Yesus piạ tatělu hapịe mapia mětẹ̌tanạ su Betani. I sire kai i Lazarus dingangu duang katau wawinene, i Maria dingangi Marta. Piạ su sahěllo, su tempong i Yesus su Perea, i Maria dingangi Marta něndoho tatanata penting si sie, ’I Lazarus masakị mawěhạ. Tul᷊ungko lighạ damahi!’ Yesus tawe apidu natamai, i sie bědang nẹ̌tanạ dua ěllo. Bọu ene Yesus nẹ̌bera su manga murite, ’Mahịe i kitẹ sarang Betani. Lazarus seng nẹ̌tikị, kụ iạ matamai měmuko si sie.’ Manga rasule nẹ̌bera, ’Mạeng i Lazarus mětẹ̌tikị, i sie sarung mal᷊ighạ mapia.’ Yesus nẹ̌bera mal᷊ahẹ si sire, ’Lazarus seng nate.’

Su tempong i Yesus nahumpạ su Betani, Lazarus seng nilěbing karěngụe ěpạ u ěllo. Lawọ taumata diměnta gunang měhiborẹ̌ si Marta dingangi Maria. Su tempong i Marta nakaringihẹ̌ i Yesus seng nasongo, i sie apidu masahawụ nakoạ sarang i Yesus. I sie nẹ̌bera, ”Tuang, manga i Tuang ene sini, mahuaneku tawe nate.” Yesus nẹ̌bera si sie, ’Mahuanenu sarung saụ měbiahẹ̌. Apa i kau mangimang Marta?’ I sie simimbahẹ̌, ’Iạ mangimang i sie sarung saụ měbiahẹ̌ su tempong taumata nate saụ ipěbiahẹ̌ su tempone.’ Yesus nẹ̌bera si sie, ”Iạ kai pěbawiahẹ̌ bọu papate dingangu pěbawiahẹ̌.”

Bọu ene, Marta nakoạ sarang i Maria kụ nẹ̌bera, ’Yesus ene sini.’ Maria timal᷊ang sarang i Yesus, kụ lawọ taumata timol᷊e si sie. Maria nẹ̌tumpěkuhẹ̌ su laedi Yesus kụ turusẹ̌ sụsangị. I sie nẹ̌bera, ’Manga i Tuang ene sini, mahuaneku tantu bědang biahẹ̌!’ Yesus nakasilo i Maria sěbạe nasusah naung, kụ i Yesus apidu simangị. Su tempong nakasilo i Yesus simangị, taumata nẹ̌bera, ’Kakělako i Yesus sěbạe masayang si Lazarus.’ Katewe piạ u nẹ̌tiněna, ’Kawe i sie tawe nẹ̌tul᷊ung hapịe?’ Apa sarung koateng i Yesus?

Yesus nakoạ sarang kubul᷊i Lazarus, kụ kubul᷊ẹ̌ ene nitutu dingangu watu gěguwạ. Yesus něngoro tadeạu batu ene pakial᷊ing. Marta nẹ̌bera, ’I sie seng nilěbing ěpạ u ěllo! Mayate ini seng nawuhụ.’ Katewe batu ene tatapẹ̌ nial᷊ing, kụ i Yesus nẹ̌doa, ’Amang, tarimakasẹ i Amang seng dimaringihẹ̌ si siạ. Iạ masingkạ i Amang  sěntiniạ dụdaringihẹ̌ si siạ, katewe iạ nẹ̌bisara dingangu tingihẹ̌ maihạ tadeạu i sire ini makasingkạ i Amang něndolohẹ̌ si siạ.’ Bọu ene i sie nẹ̌kui dingangu tingihẹ̌ maihạ, ”Lazarus, sěbangke!” Hal᷊ẹ̌ makạlaherang nariadi: Lazarus siměbang bọu kubul᷊ẹ̌, kụ badange bědang mạpapikungu hekạ. Yesus nẹ̌bera, ”Bukako hekạe tadeạu i sie makaral᷊eng.”

Lawọ taumata nakasilo hal᷊ẹ̌ ene nangimang si Yesus. Katewe, piạ u nẹ̌běke su tau Farisi. Něnětạ tempo ene, tau Farisi mapulu měmate si Lazarus dingangi Yesus. I Yudas Iskariot, sěngkatau bọu 12 rasulẹ̌, nẹ̌sombang dingangu tau Farisi kụ nẹ̌kiwal᷊o, ’I kamene měmaehẹ̌ pira mạeng iạ mẹ̌tul᷊ung si kamene makaěbạ si Yesus?’ I sire mapulu měmaehẹ̌ si sie dingangu 30 roitẹ̌ perak. Něnětạ bọu ene i Yudas mědẹ̌deạ tempo gunang měnarakang i Yesus su tau Farisi.