Jésus ayeke na ambeni kota kamarade ti lo ota so ayeke lango na Béthanie. A yeke Lazare nga na aita ti lo ti wali use, Marie na Marthe. Mbeni lâ, na ngoi so Jésus ayeke na mbage ti Ngu ti Jourdain, Marie na Marthe atokua zo hio ti gue ti tene na lo, atene: ‘Terê ti Lazare ason ngangu. Pardon, ga hio si!’ Me Jésus ague hio ape. Lo ku lango use, na pekoni lo tene na adisciple ti lo, lo tene: ‘E gue na Béthanie. Lazare ayeke lango, na mbi gue ti zingo lo.’ Abazengele ni atene: ‘Tongana Lazare alango, a yeke aidé lo ti wara ngangu.’ Jésus angbâ atene na ala tënë ni polele, lo tene: ‘Lazare akui awe.’

Na ngoi so Jésus asi na Béthanie, andâ a lu Lazare a sara lango osio awe. Gbâ ti azo aga ti dë bê ti Marie na Marthe. Na ngoi so Marthe amä so Jésus ayeke na lege ti ga, lo mû loro ti gue ti tingbi na lo. Lo tene na Jésus lo tene: “Seigneur, tongana mo yeke fade ge, ka ita ti mbi ti koli akui pëpe.” Jésus atene na lo atene: ‘Ita ti mo ayeke kiri ande na fini. Marthe, mo mä na bê na tënë so?’ Marthe atene: ‘Mbi mä na bê so lo yeke zingo ande na ngoi ti zingongo ti akuâ.’ Jésus atene na lo, atene: “Mbi yeke zingongo ti akuâ nga na fini.”

Na pekoni Marthe ague atene na Marie, lo tene: ‘Jésus aga awe.’ Marie amû loro lo gue na devant ti Jésus na azo amû peko ti lo nga. Lo tï na gere ti Jésus, na lo toto ngangu. Lo tene: ‘Seigneur, tongana mo yeke fade ge, andâ ita ti e ti koli ayeke ngbâ na fini!’ Jésus abâ tongana nyen la vundu asara Marie mingi, na lo kue lo toto. Tongana azo abâ ngu ti lê ti lo, ala tene: ‘Ala bâ tongana nyen la lo ye Lazare mingi ma.’ Me ambeni zo atene: ‘Ngbanga ti nyen la lo sara mbeni ye ndali ti kamarade ti lo ape?’ Nyen la Jésus ayeke sara?

Jésus ague na dû ti kuâ ni, so a zia mbeni kota tênë na yanga ni. Lo mû yanga na azo, lo tene: ‘Ala zi tênë ni.’ Marthe atene: ‘Me lo sara lango osio awe! Lo komanse ti fun awe.’ Me, azo ni angbâ azi tênë ni, na Jésus asambela: ‘Babâ, merci so mo yeke mä mbi so. Mbi hinga so mo yeke mä ka mbi lakue, me mbi sara tënë na kota go ti tene azo so ahinga so mo la mo tokua mbi.’ Na pekoni, lo dekongo na  kota go, lo tene: “Lazare, sigi!” Mbeni ye so ahon gbungo li ti zo apassé: Lazare asigi na yâ ti dû ti kuâ ni, abongo so aroulé na lo angbâ na terê ti lo. Jésus atene: “Ala zi lo, na ala zia lo, lo gue.”

Mingi ti azo so abâ ye ni so amä na bê na Jésus. Me ambeni ague asara tënë ni na aFarizien. Ti londo na lango ni so ti gue na ni, aFarizien ayeke gi ti fâ Lazare nga na Jésus. Mbeni oko ti abazengele 12 ni, so iri ti lo ayeke Judas Iscariote, ague na hondengo ni lo bâ aFarizien na lo hunda ala, lo tene: ‘Ala yeke payé mbi oke tongana mbi aidé ala ti gbu Jésus?’ Ala yeda ti payé lo na alê ti nginza ti argent 30, na Judas akomanse ti gi mbeni nzoni ngoi ti zia Jésus na maboko ti aFarizien.