှိတယ်။ သူတို့ဟာ မောင်နှမတွေဖြစ်တဲ့ လာဇရု၊ မာရိ​နဲ့ မာ​သ​တို့​ပဲ။ တစ်နေ့၊ ဂျော်ဒန်​မြစ်​တစ်ဖက်​ကမ်း​မှာ ယေရှု ရှိနေတုန်း ဒီ​သတင်းရ​တ​ယ်– ‘လာဇရု အရမ်း​ဖျားနေ​လို့ ကျေးဇူးပြုပြီး အမြန်​ဆုံး​လာ​ပါ’ တဲ့။ ယေရှု ချက်ချင်း​မသွား​ဘဲ နှစ်​ရက်​ကြာ​မှ တပည့်​တွေကို ‘ဗေသနိရွာ​ကို သွား​ကြ​ရ​အောင်။ လာဇရု အိပ်ပျော်​သွား​ပြီ။ သူ့ကို​နှိုး​ဖို့ သွား​ရ​အောင်’ တဲ့။ တမန်တော်​တွေ​က ‘လာဇရု အိပ်ပျော်သွားပြီ​ဆိုတော့ သက်သာ​မှာပါ’ လို့ပြောတယ်။ ဒါနဲ့ ယေရှုက ‘လာဇရု ဆုံးသွား​ပြီ’ လို့ ရိုးရိုးလေး ပြောတယ်။

ဗေသနိရွာ​ကို ယေရှု​ရောက်လာ​ချိန်မှာ လာဇရု​ကို သင်္ဂြိုဟ်​ပြီး​တာ လေး​ရက်ရှိနေပြီ။ ဂျူးအတော်များများ​က မာ​သ​နဲ့​မာရိ​ကို နှစ်သိမ့်​ပေးဖို့ ရောက်​နေကြတယ်။ ယေရှု​ရောက်နေ​မှန်း မာ​သကြား​တဲ့အခါ ချက်ချင်း​သွား​တွေ့​ပြီး “သခင်၊ သခင်​သာ ဒီ​မှာ​ရှိခဲ့​ရင် ကျွန်မ​ရဲ့​မောင် သေမှာမဟုတ်ဘူး” လို့ပြောတယ်။ ယေရှုက ‘ခင်ဗျား​ရဲ့​မောင် အသက်ပြန်ရှင်​လာမယ်။ ယုံသလား’ လို့​မေး​တော့ မာ​သ​က ‘ရှင်ပြန်ထမြောက်​ရာ​ကာလမှာ သူ အသက်ပြန်ရှင်​လာမယ်​ဆိုတာ ကျွန်မ​သိ​ပါတယ်’ လို့ဖြေတယ်။ ယေရှုက ‘ကျွန်တော်ဟာ လူသေ​တွေကို ရှင်ပြန်ထမြောက်​စေ​သူ၊ အသက်​ရစေ​သူ​ပဲ’ လို့ ပြောတယ်။

အဲဒီနောက် မာ​သ​က မာရိ​ဆီ​သွားပြီး ‘ယေရှု​ရောက်လာ​ပြီ’ လို့ ပြောတယ်။ ယေရှုဆီ မာရိ သွားတဲ့​အခါ လူအုပ်​လည်း လိုက်​လာတယ်။ ယေရှု​ခြေရင်း​မှာ မာရိ​ပျပ်ဝပ်ပြီး ငို​နေ​တော့​တ​ယ်။ ပြီးတော့ ‘သခင်​သာ​ရှိရင် ကျွန်မ​မောင် သေ​မှာ​မဟုတ်ဘူး’ လို့ပြောတယ်။ ဝမ်းနည်း​နေတဲ့ မာရိကို ယေရှု​မြင်ပြီး မျက်ရည်ကျ​တ​ယ်။ ယေရှု မျက်ရည်ကျ​တာ​ကို လူအုပ်​မြင်တဲ့အခါ ‘လာဇရု​ကို ယေရှု တော်တော်​ချစ်​တာပဲ’ လို့ ပြော​ကြ​တ​ယ်။ တချို့ကျတော့ ‘သူ့​မိတ်ဆွေ​ကို ဘာ​လို့​မက​ယ်​ပါလိမ့်’ ဆိုပြီး စဉ်းစား​နေကြတယ်။ ယေရှု ဘာ​ဆက်လုပ်​မလဲ။

