Judionakajj sapa maraw 14 de nisán urojj Pascua amtapjjerïna. Ukhamatwa kunjamsa Jehová Diosajj Egipto markat salvanïna, Suma Oraqerus irpantäna uk amtapjjerïna. 33 maranjja Jesusampi apostolonakampejj Jerusalén markanwa mä altus utan Pascua amtapjjäna. Manqʼañ tukuyjjapjjäna ukhajja, Jesusajj akham sänwa: “Mayniw jumanak taypit aljantitani” sasa. Apostolonakajj llakitaw akham jisktʼapjjäna: ‘¿Khitisa?’ sasa. Jesusajj sarakïnwa: ‘Khitirutï aka tʼantʼa churkta uka jaqewa’ sasa. Ukatsti pachjat tʼantʼa Judas Iscarioter churäna. Judasajj ukaratpachaw sarjjarakïna.

Ukatjja Jesusajj mä oración lurasaw apostolonakar mä tʼantʼa pachjas churäna. Akham sarakïnwa: ‘Aka tʼantʼa manqʼapjjam, akajj cuerpoj sañ muni. Jumanakar salvañatakiw churäjja’ sasa. Ukatsti vinotak mä oración lurasaw apostolonakar vino pasayäna, akham sasa: ‘Taqen umtʼapjjam. Aka vinojj wilaja sañ muni, juchanak perdonañatakiw churäjja. Nayaw sapjjsma, jumanakajj nayamp chikaw alajjpachan reyit apnaqapjjäta. Akjja nayat amtañatak sapa mara lurapjjapunim’ sasa. Jesusan arkirinakapajj sapa marapuniw uka pachpa fechan jichhakama inti jalantarojj tantachasipjje. Ukaw Jesusan Cenapa satajja.

 Cena tukuyarojja apostolonakajj ‘khitis jiwasat jukʼamp jilïrejja’ sasaw jiskhisipjjäna. Ukampis Jesusajj akham sänwa: ‘Khititejj jumanak taypin jilïrïñ munki ukajja, taqetsa sullkaru jiskʼaru tukuñapawa’ sasa.

Jesusajj saskakïnwa: ‘Jumanakajj amigojäpjjtawa. Ukatwa taqe kunanaktï Awkijajj jumanakar yatiyañaj munki ukanak yatiyapjjsma. Alajjpachankir awkijan ukarojj niyaw kuttʼjjäjja. Ukampis jumanakajj akanwa quedasipjjäta. Maynit maynikam munasipjjatam uñjasaw jaqenakajj nayan discipulojäpjjatam yatipjjani. Kunjamtï munasipksma ukhamwa maynit maynikam munasipjjañama’ sasa.

Tukuyarojja taqpach discipulonakapar cuidañapatakiw Jehová Diosar orasïna. Ukatjja discipulonakapan mayachtʼata, jan chʼajjwasa servipjjañapatakiw orasirakïna. Ukhamarakiw Diosan Jehová sutipajj jachʼañchatäñapatak orasïna. Ukatjja Jesusampi apostolonakapampejj cantasaw Jehová Diosar jachʼañchapjjäna, ukatsti sarjjapjjänwa. Jesusar katuntapjjañapatakis jukʼakiw faltjjarakïna.