Jesu wakali abeenzinyina batatu bakali kukkala kuBbetaniya. Mazina aabo nguLazaro abachizi bakwe babili Mariya aMarta. Bumwi buzuba Jesu kali kuli lumwi lubazu lwaJordani, Mariya aMarta bakamutumina mulayizyo wakuti: ‘Lazaro ulikuchiswa loko. Tukumbila kuti usike chakufwambaana!’ Pesi Jesu wakanonoka kwiinka. Wakakkala kwamazuba aambi abili mpawo wakabuzya basikwiiya bakwe kuti: ‘Atwiinke kuBbetaniya. Nkaambo Lazaro ulikoona pesi ndiyanda kuyoomusinsimuna.’ Baapostolo bakati: ‘Ikuti Lazaro kalikoona, kulamugwasya kuti apone.’ Mpawo Jesu wakababuzya kuti: ‘Lazaro wafwa.’

Jesu naakasika kuBbetaniya, wakajana Lazaro uli amazuba aane kavwikkidwe. Bantu biingi bakasika kuzoowumbulizya Marta aMariya. Marta naakamvwa kuti Jesu uzabuza, wakiinka kuti akamutambule. Wakati: “Omwami, kuti nowakali kokuno, mwanaakwesu naatakafwa.” Mpawo Jesu wakamubuzya kuti: ‘Munyandumi wako ulabuka. Ulawasyoma na makani aaya Marta?’ Marta wakati: ‘Ndilasyoma kuti uyoobuka mubuzuba bwakubusigwa.’ Mpawo Jesu wakamubuzya kuti: “Ndime kubuka abuumi.”

Marta wakaya kuli Mariya akumubuzya kuti: ‘Jesu wasika.’ Mariya wakachijaanina Jesu alimwi bantu bakamutobela. Wakafugama kumawulu aJesu alimwi wakalilisya. Wakati: ‘Omwami, nowakali kokuno, mwanaakwesu naatakafwa!’ Jesu naakabona mbaakali kukataazikana alakwe wakasanguna kulila. Bantu nibakabona Jesu kalila, bakati: ‘Amubone Jesu mbaakali kumuyanda Lazaro.’ Pesi bamwi bakati: ‘Nkamboonzi naakatamuponia mweenzinyina?’ Niinzi nzyakachita Jesu kuzwa waawo?

Jesu wakaya kukabanda kakajalidwe abbwe pati. Wakabuzya bantu kuti: ‘Amugwisye bbwe.’ Pesi Marta wakati: ‘Mubili wakwe ulanunka nkaambo kwayinda mazuba one kafwide.’ Nkinkaako, bakaligwisya bbwe mpawo Jesu wakakomba kati: ‘Taata, ndakulumba nkaambo kakuti wandimvwa. Ndilizi kuti ulandimvwa chiindi  choonse, pesi ndaamba oobo kuchitila kuti bantu aaba bazibe kuti nduwe wakandituma.’ Kuzwa waawo, wakoompolola ajwi pati kati: “Lazaro, kozwa omo.” Kwakachitika chigambyo, Lazaro wakazwa kapopeledwe malembo. Jesu wakati: “Amumwaangunune, mumuleke aende.”

Bantu biingi bakabona malele aaya bakasyoma Jesu. Pesi bamwi bakabuzya baFarisi. Kuzwa waawo, baFarisi bakali kuyanda kujaya Lazaro aJesu. Umwi wabaapostolo bali 12, utegwa Judasi Iskkariyoti wakaya kubaFarisi chakusisikizya mpawo wakababuzya kuti: ‘Mulandipaanzi kuti ndamugwasya kuti mujate Jesu?’ Bakazumina kumupa mali yansiliva zili 30, nkinkaako Judasi wakasanguna kuyanduula nzila yakugwasya baFarisi kuti bajate Jesu.