ကျောက်တုံး​နဲ့ ပိတ်​ထားတဲ့ သင်္ချိုင်းဂူ​ဝ​ကို ယေရှု​ရောက်တဲ့​အခါ ‘ကျောက်တုံး​ကို ဖယ်လိုက်ပါ’ လို့ပြော​တော့ မာ​သ​က ‘သူ​သေ​တာ လေး​ရက်​တောင် ရှိပြီ၊ အခု နံ​နေ​လောက်​ပြီ’ လို့သတိပေးတ​ယ်။ ဒါပေမဲ့​လည်း ကျောက်တုံး​ကို လှိမ့်ဖယ်​လိုက်​ကြ​တ​ယ်။ ဒီ​နောက် ယေရှုက ‘အဖ၊ ကျွန်တော်​ပြောတာကို နားထောင်ပေး​တဲ့​အတွက် ကျေးဇူးတင်ပါတယ်။ ကျွန်တော်​ပြောတာကို အဖ အမြဲ​နားထောင်ပေး​မှန်း သိ​ပါတယ်။ ဒီ​တစ်ကြိမ်​တော့ ကျွန်တော့်ကို အဖစေလွှတ်​လိုက်​မှန်း ဒီလူတွေ သိရ​အောင် အသံ​ကျယ်ကျယ်​နဲ့ ဆုတောင်း​ရတာ​ပါ’ လို့  ပြောပြီး​နောက် ‘လာဇရု၊ ထွက်လာ​ခဲ့’ ဆိုပြီး အကျယ်ကြီး အော်ခေါ်​လိုက်တယ်။ အဲဒီအခါ တကယ်​အံ့သြစရာ မြင်​လိုက်​ကြတယ်။ လာဇရု​ဟာ ဂူ​ထဲကနေ ခြေလက်​တွေ​ရော မျက်နှာမှာပါ အဝတ်​တွေ ပတ်စ​ည်း​လျက်​သား ထွက်လာတယ်။ ယေရှုက ‘သူ​သွား​လို့​ရ​အောင် အဝတ်​တွေ ဖြေ​ပေးလိုက်​ပါ’ လို့ပြောတယ်။

ဒါကို​တွေ့​တဲ့ လူအတော်များများ ယေရှုကို ယုံကြည်လာကြတယ်။ တချို့​က​တော့ အဲဒီ​အကြောင်းကို ဖာရိရှဲ​တွေဆီ သွား​ပြောတယ်။ အဲဒီအချိန်ကစပြီး ဖာရိရှဲ​တွေ​က ယေရှုနဲ့ လာဇရု​ကို သတ်ဖို့ ကြံစည်​ကြ​တ​ယ်။ တမန်တော် ၁၂ ယောက်​ထဲက တစ်ယောက်ဖြစ်တဲ့ ယုဒရှကာရုတ်​က ဖာရိရှဲ​တွေဆီ ခိုးကြောင်ခိုးဝှက်​သွားပြီး ‘ယေရှုကို ခင်ဗျား​တို့​လက်ထဲ​အပ်​ရင် ဘယ်လောက်​ပေး​မလဲ’ ဆိုပြီး​မေးတယ်။ ငွေ​ပြား ၃၀ ပေးမယ်လို့ ကတိ​ပေးတယ်။ အဲဒီ​နေ့​ကစပြီး ယုဒ​ဟာ ယေရှုကို ဖာရိရှဲ​တွေဆီ​အပ်ဖို့ အခွင့်ကောင်း​ရှာ​နေ​တော့​တ​ယ်။