Jesuspa quimsa ali amigocunaca Betania pueblopi causaj Lázaro, María, Martami carca. Paicunaca turi panicunami carca. Shuj punllaca Jesús Jordán yacu chimba ladopi cajpimi Mariapash, Martapash Jesusman villachun cacharca: ‘Lazaroca huañujunmi’, ucha shamupai nishpa. Shinapash Jesusca na chai rato rircachu. Ishcai punlla jipami paipa catijcunataca nirca: Betania puebloman jacuchi, ‘ñucanchipa cumba Lazaroca ña puñujunmi. Paita rijchachingapami rigrijuni’ nishpa. Shina nijpimi apostolcunaca “ña ali tucushpamari puñujunga” nirca. Chaimi Jesusca paicuna ali intindichun nirca: “Lázaro runaguca huañushcami” nishpa.

Jesús Betania puebloman chayajpica, ‘Lazaroca ña chuscu punllata pambai tucushcami’ carca. ‘Martandi, Mariandi llaqui llaqui tianajujpimi paicunata cushichingapaj’ ashtaca gentecuna rishcarca. ‘Jesús shamujujta uyashpami, Martaca paita tuparingapaj rishpa cashna nirca: Apunchi Jesús can caipi cajpica, ñuca turiguca na huañunmanllu carca’ nishpa. Shina nijpimi Jesusca nirca: “Cambaj turiguca causaringami”. ¿Caitaca cringuichu? nishpa. Chaimi Martaca cashna tigrachirca: ‘Tucurimui punllapi huañushcacuna causarijpi ñuca turigupash causaringa yanimi’ nishpa. Shina nijpimi Jesusca nirca: “Ñucami causachijpash, causaita causagrinata carajpash cani” nishpa.

Chai jipami Martaca, Mariaman cashna nigrirca: Jesusca caipimi can nishpa. María Jesuspaman calpashpa rijujpimi, gentecunapash paita catishpa rinajurca. María Jesuspaman chayashpaca paipa ñaupajpi cungurishpami huacai huacai cashna nirca: “Apunchi Jesús, can caipi cajpica, ñuca turiguca na huañupanmanllu carca” nishpa. ‘Shina huacajujta Jesús ricushpami shungupi ninanda llaquirishpa’ paipash huacarca. Jesús huacajujta ricushpami gentecunaca cashna ninajurca: “Lazarotaca ninandami juyan cashca” nishpa. Cutin shujcunaca cashnami tapurinajurca: ‘Lázaro ama huañuchunga ¿nacha imallatapash rurana carca?’ nishpa. Jesusca ¿imatashi ruragrijurca?

‘Jesusca, Lázaro runagu pambashca utujuman chayashpami, jatun rumihuan jarcashcata ricurca. Chaimi Jesusca, rumita suchuchipaichi nirca’. Shinapash Martaca nircami: ‘Paita pambashcapash ñami chuscu punlla, ña ashnajungami’ nishpa. Shina nijpipash rumitaca suchuchircami. Chaimi Jesusca cashna mañarca: “Ñuca Taitalla, ñuca mañajujta uyashcamandami, candaca pashi nijuni”. ‘Ñuca mañajujta can uyajtaca yachanimi. Can ñucata cachamushcata, cai tucui gentecuna crichunmi, cashna mañapani’ nishpa. Chai jipami Jesusca cashna caparirca: “Lázaro, chaimanda Ilujshimui” nishpa. Chai nishca jipallami ‘Lazaroca  maquindi, chaquindi, umatapash telahuan pillushca Ilujshimurca’. Shina Ilujshimujpimi Jesusca nirca: ‘Pillushcacunata pascashpa richun saquipaichi’ nishpa.

‘Jesús shina causachijta ricushpami, ashtaca gentecuna Jesuspi crinajurca. Huaquingunaca Jesús imata rurashcataca fariseocunaman villangapami rinajurca’. Chai punllamandapachami Jesusta, Lazarotapash huañuchingapaj fariseocunaca parlarinajurca. 12 apostolcunapuramanda Judas Iscariotemi pacalla fariseocunata cashna tapugrirca: “Jesusta ñuca japishpa cujpica, ¿imatashi cuhuanguichiman?” nishpa. Chaimi fariseocunaca ‘quimsa chunga culquitami cupashun ninajurca’. Culquita japishca horasmandami Judasca Jesusta imashna japichinata yarishpa purijurca.