ZAJ 87
Yexus Pluas Hmo Zaum Kawg
Txhua xyoo cov Yudai ua Kevcai Hla Dhau rau lub hli Nixa, tim 14. Lawv ua li no kom nco txog lub caij Yehauvas tso lawv dim cev qhev hauv Iyi tebchaws, los nyob lub tebchaws uas nws tau cog tseg rau lawv. Nyob rau xyoo 33 T.Q.Y., Yexus thiab nws cov tubtxib tuaj ua Kevcai Hla Dhau hauv Yeluxalees rau ib chav tsev uas nyob sab saud. Thaum lawv noj hmo tag, Yexus hais tias: ‘Nej cov no ib tug yuav fav xeeb rau kuv.’ Cov tubtxib txawm poob siab nthav thiab nug Yexus tias: ‘Yog leejtwg?’ Yexus teb tias: ‘Nws yog tus uas kuv yuav cev qhov ncuav no rau.’ Ces Yexus txawm muab ib qho ncuav cev rau Yudas Ikahli-au. Tamsid ntawd, Yudas txawm sawv tsees tawm mus lawm.
Thaum Yexus thov Vajtswv tag, nws muab lub ncuav ntais cev rau cov tubtxib uas tseem nrog nws ua ke noj. Nws hais tias: ‘Cia li noj. Lub ncuav no piv txog kuv lub cev uas kuv yuav muab pub rau nej.’ Tom qab ntawd, Yexus thov Vajtswv txog cov cawv txiv hmab ces nws muab rau cov tubtxib haus. Nws hais tias: ‘Cia li haus. Khob cawv txiv hmab no piv txog kuv cov ntshav uas kuv yuav muab ntxuav nej lub txim. Kuv cog lus rau nej tias nej yuav tau nrog kuv ua vajntxwv kav saum ntuj ceeb tsheej. Cia li ua li no nej thiaj nco ntsoov kuv.’ Yog li ntawd, txhua xyoo Yexus cov thwjtim thiaj sib txoos ua ke los nco txog tus Tswv Pluas Hmo.
Thaum noj hmo tas, cov tubtxib sib cav tias leejtwg yuav yog tus loj dua. Tiamsis Yexus hais rau lawv tias: ‘Tus uas loj dua ntais yuav tsum pom tias nws yog tus me dua ntais thiab tsis tseem ceeb li.
Nej yog kuv cov kwvluag. Kuv qhia txhua yam raws li kuv Txiv xav kom kuv hais rau nej xwb. Tshuav tsis ntev kuv yuav tseg nej cia, kuv yuav mus cuag kuv Leej Txiv uas nyob saum ntuj ceeb tsheej. Yog nej ib leeg hlub ib leeg, sawvdaws yuav paub tias nej yog kuv cov thwjtim. Nej yuav tsum sib hlub ib yam li kuv twb hlub nej lawm.’
Thaum kawg, Yexus thov kom Yehauvas tsom kwm nws cov tubtxib thiab pab kom lawv koom tau ib lub siab ua haujlwm nyob sib haum xeeb ua ke. Nws kuj thov kom Yehauvas lub npe dawb huv thiab. Yexus thiab nws cov tubtxib hu nkauj qhuas Yehauvas ua ke tas ces lawv txawm tawm mus lawm. Twb yuav txog lub sijhawm uas luag tuaj ntes Yexus.
“Pab nyuag yaj me me, nej tsis txhob ntshai, vim tias nej leej Txiv txaus siab pub lub [Nceeg Vaj] ntawd rau nej.”—Luka 12:32
Tej Yam No Yuav Pab Tau Koj Thiab
TEJ UAS COOB TUS NUG TXOG
Vim Li Cas Yehauvas Cov Tim Khawv Ua Tus Tswv Pluas Hmo Txawv Ntawm Lwm Cov Kev Ntseeg?
Tus Tswv Pluas Hmo kuj hu ua “tus Tswv Rooj Mov” los sis kev cai nco txog Yexus txoj kev tuag. Hmo ntawd yog ib hmo uas tshwj xeeb heev rau Yehauvas Cov Tim Khawv. Phau Vajlugkub yeej qhia ntxaws ntxaws tias yuav ua tus Tswv Pluas Hmo li cas.
