Ɛnee Gyisɛse lɛ ɔ gɔnwo mɔ nsa mɔɔ bɛde Bɛtani. Bɛmɛ a le Lazalɛse nee ɔ mediema mraalɛ nwiɔ ne, Mɛle nee Maata. Kenle ko bie mɔɔ Gyisɛse wɔ Dwɔdan ne anzi lɔ la, Mɛle nee Maata dole ye nrɛlaleɛ kɛ: ‘Lazalɛse ɛnde kpɔkɛ fee. Yɛsɛlɛ wɔ bɛla ndɛndɛ!’ Noko Gyisɛse angɔ ɛkɛ ne ala. Ɔmaanle ɔlile kenle nwiɔ na akee ɔzele ye ɛdoavolɛma ne kɛ: ‘Bɛmaa yɛhɔ Bɛtani. Lazalɛse ɛlafe na mekɔ ɛkɛ ne meahɔdunwue ye.’ Ɛzoanvolɛma ne hanle kɛ: ‘Saa Lazalɛse ɛlafe a, ɛnee ɔbade kpɔkɛ.’ Akee Gyisɛse zele bɛ wienyi kɛ: ‘Lazalɛse ɛwu.’

Mɔɔ Gyisɛse dwule Bɛtani la, ɛnee bɛzie Lazalɛse na yeli kenle nna. Ɛnee menli dɔɔnwo ɛra kɛ bɛbakyekye Maata nee Mɛle arɛle. Mɔɔ Maata dele kɛ Gyisɛse ɛra la, ɔhɔyiale ye. Ɔhanle kɛ: “Awulae, saa ɛwɔ ɛke a anrɛɛ me diema ne anwu.” Gyisɛse zele ye kɛ: ‘Ɛ diema ne badwazo. Maata, ɛdie ɛhye ɛdi ɔ?’ Ɔhanle kɛ: ‘Medie medi kɛ ɔbadwazo wɔ ewudwazo ne anu.’ Gyisɛse zele ye kɛ: “Mame a mele ewudwazo ne nee ngoane ne a.”

Akee Maata hɔhanle hilele Mɛle kɛ: ‘Gyisɛse ɛra.’ Mɛle nriandile hɔle Gyisɛse anwo ɛkɛ na menli dɔɔnwo doale ye. Ɔdule ɔdɔle ɔ gyakɛ anu na ɔzunle too. Ɔhanle kɛ: ‘Awulae, saa ɛwɔ ɛke a anrɛɛ yɛ diema ne anwu!’ Mɔɔ Gyisɛse nwunle kɛzi ɔlɛdi nyane la, ɔdaye noko ɔzunle. Mɔɔ menli ne nwunle kɛ ɔlɛsu la, bɛhanle kɛ: ‘Nea, amgba ɔkulo Lazalɛse edwɛkɛ kpalɛ!’ Noko bie mɔ hanle kɛ: ‘Duzu ati a yeanlie ɔ gɔnwo ne yeanvi ewule nu ɛ?’ Duzu a Gyisɛse yɛle a?

Gyisɛse hɔle nla ne mɔɔ bɛva bolɛ kpole bɛnyi ɔ nloa la anwo. Ɔhanle kɛ: “Bɛye bolɛ ne.” Maata hanle kɛ: ‘Ɔwule la yeli kenle nna! Kɛkala yebɔ.’ Noko bɛyele bolɛ ne, na Gyisɛse yɛle asɔne kɛ: ‘Egya, meda wɔ ase kɛ wɔdie me a. Meze kɛ dahuu ɛtie me; noko menli ɛhye mɔ ati a melɛka ɛhye a, amaa bɛalie bɛali kɛ ɛdawɔ a ɛzoanle me a.’ Akee ɔdeanle nu kpole kɛ: “Lazalɛse, finde bɛla!” Debie mɔɔ yɛ nwanwane la zile: Lazalɛse vi nla ne anu rale, ɛnee ɛdanlɛ kyekye ɔ nwo. Gyisɛse hanle kɛ: “Bɛzianyizianyi ye bɛmaa ɔhɔ.”

 Menli dɔɔnwo mɔɔ nwunle ɛhye la liele Gyisɛse lile. Noko bie mɔ hɔhanle hilele Falasiima ne. Ɔvi zɔhane mekɛ ne, ɛnee Falasiima ne kpondɛ kɛ bɛku Lazalɛse nee Gyisɛse. Dwudase Yesekaleɔto mɔɔ le ɛzoanvolɛma 12 ne anu ko la hɔle Falasiima ne ɛkɛ na ɔbizale bɛ kɛ: ‘Meye Gyisɛse memaa bɛ a, bɛbamaa me ɛzɛ ɛ?’ Bɛhanle kɛ bɛbamaa ye dwɛtɛ fufule 30, yemɔti Dwudase kpondɛle adenle mɔɔ ɔbalua zo yeaye Gyisɛse yeamaa Falasiima ne la.