Иисустуң Вифанияга үш чоок эжи чурттап турган. Ол дээрге Лазар база ооң кады төрээннери Мария биле Марфа. Бир катап Иисус Иорданның өске талазынга турда, Мария биле Марфа аңаа сөс дамчыткан: «Лазар аажок аарып турар. Дүрген бисче кээп көрем!» Ынчалза-даа Иисус дораан барбаан. Ийи хонук эрткенде, ол өөреникчилеринге: «Вифанияже бараалыңар. Лазар удуп чыдар-дыр, мен ону баргаш оттуруптайн» — дээн. Өөреникчилери: «Лазар удуп чыдар болза, ол дораан экирий бээр» — дишкеннер. Ынчан Иисус оларга: «Лазар чок апарган» — деп дорт чугаалаан.

Лазарның чок апарганындан бээр дөрт хонук эрткенде, Иисус Вифанияга чедип келген. Хөй улус Марфа биле Марияны аргалап турган. Марфа Иисустуң кел чыдарын дыңнап кааш, олче уткуштур халып чеде берген. «Дээрги, сен маңаа турган болзуңза, акывыс өлбес ийик» — деп, ол чугаалаан. Иисус ону оожургадып: «Сээң акың дирлип кээр. Сен аңаа бүзүрээр сен бе, Марфа?» — деп айтырган. «Диргизиишкин үезинде ол дирлип кээр деп бүзүрээр мен» — деп, ол харыылаан. Иисус аңаа: «Мен амы-тын болгаш диргизиишкин-дир мен» — дээн.

Марфа Марияга: «Иисус чедип келди» — деп дамчыткан. Марияның соондан өскелер халчып чеде бергеннер. Мария ооң мурнунга кээп дүшкеш, мөөредир ыглап: «Дээрги, сен маңаа турган болзуңза, акым өлбес ийик!» — дээн. Ооң кайы хире кажыыдап турарын көргеш, Иисус база ыглап эгелээн. Улус ону көргеш: «Лазарга кайы хире ынак турган-дыр, көрүңер даан» — дижип турган. А чамдык улус: «Ол эжинге чоп дузалаваан?» — деп турганнар.

Иисус Лазарның чевээнге чеде бээрге, дыка улуг даш-биле дуглап каан болган. Иисус: «Дашты ап кааптыңар» — дээн. «Дөрт хонук эрте берди! Ооң мага-боду чыдып эгелээн боор» — деп, Марфа чугаалаан. Ынчалза-даа улус дашты ап кааптарга, Иисус мөргээн: «Ачай, мени дыңнап турарың дээш четтирдим. Шупту мөргүлдеримни кезээде дыңнап турарыңны билир мен. Мени сен чоргузупкан деп бо  улус билип каар кылдыр ыыткыр мөргүп тур мен». Оон Иисус ыыткыр: «Лазар, үнүп кел!» — деп кыйгырган. Ынчан кайгамчык чүүл болган: Лазар чевегден үнүп кээрге, ону лён пөс-биле ораап каан болган. Иисус: «Ону чежиптиңер, кылаштазын» — дээн.

Ол хуулгаазынны көрген улус Иисуска бүзүрей берген. Ынчалза-даа чамдык улус фарисейлерге баргаш, ону чугаалаан. Ынчан фарисейлер Лазар биле Иисусту өлүрер деп бодап алган. 12 элчинниң бирээзи Иуда Искариот фарисейлерге бүдүү баргаш, айтырган: «Иисусту тып алырынга дузалаар болзумза, каш акша бээр силер?» Олар аңаа 30 мөңгүн чоос бээрин аазаан. Оон бээр Иуда Иисусту садыптар арга дилеп эгелээн.