Juyahudi gibed gitimo foc mi Kadhukuwijo kubang’ oro i nindo 14 mi dwi mi Nisan. Eno ubed upoyo wigi i kum ayi ma Yehova ugam ugonyo kogi kud i ng’eca i Misiri man eterogi i Ng’om mi lembang’ola. I oro 33 R.M., Yesu karacelo ku jukwenda pare gitimo foc mi Kadhukuwijo i kusika moko ma malu i Yerusalem. Kinde ma cam ubecithum, Yesu uyero kumae: ‘Ng’atu acel m’i kindwu biciba.’ Can umaku jukwenda, uketho gipenje kumae: ‘Tie ng’a?’ Yesu udwoko igi kumae: ‘Tie ng’atu m’abimio ire mukathi.’ I ng’eye, emio dund mukathi ni Yuda Iskariote. E ndhundhu nica, Yuda uai man ewok kud i ot.

I ng’eye, Yesu ugam urwo, eng’weko i mukathi man emio i cing jukwenda m’udong’. Eyero igi kumae: ‘Wucam mukathi maeni. Ebenyutho kuma, m’abimio piwu.’ Bende erwo iwi divai moko man emie ni jukwenda pare. Eyero kumae: ‘Wumadh divai maeni. Ebenyutho rimba m’abimio wek kara dubo ukabere. Ang’olo nia wubibedo ubimo karacelo kuda i polo. Wubed utim lembe maeni kubang’ oro pi nipoi pira.’ Julub pa Yesu gibed gicokiri asu uthieno mi nindo 14 mi dwi mi Nisan kubang’ oro. Cokone julwong’o Cemo mir uthieno pa Rwoth.

 I ng’ei ma gidaru cam, jukwenda gicaku teliri nia ng’a m’i kindgi ma pire tek nisagu. Ento Yesu uwacu igi kumae: ‘Ng’atu ma dit nisagu i kindwu utie ng’atu m’ubenenere en gire nia e nyathin man pire tek ungo.’

‘Wutie jurimba. Ayero iwu lembe ceke ma Vwa umito ayer iwu. Adhingo cidho i bang’ Vwa i polo. Ento wun wubidong’, man dhanu ceke bing’eyo nia wutie julubna ni kum mer ma wutie ko i kindwu. Wicikuru nimeruru i kindwu tap calu ma an de amaruwu.’

Tokcen ne, Yesu urwo man ekwayu Yehova ugwok julub pare ceke. Ekwayu Yehova ukonygi kara gitim tic karacelo i kwiocwiny. Erwo kara nying’ Yehova ubed leng’. E Yesu ku jukwenda pare giwero wer mi pak ni Yehova man giwok woko. Nwang’u saa ma jubecimaku ie Yesu udhingo.