Ja Jesús ajyi oxe lekil yamigoʼik sok ti sbʼaje bʼa Betania. Sbʼiʼil Lázaro, María sok Marta, ja yeʼnle smoj-alijel sbʼaje. Jun kʼakʼu, ja Jesús tey bʼa pilan skʼaxil ja yok jaʼ Jordán, jaxa María soka Marta sjekaweyi spayjel: «Ja Lázaro jelxa maloʼay. Awa pabor, laʼ wego». Pe ja Jesús mi waj wego. Kanto chabʼ kʼakʼu sok tito yala yabʼ ja snebʼumaniki: «Wajtikik man Betania. Ja Lázaro wan wayel, sok oj waj yujkes». Ja jekabʼanumik yalawe: «Yujkʼa ja Lázaro wan wayel, ojxani ya kulan». Tixa yala jaman lek ja Jesús: «Ja Lázaro chamta».

Yajni ja Jesús kʼot ja bʼa Betania, ayxa chane kʼakʼu mukubʼal ja Lázaro. Jitsan ixuk winik wajele yajel kulan skʼujol ja Marta soka María. Yajni ja Marta yabʼ tixa wajum ja Jesús, ajnelxta waj staʼe. Yala yabʼi: «Kajwal, lek tiʼukxta ajyiya ili, mini oj cham ajyi ja jmoj-alijeli». Ja Jesús sjakʼayi: «Ojni sakʼwuk jawa moj-alijeli. Marta, ¿wan maʼ xa kʼuʼanki ja it?». Ja Marta sjakʼa: «Wani xkʼuʼan ojni kʼejan ja bʼa sakʼwelali». Jaxa Jesús yala yabʼ: «Keʼnon ja sakʼwelal sok ja sakʼanil».

Jaxa Marta waj yalyabʼ ja María: «Tixa ay il ja Jesús». Ja María ajnelxta waj ja bʼay ja Jesús, sok wajye nabʼan ja tuki. Yajni kʼot ja bʼayi, ja María koʼ mekʼan bʼa yok ja Jesús sok ochta okʼuk. Yala yabʼi: «Kajwal, lek tiʼukxta ajyiya ili, sakʼani ay ja jmoj-alijeltikoni». Ja Jesús yila jastal jel wan yijel wokol ja María ja yuj cha okʼ ja yeʼni. Ja matik tey tiw yilawe wan okʼel ja Jesús sok yalawe: «Kʼela janekʼto ja Jesús wa syajtay ja Lázaro». Pe jujuntik wa sjobʼo sbʼaje: «¿Jas yuj mi skoltay ja yamigo?». ¿Jas maʼ oj skʼuluk ja Jesús?

Ja Jesús waj ja bʼa mukubʼal ja Lázaro sok ay jun niwan ton makanyuj ja stiʼ ja kʼeʼeni. Ja yeʼn yaʼa mandar: «Awik eluk ja toni». Ja Marta sjakʼayi: «Ayxani yikʼil yujni ekʼelxa chane kʼakʼu». Anima jachuk, yawe eluk ja toni, jaxa Jesús yayi orasyon: «Tat, tsʼakatal yuja waxa maklayoni. Wani xnaʼa tolabida waxa maklayon, pe wanon kʼumal tsats bʼa jachuk ja ixuk winike oj skʼuʼuke weʼna jekunejon». Anto awani tsats lek: «¡Lázaro, elanjan!». Junta chʼaykʼujol, ay jas ekʼ jel chamyabʼjel: ja Lázaro eljan ja bʼa kʼeʼeni, bʼechubʼalto soka spojtsili.  Ja Jesús yala: «Awik elyi ja spojtsili sok awik wajuk».

Jitsan ja matik yilawe ja jas ekʼi skʼuʼane bʼa Jesús, pe jujuntik waj yal-e yabʼ ja fariseoʼik. Masan bʼa kʼakʼu jaw, ja fariseoʼik xchapawe yabʼalil jastal smiljel ja Lázaro soka Jesús. June ja bʼa 12 sjekabʼanumiki, ja Judas Iscariote, waj sjobʼyi nakʼul ja fariseoʼiki: «¿Janekʼ oja tuponex ta jkoltayex slejel ja Jesús?». Kʼapjiyi 30 sat plata, jaxa Judas lekni yabʼi sok sleʼa modo yajelyi bʼa skʼabʼe ja Jesús.