О Исус сине ле трин бут паше амала со живинена сине ки Витанија. Адала сине о Лазар хем лескере дуј пхења, и Марија хем и Марта. Јекх диве, џикоте о Исус сине тари јавер страна таро Јордан, и Марија хем и Марта бичхалѓе леске јекх хабери: „О Лазар тано бут насвало. Молинаја тут ава посиг!“ Ама о Исус на гело одма. Ов аџикерѓа те накхен дуј диве хем тегани вакерѓа пле учениконге: „Ајде те џа ки Витанија. О Лазар совела, хем ка џав те ваздав ле“. О апостолија вакерѓе: „Ако о Лазар совела, адава ка поможинел ле те овел пошукар“. Ама о Исус јасно пхенѓа ленге: „О Лазар муло“.

Кеда ресља о Исус ки Витанија, о Лазар сине више штар диве ко гробо. Бут мануша авена сине те ден утеха е Мартаке хем е Маријаке. Кеда и Марта шунѓа кај о Исус авела, гели те ресел ле. Ој вакерѓа: „Господару, те ове сине ту акате, мо пхрал нане те мерел сине“. О Исус вакерѓа лаке: „То пхрал палем ка живинел. Верујнеа ли ко акава Марта?“ Ој пхенѓа: „Верујнава кај ка уштел кеда ка овел воскресение“. О Исус вакерѓа лаке: „Ме сиум о воскресение хем о живото“.

Тегани и Марта гели ки Марија хем вакерѓа лаке: „О Исус тано акате“. И Марија прастандили ко Исус, хем пали лате геле бут мануша. Ој пели англо лескере пре хем нашти сине те чхинавел ројбаја. И Марија вакерѓа: „Господару, те ове сине ту акате, мо пхрал панда ка овел сине џивдо!“ О Исус дикхља кобор лаке пхаро, хем почминѓа ов да те ровел. Кеда дикхле о мануша кај ровела, вакерѓе: „Дикхен кобор о Исус мангела сине е Лазаре“. Ама, несаве пучена пе сине: „Соске о Исус на спасинѓа пе амале?“ Со керѓа ов пало адава?

О Исус гело ко гробо, кова со сине пханло баре бареа. Пало адава, нарединѓа: „Циден о бар“. И Марта вакерѓа: „Накхле штар диве! О тело лескоро сигурно кхандела“. Ама, палем цидинѓе о бар, о Исус молинѓа пе: „Мо дад, фала со шунеа ме молитве. Џанава кај секогаш шунеа ман, ама акана керава лафи ко гласо те шај акала мануша те џанен кај ту бичхалѓан ман“. Тегани цело  гласоја викинѓа: „Лазар икљов!“ Тегани уло нешто со бут изненадинѓа лен. О Лазар иклило таро гробо, цело паќардо ко завоја. О Исус вакерѓа: „Икален лестар о завоја хем мукхен ле те џал“.

Бут џене со дикхле акава верујнѓе ко Исус. Ама несаве геле хем вакерѓе е фарисејенге башо акава. Таро адава моменти, о фарисеија мангле те мударен е Исусе хем е Лазаре. О Јуда Искариот, јекх таро 12 апостолија, бизо никој те џанел гело ко фарисеија хем пучља лен: „Кобор паре ка ден ман ако поможинава тумен те астарен е Исусе?“ Ола вакерѓе кај ка ден ле 30 сребреникија, хем оттегани о Јуда родела сине прилика те шај те предајнел ле ленге.