LONGESO 87
Kulia cha Yesu cha Kasula
A-Yunda te kakulinga chiwanyino cha Chizomboka hita mwaka ha tangwa 14 lia kakweji wa Nisane. Chino te cha kweewulula chize Yehova aapulwile mu undungo ku Engitu ni kwaatwala mu Chifuchi cha Chilakenyo. Ha mwaka 33 M.J., Yesu ni apostolo jenyi yalingila Chiwanyino cha Chizomboka mu chipatulo cha kwilu mu Yerusaleme. Muze hahwisa kulia chacho, Yesu yamba ngwenyi: ‘Umwe hakachi kenu mangukunjika.’ Apostolo yevwa chinyengo, chocho yahula Yesu ngwo: ‘Iya mwenawo?’ Yesu yaamba ngwenyi: ‘Kali lunga yoze munguhana lumbolo yono.’ Mba hi yahana chipinji cha lumbolo kuli Yundase Ka-Keriote. Hazehene, Yundase yatuhuka mu chipatulo yaya kwenyi.
Chocho, Yesu yalemba, nawa yapalula mbolo mu yihanda, yayihana kuli apostolo waze asalileho. Yamba ngwenyi: ‘Lienu mbolo yino. Mumu yinalumbunuka mujimba wami, uze mungukahana hali yenu.’ Nawa yalembela vinyu, ni kuyihana kuli apostolo jenyi. Yamba ngwenyi: ‘Nwenu vinyu ai. Mumu yinalumbunuka manyinga jami, waze mungukahana hanga akakonekene shili yenu. Ngunanulakenya ngwo munukapwa mianangana hamwe ni yami mu malilu. Pwenu ni kulinga chiwanyino chino hita mwaka nukangwiwuluke.’ Kashika tumbaji twa Yesu akulikungulula hanga alinge chiwanyino chacho hita mwaka. Kukunguluka chacho kakuchivuluka musono ngwo, Chiwanyino cha Mwene cha Ufuku.
Muze ahwishile kulia, apostolo yaputuka kulihamika hanga te anyingike yoze munene hakachi ko. Alioze Yesu yaamba ngwenyi: ‘Munene hakachi kenu kali yoze unalimono mwene ngwe kanuke, yoze keshi ulemu.’
‘Yenu nuli masepa jami. Mumu nakunulweza yuma yeswe yize Tata anazange hanga ngunulweze. Kwasala hakehe ngunayi kuli tata mu malilu. Yenu munukasala, atu makanyingika ngwo, nuli tumbaji twami ha kupwa ni zango kuli umwe ni mukwo. Nwatamba kulizanga umwe ni mukwo ngwe chize ami nakunuzanga.’
Hi kusongo, Yesu yalemba ni kwita kuli Yehova hanga afunge tumbaji twenyi. Yeta kuli Yehova hanga aakwase akalakale hamuwika ni sambukila. Yesu yalemba hanga jina lia Yehova lipwe lisandu. Mba iye ni apostolo jenyi yahalisa Yehova ni miaso, chocho yatuhuka haze. Mashimbu te hakundama kulu hanga Yesu amukwate.
“Kanda nwivwa woma, yenu mbunga yikepe ya mapanga, mumu chinawahila Tatenu kunwaha we wanangana.”—Luka 12:32
Kota Muzanga Chinji Yuma Yize Mumona
YIHULA YIZE ATU AKUHULA CHINJI
Mumu Liaka Yela ja Yehova Akwiwuluka Chiwanyino cha Mwene cha Ufuku mu Jila Yalisa?
Chiwanyino cha Mwene cha Ufuku hanji ngwetu Chiwanyino cha Kwiwuluka Kufwa cha Yesu, chili chimwe chiwanyino chilemu chinji kuli Yela ja Yehova. Tala yize Mbimbiliya yakwamba hakutwala ku chiwanyino chacho.
