Ayuti nĩmeethĩawa na Vasaka kĩla mwaka mũthenyanĩ wa 14 wa mwei wa Nisani. Meekaa ũu nĩ kana malilikane ũndũ Yeova wamavonokisye kuma ũkombonĩ nthĩ ya Misili na amaete Nthĩ ya Watho. Mwaka wa 33, Yesũ na atũmwa make nĩmatanĩie Vasaka me nyũmbanĩ ya ĩũlũ ndũanĩ ya Yelusaleme. Mamina kũya Vasaka, Yesũ aisye atĩĩ: ‘Ũmwe wenyu nũkũmbũnyanĩa.’ Atũmwa nĩmatelemile meewʼa Yesũ ayasya ũu, na ĩndĩ mamũkũlya: ‘Nũũ ũsu ũkũũvũnyanĩa?’ Nake Yesũ amea: ‘Nĩ mũndũ ũla ngũmũnenga mũkate ũũ.’ Na ĩndĩ anenga Yutasi Isikalioti kalungu ka mũkate. Ndatĩkanĩ ĩsu Yutasi nĩwookĩlile na aumaala.

Ĩtina wa ũu, Yesũ nĩwavoyie, oosa mũkate atilanga tũlungu, na ĩndĩ anenga atũmwa make ala matiĩtwe ĩtina wa Yutasi kumaala. Amina kwĩka ũu, aisye atĩĩ: ‘Yai mũkate ũũ. Wonanasya mwĩĩ wakwa ũla nganengane kwondũ wenyu.’ Na ĩndĩ avoya kwondũ wa mbinyu na anenga atũmwa make. Amina kwĩka ũu asya: ‘Osai mbinyu ĩsu na mũinywʼa. Mbinyu ĩsu yonanasya nthakame yakwa ĩla nganengane nĩ kana andũ maekewe naĩ. Nĩngũmwatha kana mũkasumbĩka vamwe nakwa ĩtunĩ. Ĩkaai ũu kĩla mwaka kwondũ wa kũndilikana.’ O nayu aatĩĩi ma Yesũ nĩmombanaa mũthenya ũmwe, masaa ma wĩoo kĩla  mwaka nĩ kana malilikane ũndũ ũsu. Ũmbano ũsu wĩtawa Kyaũya kya Wĩoo kya Mwĩaĩi.

Ĩtina wa kũya mũkate na kũnywʼa mbinyu, atũmwa nĩmambĩĩe kũkananĩa ĩũlũ wa nũũ waĩ mũnene katĩ woo. Ĩndĩ Yesũ ameie: ‘Ũla mũnene katĩ wenyu nĩ ũla wĩyonaa tawe mũnini kwĩ onthe.’

‘Inywʼĩ mwĩ anyanyawa. Nĩngũmũtavya maũndũ onthe ala Asa wakwa wendaa nĩmũtavye. Ĩtina wa ĩvinda ĩnini nĩngũthi ĩtunĩ kũla kwĩ Asa wakwa. Inywʼĩ mũkatiwa kũũ nthĩ, na andũ makamanya kana mwĩ amanyĩwʼa makwa ethĩwa mũkeethĩwa mwendanĩte ene kwa ene. No nginya mwĩthĩwe mwendanĩte o tondũ nyie namwendie.’

Mũthya Yesũ nĩwavoyie nĩ kana Yeova asũvĩe amanyĩwʼa make onthe. Na ĩngĩ nĩwamũvoyie Yeova nĩ kana amatetheesye methĩawe na ngwatanĩo. O na nĩwavoyie nĩ kana ĩsyĩtwa ya Yeova yĩthewʼe. Ĩtina Yesũ na atũmwa make nĩmamwinĩie Yeova mbathi sya kũmũtaĩa na ĩndĩ maumaala. Vate nzika, saa waĩ mũviku wa Yesũ kũkwatwa.