Yesu akaba aine banywani be bashatu abaabuzima abaabaire nibatuura omuri Besania. Bakaba bari, Laazaaro na banyaanya babiri, Mariamu na Mariza. Eizooba rimwe, Yesu ku yaabaire ari omu kicweka kya Yorudani, Mariamu na Mariza bakamutumaho ahonaaho nibagira bati: ‘Laazaaro arwaire munonga. Nyabura ’we rahuka!’ Kwonka Yesu tararahukire kuzayo. Akamara ebiro bibiri ahu yaabaire ari, bwanyima akagambira abeegi be ati: ‘Ka tugyende Besania. Laazaaro agwejegyeire; niinza kumusisiimura omu turo.’ Entumwa zikamugira ziti: ‘Ku araabe agwejegyeire, nikiija kumuhwera kuba gye.’ N’ahabw’ekyo Yesu akabagambira butunu ati: ‘Laazaaro afiire.’

Obu Yesu yaahika Besania, Laazaaro akaba amazire ebiro bina omu kituuro. Abantu baingi bakaba baizire kuhuumuriza Mariza na Mariamu. Mariza ku yaahuriire ngu Yesu yaija, akarahuka yaaza kumubugana. Akamugira ati: “Mukama wangye, kuri obaire ori aha, munyaanyazi takufiire.” Yesu akamugira ati: ‘Munyaanyoko naija kugaruka abe ohuriire. Mariza, eki nookikiriza?’ Akamugarukamu ati: “Nimmanya ku arizooka aha kuzooka okw’aha mperu.” Yesu akamugira ati: “Niinye kuzooka n’amagara.”

Bwanyima Mariza akaza kugambira Mariamu ati: ‘Yesu ari aha.’ Mariamu ahonaaho akaimuka yaagyenda ahari Yesu, kandi abantu bakamukuratira. Mariamu akagwa aha bigyere bya Yesu, yaaguma naarira. Akamugira ati: ‘Mukama wangye, kuri obaire ori aha, munyaanyazi kuri ahuriire.’ Yesu akareeba ngu akaba aine obusaasi bwingi, kandi nawe akarira. Abantu ku baareebire Yesu naarira, bakagira bati: “Eshi abaire naamukunda.” Kwonka abamwe bakagira bati: ‘Ahabw’enki atarikuzoora munywani we?’ Mbwenu shi Yesu akakora ki?

Yesu akaza aha kituuro, aha muryango gwakyo hakaba hariho eibaare rihango. Yesu akaragiira ati: “Mwiheho eibaare.” Mariza akagira ati: ‘Kwonka haahingwireho ebiro bina. Hati yaanuukire.’ Kwonka, bakaihaho eibaare, kandi Yesu akashaba ati: ‘Taata, ninkusiima, ahabw’okuba wampurira. Kandi nimmanya ku ompurira obutoosha; kwonka eki naakigamba ahabw’abantu aba abanyehinguririize, ngu  baikirize ku niiwe wantumire.’ Bwanyima akagamba n’eiraka rihango ati: “Laazaaro shohora, oije.” Hakabaho ekintu kirikutangaaza: Laazaaro akashohora yaaruga omu kituuro, azingazingirwe omu myenda. Yesu akabagira ati: “Mumukomorore mumurekye agyende.”

Baingi abaareebire ekyabaireho bakaikiriza Yesu. Kwonka abamwe bakagyenda baagambira Abafarisaayo. Kuruga obwo, Abafarisaayo bakaba nibenda kwita Laazaaro na Yesu. Omwe aha ntumwa za Yesu 12, Yuda Iskaryota, akaza aha Bafarisaayo yaababuuza ati: ‘Nimwija kumpa ki naabahwera kukwata Yesu?’ Bakaikiriza kumuha ebicweka by’efeeza 30, kandi Yuda akatandika kusherura oku araheyo Yesu aha Bafarisaayo.