Jesuspa kimaq kuyë amïgunkunam Betaniachö täräyaq. Jutinkunaqa karqan Läzaru, Marïa y Martam, y kimanmi pani turi kayaq. Juk kutim Jordan mayupa tsimpanchö Jesus këkaptin juk nuna chärir kënö nirqan: “Marïapa y Martapa turin Läzarum alläpa qeshyëkan. Jinan hörash ëwëkullanki”. Peru Jesusqa manam tsë höratsu ëwarqan. Ishkë junaq shuyärirmi qateqninkunata kënö nirqan: “Aku Betaniata. Porqui Läzarum punïkan. Tsëmi riyatseq ëwëta munä”. Y apostolninkunaqa, “punukashqalla këkarqa kachakärinqachi” niyarqanmi. Tsënam Jesusqa, “Läzaruqa wanushqam” nishpa entienditsirqan.

Jesusqa chusku junaqna Läzaru pamparëkaptinmi Betaniaman chärirqan. Y mëtsika nunakunam Martata y Marïata shoqaq ëwashqa kayänaq. Tsënam Martaqa Jesus chärishqa kanqanta wiyarir, jinan höra taripaq ëwarqan. Y tinkurirmi kënö nirqan: “Teytë, qam këchö kaptikiqa manam turïkuna wanunmantsu karqan”. Peru Jesusqa, “turikiqa kawarimunqam. ¿Tsëta creinkiku Marta?” nirqanmi. Tsënam pëqa, “noqaqa creïmi wanushqakuna kawariyämuptin pëpis kawarimunampaq kaqta” nirqan. Y Jesusqa, “noqam kawaritsikoq y kawëta qokoq kä” nirqanmi.

Tsëpitam Martaqa Marïa këkanqanman ëwarir, “Jesusmi këchöna këkan” nirqan. Tsënam Marïaqa ëqillapa Jesusta taripaq ëwarqan, y nunakunapis qepantam ëwayarqan. Y Jesus këkanqanman chärirmi chakin kaqman qonqurikïkur alläpa waqarqan. Y kënömi nirqan: “Teytë, këchö kaptikiqa turïkuna kawëkanmanmi karqan”. Tsëmi alläpa waqaqta rikar kikin Jesuspis waqar qallëkurqan. Y tsëta rikëkurmi, “alläpachi Läzaruta kuyarqan” nishpa nunakuna parlayarqan. Peru wakinqa, “¿imanirtaq amïgunta salvashqatsu?” niyarqanmi. ¿Y imatataq Jesusqa rurarqan?

Jesusqa Läzarupa ayanta churayanqan machëmanmi ëwarqan. Nïkurmi, “tsaparaq rumita jorqayë” nirqan. Martaqa, “kananyaqqa asyëkannachi, porqui chusku junaqnam pamparan” nirqanmi. Peru jinapam rumita jorqariyarqan. Tsënam Jesusqa kënö mañakurqan: “Teyta, wiyamanqëkipitam agradecikoq. Noqaqa  musyämi imëpis wiyamanqëkita, peru kananqa qam kachamanqëkita nunakuna musyayänampaqmi sinchipa mañakëkämü”. Nïkurmi sinchipa, “¡Läzaru, yarqamï!” nirqan. Y mana creipaqnömi pasakurqan. Ratashkunawan wankushqam Läzaru yarqaramurqan. Tsënam Jesusqa, “purita puëdinampaq ratashninkunata paskariyë” nirqan.

Tsëta rikarmi mëtsikaq nunakuna Jesusman creikur qallëkuyarqan, peru wakinqa fariseukunata willaqmi ëwayarqan. Tsëpita patsëmi fariseukunaqa Läzarutawan Jesusta wanutsiyänampaq yachatsinakuyarqan. Y apostolnin Jüdas Iscariötim pakëllapa ëwëkur fariseukunata kënö tapurqan: “¿Ëkatataq qoyämankiman Jesusta tsariyänëkipaq yanapayapteq?”. Tsënam 30 pläta metal qellëta äniriyarqan. Y Jüdasqa Jesusta rantikunampaqmi alli tiemputa ashirqan.