Jesus okwa li e na ookuume kopothingo yatatu, ya li muBetania. Ookuume mboka oya li Lasarus naamwayina yaali, Maria naMarta. Esiku limwe, manga Jesus a li handiya yaJordan, Maria naMarta oye mu tumine elaka lye endelela, tali ti: ‘Lasarus ote ehamenene. Alikana ila mbala!’ Jesus ina ya ko pethimbo mpoka. Okwa tegelele pu pite omasiku gaali, opo ihe okwa lombwele aalongwa ye a ti: ‘Natu yeni kuBetania. Lasarus okwa kotha, ihe ngame onda hala, ndi ye, ndi ke mu pendule.’ Aayapostoli oya ti: ‘Lasarus ngele okwa kotha, shoka otashi ke mu kwathela a aluke.’ Opo nduno, Jesus okwe ya lombwele sha yela a ti: “Lasarus okwa sa.”

Jesus sho a thiki muBetania, okwa adha Lasarus a ninga omasiku gane mombila. Oongundu dhaantu odha adhika dhe ya kuMarta naMaria oku ya hekeleka. Marta sho u uvu kutya Jesus okwe ya, okwa yi mbalambala e ke mu tsakaneke. Okwa ti: “Omuwa, ando owa li po, ando omumwameme ina sa.” Jesus okwa ti: ‘Omumwanyoko ota ka yumuka. Mbela shika owe shi itaala Marta?’ Marta okwa ti: ‘Ondi shi kutya ota ka yumuka, uuna aantu taya ka yumudhwa.’ Jesus okwa ti kuye: “Ongame eyumuko nomwenyo.”

Marta okwa yi kuMaria, e te mu lombwele ta ti: ‘Jesus opo e li mpaka.’ Maria okwa matukile kuJesus, nongundu yaantu oye mu landula. Okwa tsu oongolo poompadhi dhe ta lili, e ta ti kuye: “Omuwa, ando owa li po, ando omumwameme ina sa.” Ano Jesus sho e mu mono ta lili naye okwa tameke okulila. Sho aantu ya mono Jesus ta lili, oya ti: ‘Tala, nkene Jesus a li e hole Lasarus.’ Yamwe oya ti: ‘Oshike inaa hupitha kuume ke?’ Okuza mpono, Jesus okwa ningi po shike?

Jesus okwa yi kombila, ndjoka ya li ye edhilwa nemanya. Opo nduno okwa ti: “Kuthii po emanya!” Marta okwa ti kuye: “Omuwa, okwa nika nokuli, oshoka okwa ningi ngashingeyi omasiku gane a sa.” Aantu oya kutha po emanya. Opo ihe Jesus okwa galikana a ti: “Tate, otandi ku hambelele, ongoye sho ho uvu ndje. Ondi shi shi kutya ngoye oho uvu ndje aluhe, ihe otandi popi oohapu ndhika omolwaantu mbaka ya  kundukidha ndje, opo yi itaale kutya ongoye wa tuma ndje.” Okuza mpono Jesus okwi igidha newi lyopombanda a ti: “Lasarus, za mo!” Lasarus okwa zi mo mombila, a mangwa nomalapi, oshinima shoka sha li tashi kumitha. Jesus okwa ti: “Mu mangululeni, ne mu mu ethe, a ye.”

Oyendji mboka ya mono shoka sha ningwa po, oya tameke okwiitaala muJesus. Yamwe oya yi ya ka lombwele Aafarisayi shoka sha ningwa po. Okuza mpono, Aafarisayi oya kala ya hala okudhipaga Lasarus naJesus. Gumwe gwomaayapostoli 12, edhina lye Judas Iskariot, okwa yi kAafarisayi, e ta ti: ‘Otamu futu ndje ingapi, opo ndi gandje Jesus miikaha yeni?’ Oyu uvathana ye mu fute iimaliwa iisiliveli 30. Opo nduno Judas okwa tameke okukonga ompito a gandje Jesus miikaha yAafarisayi.