Yesu ua kele na vavusamba vatatu va ha mutima va yoyelele mu Mbetaniya. Va puile Lazalu na vamuanaye Maliya na Mata. Tangua limo, omo Yesu ua kele mu sinia lia Yondau, Maliya na Mata va mu tumine muzimbu ua vuasi-vuasi nguavo: ‘Lazalu ali na ku vavala cikuma. Sukulukambu tuaya kuno vuasi!’ Vunoni Yesu ka ileko haze vene. Ua simbuileko matangua avali, kaha ua lekele vandongesi veni ngueni: ‘Tuyenu ku Mbetaniya. Lazalu na kosa linga nji ka mu hindule.’ Kaha vapostolo va handekele nguavo: ‘Nga Lazalu na kosa, a ka kanguka.’ Vunoni Yesu ua va lekele ngueni: ‘Lazalu na tsi.’

Omo Yesu ua hetele ku Mbetaniya, tele mua hiti matangua auana tunde ha va tsindilile Lazalu. Mbunga ya vantu vezile mu ku lembezieka Mata na Maliya. Vunoni omo Mata ua vuile ngecize Yesu ali na kuiza, ua ile na ku ka liuana neni. Kaha ua handekele ngueni: ‘Muangana, nga ua kele kuno, nga muanetu ka tsile.’ Yesu ua mu lekele ngueni: ‘Muanoko a ka sanguka naua. Ua vi tsiliela evi Mata?’ Kaha Mata ngueni: ‘Nja tsiliela ngecize a ka sanguka ha cisangukilo.’ Yesu ngueni: “Yange cisangukilo na muono.”

Kaha Mata ua ile kuli Maliya na ku mu leka ngueni: ‘Yesu neza.’ Haze vene Maliya ua tuntilile kuli Yesu, kaha na civunga ca vantu ca mu kavele. Ua uile ku viliato vieni, na ku lila. Kaha ngueni: ‘Muangana, nga ua kele kuno, nga muanetu ka tsile!’ Yesu omo ua muene vusiua vua vuile Maliya, neni ua putukile ku lila. Kaha vantu omo va muene Yesu a lila, va handekele nguavo: ‘Talenu, mua mu lemene.’ Vunoni vamo ca va tangele nguavo: ‘Vika kovuelele kavusamba keni?’ Vika Yesu ua lingile?

Yesu ua ile ku mbumbo, ku va fuikile na livue lia kama ku vukovelelo. Ua handekele ngueni: ‘Fumisenuko livue.’ Kaha Mata ngueni: ‘Muangana, a nika; muomu mua hiti matangua auana tunde ha na tsila.’ Vunoni ambe ngoco, va fumisileko livue, kaha Yesu ua vundilile ngueni: ‘Tata, nji ku santsela, muomu u na nji ivu. Kaha nja tantekeya ngecize ove ue ku nji ivua ntsimbu yose: vunoni nji na handekela ha meso a vantu ava linga va tsiliele ngecize yove ua nji  tumine.’ Mu nima ya ku vundila ua tambakanene na lizi lia kama ngueni: “Lazalu, tuhuka!” Kaha vantu va komokele muomu Lazalu ua tuhukile mu mbumbo, oku va na mu zenge vitanga. Ngeci Yesu ngueni: “Mu zitulienu, a ye.”

Cingi ca vantu va vi muene va tsilielele muli Yesu. Vunoni vamo va ile na ku ka lekako vaFaliseo. Tunde haze, vaFaliseo va tondele ku tsiha Yesu na Lazalu. Umo ua vapostolo 12, Yundasa Iskaliota, ua ile mu vusueke ku vaFaliseo na ku va hula ngueni: ‘Cingahi mu nji fueta nga nji mi kuasa ku uana kuali Yesu?’ Kaha va litavele ku mu fueta 30 a vimbongo via palata, ngeci Yundasa ua putukile ku tonda vukovelelo vua ku hana Yesu mu mavoko a vaFaliseo.