Jesu a diri ni dzipari a nga ba a dzi gola ngudzu dzi nga ba dzi khala Bhetaniya. Gu diri Lazaro ni vandriyaye Marta ni Mariya. Litshigu limwedo Jesu nari Pereya, Mariya ni Marta va di rumeya mahungu nya givbiredza ga Jesu, khavo: ‘Lazaro a ngu dwala ngudzu. Delu khu guvbiredza.’ Jesu kha dzegeya gu hongola. Ganiolu, a di vbedza matshigu mavili na si hongoli. Ndrani nya matshigu yoyo, Lazaro a difa, khavbovbo Jesu a di embeya vapizane vaye, khuye: ‘Hongoleni Bhetaniya. Lazaro lade. Nyo hongola nyi ya mu wusa.’ Vapostoli va di mu embeya, khavo: ‘Tshukwana Lazaro a gu ba a lade, si na phasa gu hawuluga.’ Khu kharato, Jesu a di va embeya khuye: ‘Lazaro fude.’

Tepo Jesu a nga vboha Bhetaniya, gu di gu vbindra 4 matshigu Lazaro na fude. Gu diri ni vathu nya vangi va nga ba va teya gu ta thaveleya Marta ni Mariya. Tepo Marta a wona Jesu na vboha, a di tutuma a mu khinga, a ya khuye: ‘Pfhumu, nari khatshi u diri avba, ndriyangu na safa.’ Jesu khuye: ‘Ndriyago a na wuga. U ngu si khodwa isoso Marta? Marta khuye: ‘Nyi ngu khodwa gu kheni a na wuga teponi yi tago.’ Jesu khuye: ‘Eni kheni guwuga ni womi.’

Khavbovbo, Marta a di hongola ga Mariya a ya mu embeya, khuye: ‘Vbohide Jesu.’ Mariya a di tutuma a hongola ga Jesu; a landrwa khu vathu va nga ba vari vbale. A di ya thega migondroni gwaye, a liya. Kha nga ba si kodza gu degula. A di embeya Jesu khuye: ‘Pfhumu, nari khatshi u diri avba, ndriyathu na nga gu vbanya olu!’ Jesu a di wona Mariya na tshaniseka, khavbovbo a pheya nuye gu liya. Tepo vathu va nga mu wona na liya, va di khavo: ‘Nga wonani edzi Jesu a nga ba a mu gola khidzo Lazaro!’ Ganiolu, vambe va di garadzega, khavo: ‘Khu ginani a nga mba vbanyisa pari yaye?’ Ginani egi Jesu a nga hadzi gira?

A di hongola thowoni. Gu di segidwe khu giwindri nya gikhongolo. A di va ruma, khuye: ‘Dusani giwindri.’ Marta khuye: ‘Gu ngu vbindra 4 matshigu na fude! Givili gyaye gi ngu nunga!’ Ambari ulolo, va di dusa giwindri, khavbovbo Jesu a gombeya, khuye: ‘Papayi, nyi ngu gu bonga kholu u pwago nombelo wangu. Nyi ngu dziti gu kheni tepo yatshavbo u ngu nyipwa. Ganiolu, nyo ganeya si pwala gasi vathu vava va dziti gu khavo  khuwe u nga nyi ruma. Khavbovbo, a di rana Lazaro khu lito nyo khugege, khuye: “Lazaro, duga!” Gu di girega silo nyo hlamadzise ngudzu. Lazaro a di duga khu thowoni, na dzongedzedwe mikeka. Jesu khuye: ‘Mu tshuleni, mu mu diga a hongola.’

Vathu nya vangi va nga wona esi na si girega, va di khodwa ga Jesu. Ganiolu, vambe va di ya embeya Vafarisi. Gukhugeya avbovbo, Vafarisi va di zama gu songa Lazaro ni Jesu. Moyo nya vapostoli vaye nya 12 a di hongola ga Vafarisi na si wonwi khu muthu a ya va wudzisa, khuye: ‘Mu na nyi ninga kharini nyo mi phasa gu mola Jesu?’ Va di mu embeya gu khavo hi na gu ninga 30 singerengere nya prata. Judha a di dzumeya, khavbovbo a pheya gu vbweta dzindziya nyo ningeye Jesu ga Vafarisi gasi va mu songa.