Naaʼinrapuʼuin juyawai na judíokana tü miʼiraa kanüliakat Pascua, naaʼinrüin shia soʼu kaʼikat 14 soʼu kashikat nisán. Sutuma tia miʼiraakat, sotusü naaʼin taashin naya nutuma Jeʼwaa suulia achepchieein naya chaa Egipto otta nuʼunirüin naya sünainmüin tü Mma Anasü nüküjakalü achiki paala namüin. Soʼu tü juyakat 33 soʼu wakalia, yalajachi Jesuu namaa na aluwataaushiikana sünain tü ekawaa süpülajatkat tü Pascuakat. Sulujana naya wanee piichi iipünaasü chaa Jerusalén. «Aapüneechi ekii taya nutuma wanee jaʼakajee», nümaka Jesuu namüin na aluwataaushiikana süchikijee nekaain. Mojusü maʼin naaʼin na nikirajüinkana sutuma tü nümakat Jesuu namüin. «¿Jarai chi paashajaakai achiki?», namaka nümüin. Nusoutaka Jesuu namüin: «Chi aapüinjachikai tekii, nieechi chi taapüinjachikai amüin shiʼipa tü pankat». Naapaka shiʼipa pan nümüin chi kanüliakai Judas Iscariote, nujuʼitamaataka Judas namaʼanajee.

Naapaaka Jesuu wanee pan sünain naapüin analuʼut nümüin Maleiwa saaʼu. Nüshaletaka shiʼipawalin shia namüin na aluwataaushiikana. «Jaapaa jikaiwa tü pankat. Maʼaka taapüin jooluʼu jümüin tü pankat, shiyaawasesü taapajiraainjachin tekii jaaʼu jiakana», nümaka namüin. Naapaaka joo Jesuu wanee iita kaluʼusü wiino sünain naapüin analuʼut nümüin Maleiwa saaʼu. Naapaka shia namüin sünain nümüin namüin: «Anakajaʼa müleka jüsüle tü wiinokot. Wiinokot tüü, shiyaawasesü tü tasha amülainjatkat süpüla sülatinnajatüin saainjala wayuu süpüshuaʼa. Shiimüin sünain aluwataainjanain jia tamaa chaa iipünaa. Tü waaʼinrakat jooluʼu, süpülajatü jaaʼinrüin waneepia süpüla sotuinjachin jaaʼin taya». Ayatüsü naaʼinrüin tia juyawai na nümaajanakana Jesuu. Sünülia tia  outkajawaakat natuma: Tü Ekawaa aipaʼajatkat nutuma chi Senyotkai.

Jee süchikijee, oʼttushii naya sünain aʼülüjaajirawaa saaʼu jaralin miyoʼuin naʼakajee. «Chi wayuu laülaweekai jaʼaka, acheküshi jüüjüüinjachin jümüin jüpüshuaʼa», nümaka Jesuu namüin.

Anuu sooʼomüin nünüiki Jesuu namüin: «Aluʼujasaʼa jiakana, tatünajunnuu süka taküjain jümüin süpüshuaʼa tü aküjünakat tamüin nutuma chi Tashikai. Alüʼütsü takalia süpüla toʼunuinjachin nümaʼanamüin chi Tashikai. Akanasaʼa jiakana, makatüinjana jia yaa saaʼu tü mmakat. Müleka shiimainre sünain aijiraain jia jüpüla, ayaawatüneena jia sutuma wayuu süpüshuaʼa sünain tekirajanain jia. Anashii aijiraale jia jüpüshuaʼa maʼaka alin maʼin jia tapüla».

Nuchuntaka mapa Jesuu nümüin Jeʼwaa süpüla nükaaliinjain na nikirajüinkana otta süpüla paaʼinwain naya otta talatüin naaʼin sünain aʼyatawaa nümüin Maleiwa. Achuntushi mapa Jesuu süpüla wuleinjatüin tü nünüliakat Jeʼwaa. Süchikijee tia, eeʼirajüshii naya wanee jayeechi süpüla naʼwaajüin Jeʼwaa, nojuʼitaka mapa. Alüʼütsü maʼin sükalia süpüla nütaʼünüinjachin Jesuu.