Daa jeha a, Yuda bi ɔmɛ yeɔ He Tsɔmi ɔ ngɛ Nisan nyɔhiɔ ɔ ligbi 14 ɔ nɔ. Enɛ ɔ ha nɛ a kaiɔ bɔ nɛ Yehowa plɛ kɛ kpɔ̃ mɛ kɛ je nyɔguɛ yemi mi ngɛ Ijipt nɛ e kɛ mɛ ba Si Womi Zugba a nɔ ɔ. Ngɛ jeha 33 ɔ mi ɔ, Yesu kɛ e bɔfo ɔmɛ ye He Tsɔmi ɔ ngɛ hiɔwe tsu ko mi ngɛ Yerusalɛm. Benɛ a ye ní ɔ ta a, Yesu de mɛ ke: ‘Nyɛ ti nɔ kake maa tsɔɔ ye se blɔ.’ Nɔ́ nɛ Yesu de ɔ pee bɔfo ɔmɛ nyakpɛ, nɛ a bi Yesu ke: ‘Mɛnɔ?’ Yesu ha mɛ heto ke: ‘Nɔ nɛ ma ngɔ abolo nɛ ɔ kɛ ha a, lɛ.’ Kɛkɛ nɛ Yesu ha Yudas Iskariot abolo. Amlɔ nɔuu ɔ, Yudas te si, nɛ e je kpo ngɛ tsu ɔ mi.

Kɛkɛ nɛ Yesu sɔle, nɛ e ku abolo ɔ tsɔwitsɔwi, nɛ e gba ha bɔfo kpa amɛ. E de mɛ ke: ‘Nyɛɛ ye abolo nɛ ɔ. E daa si ha ye nɔmlɔ tso nɛ ma kɛ ha ngɛ nyɛ he ɔ.’ Lɔ ɔ se ɔ, e kpale sɔle, nɛ e ha e bɔfo ɔmɛ wai. E de mɛ ke: ‘Nyɛɛ nu wai nɛ ɔ. E daa si ha ye muɔ nɛ ma kɛ ha konɛ a ngɔ adesahi a yayamihi kɛ pa mɛ ɔ. I ngɛ nyɛ si woe kaa nyɛ maa piɛɛ ye he kɛ ye matsɛ ngɛ hiɔwe. Nyɛɛ pee enɛ ɔ daa jeha kɛ kai mi.’ Daa jeha a, ke jamɛ a be ɔ su ɔ, Yesu se nyɛɛli buaa a he nya gbɔkuɛ kɛ kaiɔ e gbenɔ ɔ. Mwɔnɛ ɔ, a tsɛɔ jamɛ a niye ní ɔ nɛ Yesu se nyɛɛli ɔmɛ buaa a he nya kɛ yeɔ ɔ ke Nyɔmtsɛ ɔ Gbɔkuɛ Niye Ní.

 Benɛ a ye ní ɔ ta a, bɔfo ɔmɛ ngɛ hlae nɛ a le nɔ nɛ ji nɔmlɔ ngua pe kulaa ngɛ a kpɛti, enɛ ɔ he ɔ, a bɔni nya sami. Se Yesu de mɛ ke: ‘Nɔ nɛ naa e he kaa jokuɛ, loo e ba si pe kulaa a, lɛ ji nɔmlɔ ngua ngɛ nyɛ kpɛti.’

‘Ye huɛmɛ ji nyɛ. Nɔ́ fɛɛ nɔ́ nɛ ye Tsɛ ɔ suɔ kaa ma de nyɛ ɔ, i deɔ nyɛ. E be kɛe nɛ ma je kɛ ho ye Tsɛ ɔ ngɔ ya ngɛ hiɔwe. Ma je nyɛ he, nɛ ke nihi na kaa nyɛ suɔ nyɛ he ɔ, a maa na kaa ye kaseli ji nyɛ. Nyɛɛ suɔ nyɛ he kaa bɔ nɛ i suɔ nyɛ ɔ.’

Nyagbe kulaa a, Yesu sɔle nɛ e de Yehowa ke é bu kaseli ɔmɛ a he. E de Yehowa ke é ye bua mɛ konɛ a pee kake kɛ tsu ní. E sɔle konɛ Yehowa biɛ ɔ he nɛ tsɔ. Lɔ ɔ se ɔ, Yesu kɛ e bɔfo ɔmɛ la yi jemi lahi ha Yehowa, nɛ a je kpo ngɛ tsu ɔ mi. Jehanɛ lɛɛ e be kɛe nɛ a maa nu Yesu.