Hi Jesus may tulo nga duok nga kasangkayan nga naukoy ha Betania​—hi Lasaro ngan an iya duha nga bugto, hira Maria ngan Marta. Usa ka adlaw, han nakadto hi Jesus ha tabok han Jordan, nagpadara hira Maria ngan Marta hin importante gud nga mensahe: ‘Hi Lasaro may grabe nga sakit. Alayon pakadi dayon!’ Pero waray dayon kumadto hi Jesus. Nagpabilin hiya didto hin duha pa ka adlaw, tapos iya ginsidngan an iya mga disipulo: ‘Pakadto kita ha Betania. Nakaturog hi Lasaro, ngan makadto ako basi pukawon hiya.’ An mga apostol nagsiring: ‘Kon nakaturog hi Lasaro, mabulig ito ha iya nga mag-opay.’ Salit ginklaro ni Jesus an iya karuyag sidngon: ‘Namatay hi Lasaro.’

Pag-abot ni Jesus ha Betania, upat ka adlaw na nga iginlubong hi Lasaro. Damu nga tawo an kinadto kanda Marta ngan Maria basi liawon hira. Pakabati ni Marta nga hirani na hi Jesus, nagdagmit hiya pagtapo ha iya. Hi Marta nagsiring: “Ginoo, kon nakanhi ka la, waray unta kamatay an akon bugto.” Ginsidngan hiya ni Jesus: ‘Mabubuhi an imo bugto. Natoo ka ba hini, Marta?’ Hi Marta binaton: ‘Natoo ako nga mabubuhi hiya ha pagpamanhaw.’ Hi Jesus nagsiring: “Ako an pagkabanhaw ngan an kinabuhi.”

Katapos, kinadto hi Marta kan Maria ngan nagsiring: ‘Aanhi hi Jesus.’ Dinalagan hi Maria tipakadto kan Jesus, ngan sinunod ha iya an mga tawo. Linuhod hiya ha tiilan ni Jesus, ngan duro nga nagtinangis. Hiya nagsiring: ‘Ginoo, kon nakanhi ka la, buhi pa unta an amon bugto!’ Nakita ni Jesus an duro nga kasakit ni Maria, salit nagtangis gihap hiya. Han nakita han mga tawo nga nagtangis hiya, nagsiring hira: ‘Kitaa, hinigugma gud ni Jesus hi Lasaro.’ Pero an iba nagsiring: ‘Kay ano nga ginpabay-an niya nga mamatay an iya sangkay?’ Ano daw la an bubuhaton ni Jesus?

Kinadto hi Jesus ha lubnganan nga ginsadhan hin daku nga bato. Nagsugo hiya: ‘Kuhaa niyo an bato.’ Hi Marta nagsiring: ‘Pero upat ka adlaw na! Mabaho na hiya.’ Bisan pa hito, ginkuha nira an bato, ngan hi Jesus nag-ampo: ‘Amay, salamat kay ginpapamatian mo ako. Maaram ako nga pirme mo ako ginpapamatian, pero nagyayakan ako ha daku  nga tingog basi hibaroan hini nga mga tawo nga ginsugo mo ako.’ Tapos, ginuliat hiya: “Lasaro, gawas!” May nahitabo nga urusahon: Ginawas ha lubnganan hi Lasaro nga putos pa hin nakasangbod nga mga tela. Hi Jesus nagsiring: “Badbari hiya ngan palakta.”

Damu han nakakita hini an tinoo kan Jesus. Pero an iba linakat ngan nagsumat ha mga Pariseo. Tikang hito, karuyag na han mga Pariseo nga patayon hira Lasaro ngan Jesus. Usa han 12 nga apostol, hi Judas Iscariote, an patago nga kinadto ha mga Pariseo ngan nagpakiana: ‘Pira an iyo ibabayad ha akon kon buligan ko kamo nga maaresto hi Jesus?’ Nagkauruyon hira pagbayad hin 30 ka bug-os nga silber, ngan nagtikang hi Judas pamiling hin higayon basi maaresto hi Jesus han mga Pariseo.