Kalak Jahudi ngerayaken Paskah bas tanggal 14 bulan Nisan tiap tahun. Perayan e guna ngingetken maka kalak e budak nge mbarenda i Mesir, tapi ibebasken Jahwe kalak e janah ibabaNa ku Taneh Perjanjin. Bas tahun 33 M, Jesus ras rasul-rasulna ngerayaken Paskah i datas tingkat rumah, i Jerusalem. Sanga man, nina Jesus, ‘Lit kari si nghianati aku arah kena nari.’ Megi si e, sengget me rasul-rasul, janah isungkunna, ‘Ih, ise kin e?’ Nina Jesus, ‘Kalakna eme si kubereken roti enda.’ Nce, iberena me roti man Judas Iskariot. Kenca e, mis Judas lawes nadingken kalak e.

Dung e, ertoto Jesus, nce ipecah-pecahkenna roti si merampek e, janah ibagi-bagikenna man rasul-rasulna. Nina, ‘Panlah roti enda. Enda ngertiken dagingku, si ateku kubereken man bandu.’ Nce, itotokenna ka lau anggur janah ibagikenna ka. Nina, ‘Minemlah anggur enda. Enda ngertiken darehku si ateku kubereken, gelah dosa-dosa banci iampuni. Erjanji aku maka kena ras aku pagi jadi raja i surga. Banlah bagenda tiap tahun guna nginget aku.’ Seh asa gundari, kerina pengikut Jesus terus ngerayaken si e tiap tahun. Perayan e gundari igelari Peringet-ingeten Kematen Kristus.

 Kenca dung man, rubati rasul-rasul perban ncakapken ise si pentingna. Tapi nina Jesus man kalak e, ‘Si kitikna ras si meterukna akapna ia, ia me kalak si pentingna.’

‘Kena me teman-temanku. Kerina si iajarken Bapak man bangku nggo kukataken man kena. Kentisik nari, lawes me aku ndahi Bapakku i surga. Kena pudin reh. Itandai kalak me kena murid-muridku adi kena sikeleng-kelengen. Arus kena sikeleng-kelengen bagi aku ngkelengi kena.’

Dungna, ertoto me Jesus man Jahwe gelah ilindungiNa rasul-rasul e. Ipindona ka man Jahwe gelah kalak e kerja sama alu dame. Itotokenna ka gelah ipebadiaken gelar Jahwe. Kenca si e, Jesus ras rasul-rasulna rende muji Jahwe, dung e lawes me kalak e. Kentisik nari, itangkap me Jesus.