Jesusqa Betaniapi kinsa sumaj amigosniyoj karqa. Paykunataj karqanku Lázaro, hermanasnin María, Marta ima. Jesús Jordán mayu chimpapi kashajtin, Martawan Mariawanqa Jesusman willacherqanku: “Lázaro sinchʼi onqosqa kashan, usqhayllata jamuy”, nispa. Jesustajrí iskay pʼunchaytawanraj qhepakuytawan, yachachisqasninta nerqa: “Jaku Betaniaman. Amigonchej Lazaroqa puñushan, rispa rijchʼarichimusaj”, nispa. Apostolestaj nerqanku: “Señor, puñushallan chayqa, sanoyaponqachá”, nispa. Chantá Jesusqa sutʼita paykunaman nerqa: “Lazaroqa wañupun”, nispa.

Jesús Betaniaman chayananpaj, Lazaroqa tawa diaña pʼampasqa kasharqa. Ashkha runastaj Mariata, Martatawan sonqochaj risqanku. Martaqa Jesús jamushasqanta yachaytawan taripamoj rerqa, nerqataj: “Señor, kaypichus kawaj karqa chayqa, hermanoyqa mana wañupunmanchu karqa”, nispa. Jesustaj nerqa: “Hermanoykeqa kausarinponqa. ¿Chayta creenkichu?”, nispa. Martataj nerqa: “Yachani qhepaman kausarimunanta”, nispa. Jesustaj nerqa: “Noqa kani kausarimuy, kausaytaj”, nispa.

Chantá Martaqa Mariaman nimorqa: “Jesús chamun”, nispa. Mariataj usqhayta taripamoj rerqa, runastaj qhepanta rerqanku. Mariaqa Jesuspa ñaupaqenman qonqoriykukuspa waqarikorqa. Chantá nerqa: “Señor, kaypichus kawaj karqa chayqa, hermanoykoqa kausakushanman karqa”, nispa. Jesusqa María mayta waqasqanta rikuspa waqarikorqa. Runastaj nerqanku: “Chay jinatapuni Lazarotaqa munakusqa”, nispa. Wakintaj nerqanku: “Amigonrayku imallatapis ruwanan karqa ari”, nispa. Kunantaj imatachus Jesús ruwasqanta yachakuna.

Jesusqa Lazaroj sepulturanman rerqa. Chaytaj jatun rumiwan tapasqa kasharqa. Jesustaj nerqa: “Chay rumita tanqaychej”, nispa. Martataj nerqa: “Tawa diaña wañupusqanqa, asnashanñachari”, nispa. Jinapis rumita tanqarqankupuni. Jesustaj mañakorqa: “Tatáy, gracias uyariwasqaykimanta. Yachani uyariwasqaykitapuni, kaytarí  jatunmanta nini kay runas qanpuni kachamuwasqaykita creenankupaj”, nispa. Chantá qhaparerqa: “¡Lázaro! ¡Llojsimuy!”, nispa. Jinallapitaj Lazaroqa telawan maytʼusqa llojsimorqa. Jesustaj nerqa: “Phaskaraychej purinanpaj”, nispa.

Chayta rikuspataj ashkha runas Jesuspi creerqanku. Wakintaj fariseosman chayta willaykamorqanku. Chaymantapachataj fariseosqa yuyaychakorqanku Jesusta, Lazarotawan wañuchinankupaj. 12 apostolesmanta Judas Iscarioteqa, kuraj sacerdotesman pakayllamanta rispa nerqa: “Jesustachus japʼichiykichejman chayqa, ¿imatataj qowankichejman?”, nispa. Paykunataj 30 qolqeta qonankuta nerqanku. Chaymantapacha Judasqa yuyaychakusharqa Jesusta japʼichinanpaj.