Naʻe ʻi ai ʻa e kaumeʻa ofi ʻaupito ʻe toko tolu ʻo Sīsū naʻa nau nofo ʻi Pētani. Ko Lāsalosi mo hono ongo tuofefiné, ko Mele mo Māʻata. ʻI he ʻaho ʻe taha, lolotonga ʻa e nofo ʻa Sīsū ʻi he tafaʻaki ʻe taha ʻo Sioataní, naʻe ʻomai ai kiate ia ha fekau fakavavevave meia Mele mo Māʻata: ‘ʻOku puke lahi ʻa Lāsalosi. Haʻu fakavavevave muʻa!’ Ka naʻe ʻikai ke ʻalu ʻa Sīsū ʻi he taimi pē ko iá. Naʻá ne tatali ʻi ha toe ʻaho ʻe ua peá ne toki tala ange ki heʻene kau ākongá: ‘Tau ō ki Pētani. ʻOku mohe ʻa Lāsalosi, pea ko ʻeku ʻalu eni ke fafangu ia.’ Naʻe pehē ange ʻe he kau ʻapositoló: ‘Kapau ʻoku mohe ʻa Lāsalosi, ʻe tokoni ia kiate ia ke ne sai.’ Ko ia naʻe tala mahino ange ai ʻe Sīsū: ‘Kuo mate ʻa Lāsalosi.’

ʻI he aʻu atu ʻa Sīsū ki Pētaní, kuo ʻosi tanu ʻa Lāsalosi ʻi he ʻaho ʻe fā. Naʻe haʻu ha fuʻu kakai ke fakafiemālie kia Māʻata mo Mele. ʻI he fanongo ʻa Māʻata kuo haʻu ʻa Sīsuú, naʻá ne fakavave atu ke fakafetaulaki kiate ia. Naʻá ne pehē ange: “ʻEiki, kapau naʻá ke ʻi heni, ne ʻikai mei mate hoku tuongaʻané.” Naʻe tala ange ʻe Sīsū: ‘ʻE toe moʻui ho tuongaʻané. ʻOkú ke tui ki he meʻá ni, Māʻata?’ Naʻe pehē ʻe Māʻata: ‘ʻOku ou tui te ne tuʻu hake ʻi he toetuʻú.’ Naʻe pehē ʻe Sīsū kiate ia: “Ko au ʻa e toetuʻú pea mo e moʻuí.”

Naʻe ʻalu leva ʻa Māʻata ʻo tala ange kia Mele: ‘ʻOku ʻi heni ʻa Sīsū.’ Naʻe lele ʻa Mele kia Sīsū, pea muimui atu ai ʻa e fuʻu kakaí. Naʻá ne tō ʻi he veʻe vaʻe ʻo Sīsuú, pea naʻe ʻikai lava ke tuku ʻene tangí. Naʻá ne pehē: ‘ʻEiki, kapau naʻá ke ʻi heni, naʻe kei moʻui pē homa tuongaʻané!’ Naʻe sio ʻa Sīsū ki he lahi ʻo ʻene mamahí, pea naʻe kamata ke ne tangi foki mo ia. ʻI he sio ʻa e fuʻu kakaí ki heʻene loʻimataʻiá, naʻa nau pehē: ‘Tā naʻe ʻofa ʻa Sīsū ʻia Lāsalosi.’ Ka naʻe fifili ʻa e niʻihi: ‘Ko e hā naʻe ʻikai ai ke ne fakamoʻui ʻa hono kaumeʻá?’ Ko e hā ʻa e meʻa hono hoko naʻe fai ʻe Sīsuú?

Naʻe ʻalu ʻa Sīsū ki he fonualotó, ʻa ia naʻe tāpuni ʻaki ha fuʻu maka ʻa e hūʻangá. Naʻá ne fekau atu: ‘Tekaʻi ʻa e maká.’ Naʻe pehē ange ʻe Māʻata: ‘Ka kuo ʻosi ʻa e ʻaho ʻe fā! Kuo nanamu ʻa hono sinó.’ Neongo ia, naʻa nau tekaʻi ʻa e maká, pea naʻe lotu ʻa Sīsū: ‘ʻE Tamai, ʻoku ou fakamālō atu ʻi hoʻo fanongo mai kiate aú. ʻOku ou ʻiloʻi ʻokú ke fanongo mai maʻu pē kiate au, ka ʻoku ou lea leʻo-lahí koeʻuhi ke ʻilo ʻe he kakaí ni  naʻá ke fekauʻi mai au.’ Naʻá ne ui leʻo-lahi atu leva: “Lāsalosi, hū mai ki tuʻa!” Naʻe hoko ha meʻa fakaofo: Naʻe hū mai ki tuʻa ʻa Lāsalosi mei he fonualotó, ʻoku kei haʻiʻaki pē ʻa e tupenu līnení. Naʻe pehē ange ʻe Sīsū: “Vete ia pea tuku ke ne ʻalu.”

Ko e tokolahi naʻa nau sio ʻi he meʻa ko ení naʻa nau tui kia Sīsū. Ka naʻe ʻalu ʻa e niʻihi ʻo tala ki he kau Fālesí. Talu mei ai mo e loto ʻa e kau Fālesí ke tāmateʻi fakatouʻosi ʻa Lāsalosi mo Sīsū. Ko e taha ʻi he kau ʻapositolo ʻe toko 12, ʻa Siutasi ʻIsikaliote, naʻá ne ʻalu fakafufū ki he kau Fālesí ʻo ʻeke: ‘Ko e fiha te mou totongi kiate aú kapau te u tokoni atu ke mou maʻu ʻa Sīsū?’ Naʻa nau felotoi te nau totongi ʻaki ʻa e konga siliva ʻe 30, pea naʻe kamata ke kumi ʻa Siutasi ki ha faingamālie ke tuku atu ai ʻa Sīsū ki he kau Fālesí.