Yuda ni gaw Nisan shata 14 ya shani hta, Shalai Wa Ai Poi hpe shaning shagu galaw ma ai. Dai poi gaw Yuda masha ni hpe Egutu mung a mayam prat kaw nna, Ga Sadi Tawn Da Ai Mungdan de woi sa ai hpe dum na matu re. A.D. 33 hta, Yesu hte shi a kasa ni gaw Yerusalem kaw nga ai, nta langai a ntsa htap na gawk langai hta, Shalai Wa Ai Poi hpe galaw nga ma ai. Poi ngut na mahka hta, Yesu ndai hku tsun ai: ‘Nanhte kaw nna marai langai mi gaw ngai hpe hpyen ni a lata de ap ya na re.’ Kasa ni gaw grai kajawng mat nna, ndai hku san ai: ‘Kadai wa rai kun?’ Yesu ndai hku tsun ai: ‘Ngai muk jaw ai wa re.’ Dai hpang, muk hpe Yuda Iskarut hpe jaw dat ai. Shaloi, Yuda gaw kalang ta gawk kaw nna pru mat ai.

Dai hpang, Yesu gaw akyu hpyi nna muk hpe ahkyep alep galaw nna, ngam ai kasa ni hpe gam jaw ai. Shi ndai hku tsun ai: ‘Ndai muk hpe sha mu. Dai gaw nanhte a matu ngai jaw ya na nye a hkum hpe malai hku nna tsun ai re.’ Dai hpang, tsabyi jahku a matu akyu hpyi nna, kasa ni hpe gam jaw ai. Shi ndai hku tsun ai: ‘Ndai tsabyi jahku hpe lu mu. Dai gaw nanhte a mara raw kau ya na matu ngai jaw ya na nye a asai hpe malai hku nna tsun ai re. Nanhte gaw sumsing lamu hta ngai hte arau hkawhkam byin wa na ngu ngai ga sadi jaw ai. Ngai hpe adum nga na matu, ndai poi hpe shaning shagu galaw mu.’ Shaning shagu dai nhtoi du wa yang, Yesu hpang hkan ai ni gaw zup hpawng nna, dai poi hpe matut galaw nga ma ai. Dai zuphpawng hpe ya aten hta, Madu A Shana Shat Sha Poi shing nrai Myit Dum Poi nga nna shaga ai.

 Shana shat sha ngut ai hpang, kasa ni gaw kadai mahtang grau kaba ai ngu nna dangrang hkat ma ai. Raitim, Yesu shanhte hpe ndai hku tsun ai: ‘Nanhte hta na kaji htum ai wa, n ahkyak ai wa ngu nna hkam la ai wa gaw nanhte hta kaba htum ai wa re.

‘Nanhte gaw nye a jinghku ni re. Nye Kawa nanhte hpe tsun shangun mayu ai lam yawng hpe ngai nanhte hpe tsun dan ai. Kade n na yang, nye Kawa nga ai sumsing lamu de ngai wa sana re. Nanhte chyawm gaw ngam nga na re. Nanhte shada da madun ai tsawra myit hpe yu nna, nanhte gaw nye a sape ni rai ma ai hpe masha ni chye na re. Ngai nanhte hpe tsawra ai zawn, shada da tsawra nga mu.’

Hpang jahtum, sape yawng hpe makawp maga ya na matu Yehowa hpang Yesu akyu hpyi ai. Ngwi pyaw simsa let shada da arau magam gun lu hkra mung, akyu hpyi ya ai. Yehowa a mying ningsang chyoi pra na matu mung hpyi ai. Dai hpang, Yesu hte sape ni gaw Yehowa hpe shakawn kungdawn let shinggan de pru mat wa ai. Yesu rim hkrum na aten gaw ni wa sai.