Jesu abenebangani labatsatfu lebebahlala eBhetani. BekunguLazaro kanye nabosisi bakhe lababili boMariya naMata. Ngalelinye lilanga, ngesikhatsi Jesu ashumayela ngaseJordane, boMariya naMata batfumela umlayeto lophutfumako lotsi: ‘Lazaro ugula kakhulu. Sicela ufike ngekushesha.’ Kodvwa Jesu akazange ahambe ngaleso sikhatsi. Ngemva kwemalanga lamabili watsi kubafundzi bakhe: ‘Asambeni siye eBhetani. Lazaro ulele, futsi ngitawufike ngimvuse.’ Baphostoli batsi: ‘Nangabe alele loko kutamsita elulame.’ Ngako Jesu wabacacisela watsi: ‘Lazaro ufile.’

Ngesikhatsi Jesu efika eBhetani, besekuphele emalanga lamane Lazaro angcwatjiwe. Bantfu labanyenti bebatodvudvuta Mata naMariya. Ngesikhatsi Mata eva kutsi Jesu usendleleni, wagijima wayomhlangabeta. Watsi: ‘Nkhosi, kube bewukhona, umnaketfu ngabe akakafi.’ Jesu watsi kuye: ‘Umnakenu utawuphila. Uyakukholwa yini loko?’ Mata watsi: ‘Ngiyakholelwa kutsi utawuvuka nasekuvuswa labafile.’ Jesu watsi kuye: ‘Mine ngikuvuka nekuphila.’

Mata wabese uya kuMariya wayomtjela kutsi Jesu sewukhona. Mariya wagijima waya kuJesu futsi nalabantfu bamlandzela. Waguca embikwaJesu, futsi abekhala. Watsi: ‘Nkhosi, kube bewukhona, umnaketfu ngabe akakafi.’ Jesu wambona kutsi uva buhlungu futsi naye wakhala. Ngesikhatsi labantfu babona Jesu akhala batsi: ‘Asenibuke kutsi abemtsandza kwani Lazaro.’ Kodvwa labanye babuta kutsi kungani angakamsindzisi umngani wakhe? Yini Jesu lebekatayenta?

Jesu waya ethuneni lebelivalwe ngelitje lelikhulu. Watsi: ‘Susani lelitje.’ Mata watsi: ‘Kodvwa kungenteka kutsi nyalo sewuyanuka, ngobe sekwendlule emalanga lamane.’ Kodvwa balisusa lelitje futsi Jesu wathantaza watsi: ‘Babe, ngiyabonga ngekutsi ungivile. Ngiyati kutsi uhlale ungiva; kodvwa ngikhuluma ngenca yalabantfu labalapha, khona batewukwati kutsi ungitfumile.’ Wabese uyamemeta utsi: ‘Lazaro,  phuma!’ Kwenteka intfo lemangalisako: Lazaro waphuma agigwe ngetindvwangu. Jesu watsi: ‘Mkhumuleni letindvwangu, nimyekele ahambe.’

Bantfu labanyenti lababona loku bakholwa kuJesu. Kodvwa labanye baya kubaFarisi babatjela loko Jesu labekwentile. Kusukela lapho, baFarisi besebafuna kubulala Jesu kanye naLazaro. Lomunye webaphostoli, lokunguJudasi Skariyothi waya kubaFarisi ngasese wafike watsi: ‘Nitangibhadala malini nanginganisita kutsi nitfole Jesu?’ Batsi batambhadala tinhlavu telisiliva letingu-30 futsi Judasi wabese sewufuna litfuba lekutsengisa Jesu kubaFarisi.