O Isus hine lje trin but paše amala kola živindže ki Vitanija. Odola hine o Lazar hem oljese duj phenja, i Marija hem i Marta. Jekh dive, dži o Isus hine ki aver strana ando Jordan, i Marija hem i Marta bičhaldže ljese jekh but važno poruka: „O Lazar tano but nabormo. Molinaja tut, ava sigate!“ Ama, o Isus na dželo odmah. Ov adžičerdža poviše ando duj dive hem phendža pe učenikonendže: „Hajde te dža ki Vitanija. O Lazar sovela, džava te vazdav lje.“ O apostolija phendže: „Ako o Lazar sovela, odova ka pomožini lje te ovel pošukar.“ Tegani o Isus jasno phendža ljendže: „O Lazar mulo.“

Ked o Isus reslja ki Vitanija, o Lazar hine parumo, već štar dive. But manuša alje te utešinen e Marta hem e Marija. Ked i Marta šundža so o Isus alo, sigate dželji te dikhel lje. Oj phendža: „Gospode, te ove hine akate mo phral hine na ka merel.“ O Isus phendža lače: „To phral ka uštel. Da li verujineja ko odova, Marta?“ Oj phendža: „Verujinava so ka uštel ked ka ovel o uskrsenje.“ O Isus phendža lače: „Me hijum o uskrsenje hem o dživdipe.“

Tegani, i Marta dželji ki Marija hem phendža lače: „O Isus tano akate.“ I Marija prastandilji koro Isus hem o manuša dželje palo late. Oj pelji anglo e Isusese pre hem naštindža te čhinavi te rovel. Oj phendža: „Gospode, te ove hine akate, amaro phral pana bi ovela dživdo!“ Ked o Isus dikhlja kobor tani bari olaki dukh hem ov počmindža te rovel. Ked o manuša dikhlje oljese asva, on phendže: „Dikhen kobor o Isus manglja e Lazare.“ Ama, disave pučlje pe: „Sose na spasindža pe amalje?“ So ka čerel o Isus akana?

O Isus dželo ko grobo, kaj o baro bar učhardža o ulaz. Ov phendža: „Ciden o bar.“ I Marta phendža: „Ama, već štar dive nakhlje sar mulo! Oljeso telo mirišini.“ Tegani, on cidindže o bar hem o Isus molindža pe: „Mo Dad, hvala tuče so šundžan man. Me džanava so tu uvek šuneja man, ama vačerdžum odova sebepi o manuša te šaj te džanen so tu bičhaldžan man.“  Tegani, vičindža ando sa o glaso: „Lazare, ikljov!“ Tegani, ulo diso but šukar: O Lazar ikljilo ando grobo, ama pana hine pačardo ko zavoja. O Isus phendža: „Ciden ljestar o zavoja hem mukhen lje te džal.“

But džene kola dikhlje akava, verujindže ko Isus. Ama, disave dželje hem phendže e farisejendže. Ando tegani, o fariseja manglje te mudaren soldujen, hem e Lazare hem Isuse. Jekh ando dešuduj apostolija, o Juda Iskariotski, čorjalje dželo ko fariseja hem phendža ljendže: „Kobor ka platinen maje ako pomožinava tumen te astaren e Isuse?“ On phendže ljese so ka den lje 30 srebrnikija. Palo odova, o Juda počmindža te rodel prilika te izdajini e Isuse ko fariseja.