CIJIJO 86
Jesu Anomusa Razaro
Jesu wainga no shamwari ndhatu jo phedo jaigara ku Bhetania. Ijona jainga Razaro no hambzaji jake mbiri, Marita na Maria. Njiku imweni, Jesu painga ku divi rimweni ro Jordhani, Maria na Marita vakamutumira masoko ngo kukasika veciti: ‘Razaro arikuhwaja maningi. Tapota kasikai kuviya!’ Asi Jesu azivi kwenda njiku yondhoyo. Pakapera njiku mbiri zve iyena wakati kuno vajiji vake: ‘Ngatende ku Bhetania. Razaro wakavata zve ndiri kwenda komumusa’. Vapostori vake vakati: ‘Kana Razaro wakavata, iyena acamuka.’ Jesu wakavajekesera kuti: ‘Razaro wafa.’
Jesu paakaguma ku Bhetania, Razaro wainga no mazuva marongomuna naafa. Vandhu vakawanda vainga vaviya kookhuza Maria na Marita. Marita paakazwa kuti Jesu wainga waviya, iyena wakagogoma woenda komubata. Iyena wakati: “Tenji, no mainga muri pano, hama yangu aicadepi kufa”. Jesu wakamubvunja kuti: ‘Hama yako inozoponazve. Unozvitenda izvi, Marita?’ Iyena wakati: ‘Ndinotenda kuti iyena anozomuka kumbejiyo.’ Jesu wakati kwaari: “Inini ndini kumuka ko vakafa no uhomi.”
Marita wakaenda kobvunja Maria kuti: ‘Jesu waviya.’ Maria wakagogoma ecienda kuna Jesu zve vazinji vakamutevera. Iyena wakagwadama pa soka jake zve iyena wakacema acikaimi. Iyena wakati: ‘Tenji, kudari mainga muri pano, hama yedu aacaidepi kufa.’ Jesu wakavona kuti Maria waihwajihwa maningi zve wakatangavo kucema. Vazinji pavakavona Jesu ecicema, ivona vakati: ‘Sotanyi Jesu modha waida Razaro.’ Asi vamweni vaizvibvunjisa kuti: ‘Ngenyi aazivi kuponesa shamwari yake?’ Jesu waizoitenyi?
Jesu wakaenda ku guva zve rainga rakafungwa ngo buwe guru. Iyena wakati: ‘Bvisanyi buwe iri.’ Marita wakati: ‘Asi iyena waano njiku murongomuna! Muviri wake wotanga kunuha.’ Asi pikija zvakadaro ivona vakabvisa buwero zve Jesu wakaita mukumbiro eciti: ‘Baba, ndinobonga ngo kundizwa. Ndinozviziva kuti munogara mecindizwa, asi ndazvinanga kuti vandhu ava vatende kuti ndimwi makandituma.’ Iyena wakadaninja ngo izwi guru eciti: “Lázaro, budai kunja!” Pakaitika ciro cinoshamaisa maningi: Razaro wakabuda mu guva wakasungwa. Jesu wakati: “Musunungurenyi, mumuregere apinde.”
Vazinji pavakavona izvo vakatenda Jesu. Asi vamweni vakapinda kobvunja vaFarisi. Kubvira pondhopo, vaFarisi vaida kuuraya Razaro na Jesu. Umwe wo vapostori wo 12, Judha Iskariote, ngo cifise-fise wakaenda ku vaFarisi zve wakavabvunjisa kuti: ‘Munondipa mutongoni ndikamubesa kuti muwane Jesu?’ Ivona vakati tinokupa 30 o siribva zve Judha wakatanga kupsaka mukana wokusungisa Jesu ngo vaFarisi.
“Kudari inga Baba vanomusa vakafa no kuvapa uhomi, ngo maitiro ondhoo Mwana anopavo uhomi avo vaanoda”—Johani 5:21
Zvimweni Zvamungadakarira nga Izvi:
JESU—I GWANJA, I COKWADI NO UPENYU
Razaro Anomuswa
Zviro zviviri zvinoita kuti pikija vavengi va Jesu vakonehwe kuramba kuti wakaitadi mushamaiso uu.
JESU—I GWANJA, I COKWADI NO UPENYU
“Kumuka ko Vakafa no Uhomi”
Jesu waida kurevenyi paakananga kuti vanonditenda ‘avazofi mbhera narini’?
JESU—I GWANJA, I COKWADI NO UPENYU
Iri Kukhwedera Phasika Yokupejisira ya Jesu
Ngenyi zvinodakajisa kuziva kuti vatungamiriri vo zviara vakazwirana kamare kupagari Judha ngo 30 macereni o sirivha kuti atengese Jesu?
