Nanagne ragnetse telo nipetrake ta Betania ao ty Jesosy. I Lazarosy, le i Maria naho i Marta. Tan-dafe ty Renerano i Jordana agne ty Jesosy tie indraike. Nisy hafatse meke nalefa i Marta naho i Maria tama’e tie: ‘Marare mafe ty Lazarosy, le miavia malaky rehe!’ Faie mbe tsy nandeha ty Jesosy. Ie niafake roe andro, le hoe reke tamy i mpiana’e rey: ‘Andao tika ho a Betania agne fa miroro ty Lazarosy, le handeha hamoha aze raho.’ Hoe i apostoly rey: ‘Ho salama ty Lazarosy naho toe miroro avao.’ Nihazavae i Jesosy tamy iareo amy izay tie: ‘Mate ty Lazarosy.’

Fa efatse andro ty nandevegnagne i Lazarosy, vaho izay ty Jesosy niavy agne. Nisy ndaty maro ty tao nampionogne i Marta naho i Maria. Nilay nanalaka i Jesosy ty Marta naho fa naharey tie, fa ao reke. Hoe reke: ‘O Tompo, naho teto rehe, le tsy ho nimate ty rahalahiko.’ Hoe ty Jesosy tama’e tie: ‘Ho velogne ty rahalahi’o. Mino izay vao rehe Marta?’ Hoe ty Marta: ‘Mino raho fa ho velogne reke amy ty famelomagne ty mate.’ Hoe ty Jesosy tama’e: ‘Izaho ty famelomagne ty mate naho fiaignagne.’

Nirehake tamy i Maria ty Marta tie: ‘Ao ty Jesosy.’ Nilay mbeo ty Maria, le norihe i vahoakey. Niankohoke taloha i Jesosy eo reke sady nitagny. Hoe reke: ‘O Tompo, mbe ho nivelogne ty rahalahi’ay naho teto rehe.’ Trea i Jesosy tie nanahelo mafe ty Maria, le nitagny ka reke. Hoe i ndaty rey naho fa nahatrea aze nitagny tie: ‘Teà’e vata’e ty Lazarosy.’ Faie ty ila’e nagnontane tie: ‘Ino koahe tsy nagnasitragna’e azeo?’ Ino ty natao i Jesosy?

Nandeha mba-kibory mbeo ty Jesosy, faie nisy vatobey ty teo. Hoe reke: ‘Afaho’areo o vatò.’ Hoe ty Marta: ‘Maimbo zay, fa efatse andro ty nandevegnagne aze.’ Faie nafaha iareo avao i vatoy. Le nivavake ty Jesosy tie: ‘Misaotse azo Baba nijanjigne ahy. Fantako fa mitsatsike ahy lognandro rehe. Faie teàko ho fanta ty vahoake maro toa tie i rehe ty nagnirake ahy.’ Nitoka mafe reke tie: “O Lazarosy,  miakara!” Le niakatse boake an-kibory ao ty Lazarosy, sady mbe nifehe lamba. Hoe ty Jesosy: “Hahao’areo reke sady avotsoro handehana’e.”

Maro ty nanjare nino i Jesosy naho fa nahatrea izay. Faie ty ila’e nagnambara tamo o Fariseo reo agne ty raha niseho. Teà o Fariseo reo hovonoegne ty Lazarosy naho i Jesosy tamy izay. Nandeha mbamo o Fariseo reo mbeo ka ty Jodasy Iskariota, agnisa ty apostoly 12. Hoe reke: ‘Ho karamae’areo fire raho hagnampeako anareo hipay i Jesosy?’ Nagneke iareo fa hagnomey aze volafotsy 30. Nanomboke nipay hevetse amy izay ty Jodasy.