Im Jahr 33 fiiret Jesus in Jerusalem mit sine Aposchtel s Passah. Si mached das im obere Stock vomene Huus. D Jude fiired das Fescht jedes Jahr am 14. Nisan. Das Fescht hilft ihne dra z denke, was Jehova für si gmacht het. Er het si nämlich us Ägypte befreit, wo si Sklave gsi sind, und si is versprochene Land bracht. Gege s Endi vom Passah seit Jesus zu ihne: «Eine vo euch wird mich verrate.» D Aposchtel sind schockiert und fraged: «Wer isch es?» Jesus git zur Antwort: «Es isch dee, wo ich das Stück Brot gib.» Er git denn em Judas Iskariot es Stück Brot. De Judas staht grad uf und gaht.

Jesus macht jetzt es Gebet, nimmt es Brot und verteilts de 11 übrige Aposchtel. Er seit zu ihne: «Essed das Brot. Es bedütet min Körper, wo ich für euch wird opfere.» Er nimmt denn en Becher Wii, betet und git ihn de Aposchtel. Er seit: «Trinked dee Wii. Er bedütet mis Bluet, wo ich wird gee, dass Sünde chönnd vergee werde. Ich verspreche, dass ihr mit mir zäme Könige im Himmel werded sii. Mached das jedes Jahr zur Erinnerig a mich.» Us dem Grund versammled sich au hüt no alli, wo Jesus nachefolged, am 14. Nisan. D Bible seit dere Fiir «Abigmahl vom Herr».

Nach em Abigmahl striited d Aposchtel mitenand da drüber, wer vo ihne de Wichtigscht isch. Jesus erklärt ihne: «De Gröscht vo euch isch dee, wo sich wie de Chliinscht und Unwichtigscht benimmt.

Ihr sind mini Fründe. Ich verzell euch alles, wo min Vater euch wett säge. Glii gah ich i Himmel zu mim Vater. Ihr werded aber da bliibe. Wenn ihr enand gern hend, werded d Mensche merke, dass ihr mini Jünger sind. Ihr sölled enand gern ha, so wie ich euch gern gha ha.»

Am Schluss betet Jesus, dass Jehova all sini Jünger beschützt. Er bittet Jehova au, ihne z helfe, dass si chönnd in Fride zämeschaffe. Er betet no drum, dass de Name vo Jehova gheiliget wird – das bedütet, dass mal alli de Name vo Jehova als öppis Reins und ganz Bsundrigs alueged. Jesus und sini Aposchtel singed jetzt no Lieder, zum Jehova z lobe und göhnd use. De Moment, wo Jesus verhaftet wird, chunnt immer nöcher.