Jesuseʼ yaan kaʼach óoxtúul u amigoʼob kajaʼanoʼob Betania. U kʼaabaʼobeʼ Lázaro, María yéetel Marta, letiʼobeʼ sukuʼuntsiloʼob. Juntéenjeak le tiaʼan Jesús tuláakʼ juntséel le río Jordanoʼ túuxtaʼab aʼalbiltiʼ tumen María yéetel Marta: ‹Lázaroeʼ jach kʼojaʼan. Beet uts a séeb taal a wile›. Chéen baʼaleʼ Jesuseʼ maʼ séeb biniʼ. Tu páaʼtaj u máan kaʼapʼéel kʼiin, tsʼoʼoleʼ tu yaʼalaj tiʼ u disipuloʼob: ‹Koʼoneʼex Betania. Lázaroeʼ táan u wenel chéen baʼaleʼ teneʼ táan in bin utiaʼal ka in wajse›. Le apostoloʼoboʼ tu yaʼaloʼob: ‹Wa táan u wenel Lázaroeʼ jeʼel u yutstaleʼ›. Jesús túuneʼ tu yaʼalajtiʼob: ‹Lázaroeʼ tsʼoʼok u kíimil›.

Ka kʼuch Jesús Betaniaeʼ, Lázaroeʼ tsʼoʼok u máan kanpʼéel kʼiin kíimik. Yaʼab máakoʼob bijaʼanoʼob u líiʼsoʼob u yóol Marta yéetel María. Martaeʼ tu yojéeltaj tsʼoʼok u kʼuchul Jesús, le oʼolal bin áalkabil u yile. Tu yaʼalajtiʼ: ‹Yuumtsil, wa tiaʼanech way kaʼacheʼ, bejlaʼa maʼ tu kíimil in wíitsʼineʼ›. Jesuseʼ tu núukajtiʼ: ‹A wíitsʼineʼ yaan u kaʼa kuxtal. ¿Ka creertik wa lelaʼ?›. Letiʼeʼ tu yaʼalajtiʼ: ‹Teneʼ kin creertik yaan u líikʼil ken kaʼa kuxkíintaʼak le kimenoʼoboʼ›. Jesús túuneʼ tu yaʼalajtiʼ: ‹Teen le kuxtaloʼ, bey xan le kaʼa kuxtaloʼ›.

Martaeʼ bin u yaʼal tiʼ María: ‹Way yaan Jesuseʼ›. Maríaeʼ bin áalkabil teʼ tuʼux yaan Jesusoʼ ka bin le máakoʼob tu paachoʼ. Ka kʼuch tu yiknaleʼ, tu xóolkʼabtubaeʼ ka joʼopʼ u sen okʼol. Tu yaʼalajtiʼ: ‹Yuumtsil, wa tiaʼanech way kaʼacheʼ, bejlaʼa maʼ tu kíimil in sukuʼuneʼ›. Ka tu yilaj Jesús táan u sen okʼol Maríaeʼ, káaj u yokʼol xan. Ka tu yilaj le máakoʼob táan u yokʼol Jesuseʼ joʼopʼ u yaʼalikoʼob: ‹Jach tu jaajil u yaabiltmaj kaʼach Lázaro›. Chéen baʼaleʼ yaneʼ táan kaʼach u yaʼalik: ‹¿Baʼaxten maʼ tu beetaj mix baʼal yoʼolal u amigoiʼ?›. Koʼox ilik baʼax ken u beet Jesús.

Jesuseʼ bin teʼ tuʼux yaan le muknaloʼ, lelaʼ junpʼéel sajkab kaʼachi yéetel makaʼan tumen junpʼéel tuunich. Letiʼeʼ tu yaʼalaj: ‹Luʼseʼex le tuunichoʼ›. Chéen baʼaleʼ Martaeʼ tu yaʼalajtiʼ: ‹Míin tsʼoʼok u káajal u yantal u book, tumen tsʼoʼok kanpʼéel kʼiin kíimik›. Kex beyoʼ tu luʼsoʼob le tuunichoʼ ka orarnaj Jesús: ‹In Yuum, kin tsʼáaiktech gracias tumen táan a wuʼuyik in oración. In wojel mantatsʼ ka wuʼuyiken, pero táan in tʼaan kʼaʼam utiaʼal ka u creert le yaʼabkach máakoʼobaʼ teech túuxtmilen›.  Ka tsʼoʼokeʼ tu kʼaʼam aʼalaj: ‹¡Lázaro, jóokʼen!›. Teʼ súutukoʼ jóokʼ Lázaro teʼ muknal bakʼaʼan u wíinklil yéetel nookʼoʼ. Jesús túuneʼ tu yaʼalaj: ‹Luʼseʼex le nookʼ bakʼaʼantiʼoʼ ka a chaʼex u bin›.

Yaʼab tiʼ le máaxoʼob tu yiloʼob le baʼax úuchoʼ tu tsʼáaj u fejoʼob tiʼ Jesús, chéen baʼaleʼ yanoʼobeʼ bin u tsikbaltoʼob tiʼ le fariseoʼoboʼ. Desde le kʼiin jeʼeloʼ le fariseoʼoboʼ tu chʼaʼtukloʼob bix ken u kíimsoʼob Lázaro yéetel Jesús. Judas Iscariote, juntúul tiʼ le 12 apostoloʼoboʼ, taʼakunbail úuchik u bin u yil le fariseoʼoboʼ ka tu kʼáatajtiʼob: ‹¿Bajux ken a tsʼáaʼexten wa ka in kʼubteʼex Jesús?›. Letiʼobeʼ tu yaʼalaj u tsʼáaikoʼob 30 u pʼéelal u taakʼinil plata tiʼ. Judaseʼ tu kʼamaj le taakʼinoʼ ka joʼopʼ u kaxtik bix jeʼel u kʼubik Jesús tiʼobeʼ.