Jesuspa kinsa amigonkunan Betania llaqtapi tiyaranku. Paykunan karanku Lázaro, Marta, Mariapiwan. Juj p’unchaymi Jesús Jordán mayuq chimpanpi kashaqtin Lazaroq hermanankunaqa juj willakuyta apachimuranku: “Lazaron sinchi onqosqa kashan, usqhaylla jamuy”, nispa. Jesusmi ichaqa mana usqhaychu riran, aswanmi iskay p’unchaytawan qhepakuspa discipulonkunata niran: “Jaku Betaniata, Lazaron puñushan, paytan rijch’achimusaq”, nispa. Apostolkunataq niranku: “Puñushantaq chayqa, qhaliyanqachá”, nispa. Chaymi Jesusqa sut’inta niran: “Lazaroqa wañupunmi”, nispa.

Jesús Betaniaman chayaqtinqa, tawa p’unchayñan Lazaroqa wañusqa kasharan. Askha runan Martata Mariatapas consolaq riranku. Martan uyarisqa Jesuspa jamusqanta, jinan payman aypaspa niran: “Señor, kaypi kawaq karan chayqa, hermanoyqa manachá wañunmanchu karan”, nispa. Jesustaq niran: “Hermanoykiqa kausarimpunqan, ¿creewankichu?”, nispa. Paytaq niran: “Yachanin kausarimpuy p’unchaypi kausarimpunanta”, nispa. Jesustaq niran: “Noqan kausarimpuypas kausaypas kani”, nispa.

Jinan Martaqa Mariaman willaq riran: “Jesusmi kaypi kashan”, nispa. Chaymi Mariaqa Jesuspa kasqanman phawaran, runakunapas qatikurankun. Chayaspataq pampakama k’umuykuspa, waqaykuspa niran: “Señor kaypi kawaq karan chayqa, hermanoyqa manan wañunmanchu karan”, nispa. Jesusqa rikuranmi sonqo nanayta waqashasqanta, jinan paypas waqaran. Chayta rikuspan runakunaqa niranku: “Anchatamá Lazarotaqa munakusqa”, nispa. Wakintaq niranku: “¿Imaraykun mana qhaliyachiranchu?”, nispa. ¿Imatan Jesús ruwaran?

Lazarota p’ampasqanku t’oqomanmi riran. Jinan kamachiran rumita suchuchinankupaq. Martan ichaqa niran: “Señor tawa p’unchayñan karun, asnashanñachá”, nispa. Chaywanpas rumitaqa suchuchirankun. Jesustaq mañakuran: “Papay, graciastan qoyki uyariwasqaykimanta, noqaqa yachanin uyariwasqaykita, ichaqa kaypi  kashaq runakuna kachamuwasqaykita yachanankupaqmi alto kunkawan mañakamuyki”, nispa. Chay qhepamanmi fuerteta niran: “¡Lázaro, lloqsimuy!”, nispa. Lazarotaq telawan k’uyusqa lloqsimuran. Jesustaq niran: “Paskaychis”, nispa.

Chayta rikuspan askha runakuna Jesuspi iñipuranku. Wakintaq fariseokunaman willaq riranku. Chaymantapachan fariseokunaqa Jesusta Lazarotawan wañuchiyta munaranku. Judas Iscarioten pakallapi fariseokunaman rispa niran: “¿Jayk’atan pagawankichisman Jesusta qankunaman jap’ichiqtiy?”, nispa. Jinan 30 qolqeta paganankupaq munachiranku. Chaymantapachan Judasqa piensaran imaynatas Jesusta jap’ichinman chayta.