ISAMBILILO 87
Umulalilo wa kwa Yesu
AbaYuda balesefya Ica Kucilila cila mwaka pa bushiku bwalenga 14 mu mweshi wa Nisani. Ico balesefesha ni pa kuti baleibukisha ifyo Yehova afumishe abena Israele mu Egupti umo bali abasha no kubatwala mu Calo ca Bulayo. Mu mwaka wa 33, Yesu na batumwa bakwe balisefeshe Ica Kucilila mu muputule uwali pa muulu mu Yerusalemu. Ilyo bapwishishe ukulya, Yesu atile: ‘Umo pali imwe alenjalukila.’ Abatumwa balipapile ifyo alandile, kabili bamwipwishe ati: ‘Ni nani walamwalukila?’ Yesu ayaswike ati: ‘Mwaume uo nalapeela uyu mukate.’ Lyena apeele Yuda Iskariote umukate. Apo pene, Yuda alimine aya no kuya.
Yesu alipepele, amokaula umukate, e lyo apeela abatumwa bakwe abashalepo. Yesu abebele ati: ‘Lyeni uyu umukate. Uleimininako umubili wandi, uo nalapeela pa mulandu wenu.’ Lyena apepele na pa mwangashi, kabili apeele abatumwa bakwe. Abebele ati: ‘Nweni uyu umwangashi. Uleimininako umulopa wandi, uo nalapeela pa kuti imembu shile-elelwa. Namulaya ukuti mukaba ishamfumu ku muulu pamo na ine. Mulecita ifi fine cila mwaka pa kuti mulenjibukisha.’ Cila mwaka abasambi ba kwa Yesu balakumana icungulo pali ubu bushiku. Uku ukukumana bakwita ukuti Umulalilo wa kwa Shikulu.
Ilyo bapwile ukulya, abatumwa batendeke ukutalikana, balefwaya ukwishiba uwali umukalamba pali bena. Nomba Yesu abebele ati: ‘Umukalamba sana pali imwe ni uyo uuimona ukuti mwaice pali bonse, uuimona ukuti tacindama ukucila bambi.’
‘Muli banandi. Ndamweba fyonse ifyo Tata afwaya ukuti imwebe. Nomba line nalabwelelamo kuli Tata ku muulu. Tamwakakonke, lelo abantu bakeshiba ukuti muli basambi bandi nga muletemwana. Mulingile ukutemwana nga ifi fine namutemwa.’
Pa kulekelesha, Yesu alipepele, alombele Yehova ati alecingilila abasambi bakwe bonse. Alombele Yehova ukuti alebafwa pa kuti balebombela pamo mu mutende. Apepele ukuti ishina lya kwa Yehova libe ilya mushilo. Lyena Yesu na batumwa bakwe balimbile inyimbo sha kulumbanya Yehova kabili balifumine pa nse. Inshita yalipaleme iya kuti Yesu bamwikate.
“Mwilatiina, mwe mukuni unono, pantu Shinwe afwaya ukumupeela ubufumu.”—Luka 12:32
Nalimo Kuti Mwatemwako ne fi
YESU E NSHILA, ICINE NO MWEO
Umulaalilo wa kwa Shikulu
Yesu atendeke Icibukisho ico abasambi bakwe balingile ukulaibukisha cila mwaka pa Nisani 14.
YESU E NSHILA, ICINE NO MWEO
Abasambilisha Isambililo lya Kuicefya pa Ca Kucilila ca Kulekeleshako
Alipapwishe abatumwa ilyo abombele umulimo uwalebomba abasha.
YESU E NSHILA, ICINE NO MWEO
Yesu Apepa Ipepo lya Kulekelesha mu Muputule wa pa Muulu
Yesu alilondolwele bwino ukuti alicitile icintu icacindama icacilile pa kupususha abantu.
AMEPUSHO ABANTU BEPUSHA SANA
Mulandu Nshi Ifyo Inte sha kwa Yehova Bacita Umulaalilo wa kwa Shikulu Fyapusanina ne fyo Imipepele Imbi Icita?
Umulalilo wa kwa Shikulu nelyo Icibukisho ca mfwa ya kwa Kristu, e kulongana ukwacindamisha uko Inte sha kwa Yehova bakwata. Moneni ifyo Baibolo ilanda pali uku kulongana.
