Walay taloran sanaagi diad Betania ya kakaaro nen Jesus. Say ngaran da et Lazaro, Maria, tan Marta. Aminsan, nen walad basil na Jordan si Jesus, walay imbaki nen Maria tan Marta ya mangibagad si Jesus: ‘Grabe so sakit nen Lazaro. Komon onla ka dian tampol!’ Balet aglinman tampol si Jesus. Nampalabas ni na duaran agew, insan imbaga tod saray disipulo to: ‘Onla tayod Betania. Naugip si Lazaro, tan onla ak pian bangonen ko.’ Imbaga na saray apostol: ‘No naugip si Lazaro, maong sirin pian onabig.’ Kanian direkta lan imbaga nen Jesus: ‘Inatey lay Lazaro.’

Kasabi nen Jesus diad Betania, apatiran agew la ya niponpon si Lazaro. Dakdakel so linma ya aki-ermen ed si Marta tan Maria. Nen naamtaan nen Marta ya nitan lay Jesus, nanapuran inmabet tan imbaga to: “Katawan, no wadia ka labat, agkomon inatey so agik.” Imbaga nen Jesus ed sikato: ‘Nabilay lamet so agim. Manisia ka, Marta?’ Imbaga nen Marta: ‘Manisia ak ya sikatoy ombangon diad panaon ya paolien iray inaatey.’ Imbaga nen Jesus ed sikato: “Siak so kioli tan say bilay.”

Insan nila nen Marta si Maria tan imbaga to: ‘Wadia lay Jesus.’ Batik si Maria ed si Jesus, tan tinumbok na totoo. Tinmalimukor si Maria ed salian nen Jesus, tan akis lan akis. Imbaga to: ‘Katawan, no wadia ka labat, mabilay ni komon so agik!’ Anengneng nen Jesus ya maer-ermen si Maria, kanian manakis met. Nen anengneng na totoo ya manakis si Jesus, say kuan da: ‘Talagan inar-aro nen Jesus si Lazaro.’ Balet imbaga na arum: ‘Akin et pinaulyan ton ompatey so kaaro to?’ Anto kasi gawaen nen Jesus?

Linmay Jesus diad angiponponan ed si Lazaro, ya asaraan na baleg ya bato. Ingganggan nen Jesus: ‘Ekal yo tay bato.’ Imbaga nen Marta: ‘Balet ambanget la, ta apat agew lan inatey!’ Inekal da nin siansia so bato, insan nampikasi si Jesus: ‘Ama, salamat ta dinengel mo ak. Antak ya lanang mo ak ya dedengelen, balet natan et mansalita ak ya maksil pian naamtaan na sarayan totoo ya imbaki mo ak.’ Insan tinawag nen Jesus si Lazaro, ya inkasil toy boses to: “Lazaro, paway ka!” Walay makapakelaw ya  agawa: Pinmaway si Lazaro, ya apotipotan ni na saray abel. Imbaga nen Jesus: “Ukbaran yo tan paulyan yo.”

Nen anengneng iya na dakel ya totoo, anisia ra ed si Jesus. Balet wala ray linman angibaga ed saray Fariseo. Manlapud saman, labay na saray Fariseo ya pateyen si Lazaro tan si Jesus. Si Judas Iscariote ya sakey ed saray 12 ya apostol et sekreto ya linma ed saray Fariseo tan imbaga tod sikara: ‘Pigaray ibayar yod siak no ibagak ed sikayo so kawalaan nen Jesus?’ Nantotongtongan da ya ikdan day 30 ya piraso na pilak, tan manlapud saman et nananap lay Judas na pagkakataon ya naerel na saray Fariseo si Jesus.