O Isus sine le trin but paše amala so živinena sine ki Vitanija. Adala sine o Lazar hem leskere duj phenja, i Marija hem i Marta. Jekh dive, džikote o Isus sine tari javer strana taro Jordan, i Marija hem i Marta bičhalgje leske jekh haberi: „O Lazar tano but nasvalo. Molinaja tut ava posig!“ Ama o Isus na gelo odma. Ov adžikergja te nakhen duj dive hem tegani vakergja ple učenikonge: „Ajde te dža ki Vitanija. O Lazar sovela, hem ka džav te vazdav le“. O apostolija vakergje: „Ako o Lazar sovela, adava ka pomožinel le te ovel pošukar“. Ama o Isus jasno phengja lenge: „O Lazar mulo“.

Keda reslja o Isus ki Vitanija, o Lazar sine više štar dive ko grobo. But manuša avena sine te den uteha e Martake hem e Marijake. Keda i Marta šungja kaj o Isus avela, geli te resel le. Oj vakergja: „Gospodaru, te ove sine tu akate, mo phral nane te merel sine“. O Isus vakergja lake: „To phral palem ka živinel. Verujnea li ko akava Marta?“ Oj phengja: „Verujnava kaj ka uštel keda ka ovel voskresenie“. O Isus vakergja lake: „Me sium o voskresenie hem o životo“.

Tegani i Marta geli ki Marija hem vakergja lake: „O Isus tano akate“. I Marija prastandili ko Isus, hem pali late gele but manuša. Oj peli anglo leskere pre hem našti sine te čhinavel rojbaja. I Marija vakergja: „Gospodaru, te ove sine tu akate, mo phral panda ka ovel sine dživdo!“ O Isus dikhlja kobor lake pharo, hem počmingja ov da te rovel. Keda dikhle o manuša kaj rovela, vakergje: „Dikhen kobor o Isus mangela sine e Lazare“. Ama, nesave pučena pe sine: „Soske o Isus na spasingja pe amale?“ So kergja ov palo adava?

O Isus gelo ko grobo, kova so sine phanlo bare barea. Palo adava, naredingja: „Ciden o bar“. I Marta vakergja: „Nakhle štar dive! O telo leskoro sigurno khandela“. Ama, palem cidingje o bar, o Isus molingja pe: „Mo dad, fala so šunea me molitve. Džanava kaj sekogaš šunea man, ama akana kerava lafi ko glaso te šaj akala manuša te džanen kaj tu bičhalgjan man“. Tegani celo  glasoja vikingja: „Lazar ikljov!“ Tegani ulo nešto so but iznenadingja len. O Lazar iklilo taro grobo, celo pakjardo ko zavoja. O Isus vakergja: „Ikalen lestar o zavoja hem mukhen le te džal“.

But džene so dikhle akava verujngje ko Isus. Ama nesave gele hem vakergje e farisejenge bašo akava. Taro adava momenti, o fariseija mangle te mudaren e Isuse hem e Lazare. O Juda Iskariot, jekh taro 12 apostolija, bizo nikoj te džanel gelo ko fariseija hem pučlja len: „Kobor pare ka den man ako pomožinava tumen te astaren e Isuse?“ Ola vakergje kaj ka den le 30 srebrenikija, hem ottegani o Juda rodela sine prilika te šaj te predajnel le lenge.