Yesu akaba aine banywani be basatu abayagonzaaga muno abaikaraga Besaniya. Lazaro hamu n’abanyanya be babiri Malyamu, na Maliza. Kiro kimu, Yesu obwakaba ali omu kicweka ekirukwetwa Pereya haihi n’ekyambu Yorudani, Malyamu hamu na Maliza bakamusindikira obutumwa obwa bwangu bwangu: ‘Lazaro arwaire ali kubi muno. Caali ija bwangu!’ Baitu Yesu atagende bwangu. Akalinda ebiro bibiri hanyuma yagambira abegeswa be ati: ‘Tugende Besaniya. Lazaro agwijagiire.’ Abakwenda bakamugarukamu bati: ‘Lazaro obwaraaba agwijagiire, eki nikiija kumukonyera kukira.’ Yesu akabagarukamu ati: ‘Lazaro afiire.’

Yesu obu yahikire Besaniya, akasanga baziikire Lazaro, amazire ebiro bbina omu kituuro. Abantu baingi bakaba baizire kuhumuza Malyamu na Maliza. Maliza obuyahuliire ngu Yesu aizire, akanguha yagenda kumutangana. Akamugambira ati: ‘Mukama wange, kakuba okaba oli hanu, mugenzi wange tiyakufiire.’ Yesu akamugambira ati: ‘Mugenzi wawe naija kwongera kuba mwomeezi. Eki nokiikiriza Maliza?’ Maliza akamugarukamu ati: ‘Manyire alihumbuuka omu kasumi ak’okuhumbuuka.’ Yesu akamugambira ati: “Ninyowe kuhumbuka nobwomezi.”

Hanyuma Maliza akagenda yagambira Malyamu ati: ‘Yesu aizire.’ Malyamu akairuka yagenda nambere Yesu akaba ali, kandi n’abantu bakamuhondera. Akagwa hansi ha bigere bye kandi yagumizaamu narra. Akagambira Yesu ati: ‘Mukama wange, kakuba okaba oli hanu mugenzi waitu tiyakufiire!’ Yesu obu yarozere omulingo Malyamu akaba narramu, nauwe akatandika kurra. Abantu obu baboine Yesu narra, bakagamba: ‘Rora nk’oku Yesu abaire nagonza Lazaro.’ Baitu abamu bakekaguza: ‘Habwaki atarajunire munywani we?’ Kiki Yesu ekiyakukozere?

Yesu akagenda ha kituuro ekikaba kiswekerwe ibaale erikooto. Hanyuma Yesu akaragira ati: ‘Mwiheho ibaale.’ Maliza akagamba: ‘Amazire ebiro bbina azikirwe! Omubiri gwe hati nigununka.’ Baitu nabwo, ibaale bakaliihaho, kandi Yesu yasaba nagamba ati: ‘Ise nyowe  ninkusiima, habw’okumpurra. Nkimanyire ompurra, baitu nimbaza omu iraka erikuhulirwa habwokuba ningonza abantu banu bamanye ngu niiwe wantumire.’ Hanyuma aketa omu iraka ery’amaani: “Lazaro, turuka oije!” Ekintu eky’amahano kikabaho: Lazaro akaruga omu kituuro, aboherwe omu bigoye. Yesu akabagambira ati: “Mumuboho’re, mumuleke agende.”

Baingi abarozere Yesu eki yakozere, bakamwikiririzaamu. Baitu abamu bakagenda bagambira Abafalisaayo ekintu Yesu eki yakozere. Kuruga obu, Abafalisaayo bakagonza kwita Yesu na Lazaro. Omu ha bakwenda 12 arukwetwa Yuda Isikalyota, akagenda omu nsita hali Abafalisaayo yabakaguza ati: ‘Nimwija kumpa ziingaha kakuba mbakonyera kuzoora Yesu?’ Bakaikiriza kumuha ebicweka 30 eby’efeeza, kandi Yuda akatandika kuserra omulingo Abafalisaayo barakwatamu Yesu.