Jesus iha belun naʼin-tolu neʼebé hela iha Betánia. Neʼe mak Lázaro no ninia feton naʼin-rua, Maria no Marta. Loron ida, kuandu Jesus iha área Pereia, Maria no Marta haruka lia-menon ida ba Jesus: ‘Lázaro moras todan. Favór mai lalais!’ Maibé Jesus la bá kedas. Liutiha loron rua mak nia foin dehan ba dixípulu sira: ‘Mai ita bá Betánia. Lázaro toba hela no haʼu sei bá atu fanu nia.’ Apóstolu sira dehan: ‘Se Lázaro toba, nia sei diʼak lalais.’ Tan neʼe Jesus koʼalia nakloke ba sira: ‘Lázaro mate ona.’

Kuandu Jesus toʼo iha Betánia, ema hakoi ona Lázaro ba loron haat. Ema barak mai atu fó kmaan ba Marta no Maria. Bainhira Marta rona katak Jesus mai, nia halai lalais bá hasoru Jesus. Marta dehan: ‘Naʼi, se Ita-Boot iha neʼe karik, haʼu-nia alin sei la mate.’ Jesus dehan: ‘Ó-nia alin-mane sei moris fali. Ó fiar ka lae Marta?’ Marta dehan: ‘Haʼu fiar katak nia sei moris fali iha tempu moris-hiʼas nian.’ Jesus dehan ba nia: ‘Haʼu mak moris-hiʼas no moris.’

Tuirmai Marta bá hasoru Maria no dehan: ‘Jesus mai ona.’ Maria halai ba Jesus no ema-lubun mós tuir Maria. Maria hakneʼak iha Jesus nia ain no tanis. Maria dehan: ‘Naʼi, se Ita-Boot iha neʼe karik, haʼu-nia alin sei la mate!’ Jesus haree Maria tanis, no nia mós komesa tanis. Bainhira ema-lubun haree Jesus tanis, sira dehan: ‘Haree, Jesus hadomi tebes Lázaro.’ Maibé ema balu hanoin: ‘Tanbasá Jesus la ajuda ninia belun?’ Saida mak Jesus sei halo?

Jesus bá Lázaro nia rate neʼebé ema taka ho fatuk boot. Nia dehan: ‘Duir tiha fatuk neʼe.’ Marta dehan: ‘Neʼe loron haat ona! Agora ninia isin dois ona.’ Maibé sira nafatin duir fatuk neʼe no Jesus halo orasaun: ‘Aman, obrigadu tanba rona haʼu. Haʼu hatene katak Ita-Boot sempre rona haʼu, maibé haʼu koʼalia  ho lian makaʼas atu sira bele fiar katak Ita mak haruka haʼu mai.’ Tuirmai, Jesus bolu ho lian makaʼas: ‘Lázaro, sai mai liʼur!’ Buat furak ida akontese: Lázaro sai mai liʼur ho hena neʼebé bobar ninia isin. Jesus dehan: ‘Kore hena neʼe no husik nia laʼo.’

Ema barak neʼebé haree ida-neʼe tau fiar ba Jesus. Maibé ema balu bá fó-hatene ida-neʼe ba ema Farizeu. Husi tempu neʼebá, ema Farizeu hakarak oho Jesus no mós Lázaro. Apóstolu ida naran Judas Iscariotes bá hasoru ema Farizeu subasubar no husu: ‘Imi sei selu hira se haʼu ajuda imi atu kaer Jesus?’ Sira promete atu fó osan-mutin 30 ba Judas no nia komesa buka oportunidade atu entrega Jesus ba ema Farizeu.