Kada tuig, ang mga Judiyo nagaselebrar sang Paskua sa ika-14 nga adlaw sang bulan sang Nisan. Ginapahanumdom sila sini nga ginhilway sila ni Jehova sa pagkaulipon sa Egipto kag gindala sila sa Ginsaad nga Duta. Sang tuig 33 C.E., ginselebrar ni Jesus kag sang iya mga apostoles ang Paskua sa isa ka kuarto sa ibabaw sa Jerusalem. Sang manugtapos na sila kaon, si Jesus nagsiling: ‘Isa sa inyo ang magatraidor sa akon.’ Nakibot ang mga apostoles, gani ginpamangkot nila si Jesus: ‘Sin-o?’ Si Jesus nagsiling: ‘Sia amo ang tawo nga hatagan ko sini nga tinapay.’ Dayon ginhatagan niya sing tinapay si Judas Iscariote. Nagtindog dayon si Judas kag naggua sa kuarto.

Dayon nangamuyo si Jesus, gintipiktipik ang tinapay kag ginhatag sa iya mga apostoles nga ara didto. Sia nagsiling: ‘Kaon kamo sini nga tinapay. Nagakahulugan ini sang akon lawas nga ihatag ko sa inyo.’ Dayon nangamuyo sia para sa alak, kag ginhatag ini sa iya mga apostoles. Sia nagsiling: ‘Inom kamo sini nga alak. Nagakahulugan ini sang akon dugo, nga ihatag ko para mapatawad ang mga sala. Ginapromisa ko nga mangin mga hari kamo kaupod ko sa langit. Himua ninyo ini kada tuig bilang pagdumdom sa akon.’ Nagatipon gihapon ang mga sumulunod ni Jesus sa sina nga gab-i kada tuig. Ina nga pagtilipon ginatawag subong nga Panihapon sang Ginuo.

 Pagkatapos nila kaon, nagbinaisay ang mga apostoles kon sin-o ang pinakamataas sa ila. Pero ginsilingan sila ni Jesus: ‘Ang isa nga pinakamataas sa inyo amo ang nagakabig sa iya kaugalingon bilang kamanghuran, ang pinakamanubo.’

‘Mga abyan ko kamo. Ginsugid ko sa inyo ang tanan nga gusto sang Amay nga isugid ko sa inyo. Sa indi madugay makadto ako sa Amay sa langit. Magapabilin kamo, kag mahibaluan sang mga tawo nga mga disipulo ko kamo paagi sa gugma ninyo sa isa kag isa. Dapat ninyo palanggaon ang isa kag isa pareho sang pagpalangga ko sa inyo.’

Dayon nangamuyo si Jesus, nga nagapangabay kay Jehova nga proteksionan ang tanan nga disipulo. Ginpangabay niya si Jehova nga buligan sila nga mahiusa kag makapanghikot sing mahidaiton. Nangamuyo sia nga mapakabalaan ang ngalan ni Jehova. Dayon nagkanta si Jesus kag ang iya mga apostoles sing mga pagdayaw kay Jehova kag naggua sila. Dali na lang dakpon si Jesus.