Lázaro, paipaj panicunapish Betaniapimi causarcacuna. Paicunaca Jesuspaj alli amigocunami carca. Shuj punllaca Jesusca Jordán yacu chꞌimba ladopimi carca. Chaipi cajpimi Martapish Mariapish paipaj turi Lázaro ungushcata huillachun cacharcacuna. Jesusca ishqui punlla qꞌuipami paita catijcunataca, ‘Betaniaman jacuchij. Lazaroca dormicunmi. Paita rijchachinamanmi rigrini’ nirca. Chaimi apostolcunaca, ‘dormicushpaca alliyangallami’ nircacuna. Chashna yuyacujpimi Jesusca, ‘Lazaroca huañushcami’ nirca.

Jesús Betaniaman chayanapajca Lazaroca ñami chuscu punllacunata huañushca carca. Achcacunami Martata, Mariatapish cushichingapaj rishcacuna carca. Jesús chayamushcata uyashpami Martaca callpashpa rirca. Tupashpaca, ‘Jesús, can caipi cashca cajpica ñuca turica mana huañunmanchu carca’ nijpimi paica, ‘cambaj turica causaringami. ¿Chaitaca cringuichu?’ nirca. Chaimi Martaca, ‘causarina punllapi causarinata crinimi’ nirca. Jesusca, ‘ñucami causachijpish, causaiyujpish cani’ nircami.

Qꞌuipaca Martaca Mariapajman rishpami, ‘Jesusca caipimi’ nijpi paipajman callpashpa rirca. Gentecunapish Mariatami catishpa rircacuna. Jesuspajman chayashpaca paipaj ñaupajpi cungurishpami, ‘Jesús, can caipi cashca cajpica ñuca turica mana huañunmanchu carca’ nirca. Chashna nishpa María huacajta ricushpami Jesuspish llaquirishpa huacarca. Chaita ricushpami gentecunaca, ‘Lazarotaca yallitajmari cꞌuyashca’ nircacuna. Pero maijancunaca, ‘¿paipaj amigotaca ima nishpashi mana salvarca?’ nircacunami. ¿Imatataj Jesusca ruragrirca?

Jesusca Lazarota churashca jutcumanmi rirca. Chai jutcu jatun rumihuan huichcashca cajpimi Jesusca, ‘rumita anchuchichij’ nirca. Shina nijpimi Martaca, ‘ñamari chuscu punlla pasashca, ashnacungamari’ nirca. Chai rumita anchuchijpica Jesusca, ‘Yayitu, ñuca mañashcata uyashcamanta pagui ninimi. Can uyaracuj cashcataca yachanimi. Pero can ñucata cachashcata gentecuna crichunmi chashna nini’ nircami. Qꞌuipaca, ‘¡Lázaro, chaimanta  llujshimui!’ nishpami sinchita caparirca. Chashna nijpimi Lazaroca linsohuan pilluchishca llujshimurca. Jesusca, ‘pilluchishcacunata pascaichij, purichun’ nircami.

Chaita ricushpami achcacunaca Jesuspi crircacuna. Pero maijancunaca Jesús imalla rurashcatami fariseocunaman huillagrirca. Chai punllamantami fariseocunaca Jesustapish Lazarotapish huañuchinata yuyarinacurcacuna. 12 apostolcunamantaca Judas Iscariotemi pacalla rishpa fariseocunataca, ‘Jesusta entregajpica ¿imatataj cusha ninguichij?’ nijpi paicunaca, ‘quimsa chunga cullquitami cushun’ nircacuna. Chaimi Judasca Jesusta ima shina entreganata yuyaricurca.